مفاتيح الشخصية المصرية

طول عمرهم بيقولوا المصرى

جدع

ابن بلد

عنده مرؤة

شهم

شجاع

كريم

بيحب اللمة

بس دلوقتى بنسمع:

أوامرك ياباشا

وأنا مالى ياعم

أنا عبد المأمور

أنا ماشى جنب الحيط

ياعم اللى نعرفه أحسن من اللى ما نعرفوش

جات عليا أنا

هى الدنيا جرى فيها إيه !!! هما الناس اتغيروا ولا إيه !!!!

عايز تعرف ؟؟

عايز تفهم ؟؟

تعالى نفهم مع بعض

" مفاتيح الشخصية المصرية "


ندوة هيشاركنا فيها و هيتكلم عنها:

د/ على ليلة ............... . أستاذ علم الاجتماع - جامعة عين شمس

د/ محمد المهدى ............ رئيس قسم الطب النفسى - جامعة الأزهر

يعقب اللقاء مناقشه مفتوحة مع الضيوف

تعقد الندوة في تمام الخامسة مساء ، يوم الأربعاء الموافق 28 نوفمبر 2007 ، بكلية الاقتصاد و العلوم السياسية – قاعة (5)

يسعدنا تشريفكم لنا :)

فضفضه جوانيه 8/2

حاسه انى بنكمش داخليا

كل حد تجيله فرصه انه يطعنك بخنجر .. أيا كان نوع الخنجر و قوة الطعنة .. ما بيترددش لحظة واحدة فى انه يقدم على

الخطوة دى .. مع انك ممكن تكون حاطه فى مكانه عاليه أوى .. و بتبصله أحيانا على انه مثال .. ان ما كانش نفسك توصل اليه
.. الا انك بتخاف عليه من الهوا الطاير

صعب أوى لما تشوف فى زماننا ده مثال رائع صالح ..( ما أقدرش اسميه قدوه .. لكنه بصيص من الضوء فى زنزانة قاتمة الجدارن ) .. يتحطم قدامك

بتصدم أوى .. بالظبط كريستاله نازلة من ارتفاع 30,000 قدم مع شلال سرعته 30 كم / للدقيقة .. و فجأة اتفتتت على صخور القاع .. متخيل شدة الارتطام الى تقدر تفتت كريستاله عاملة ازاى ؟؟؟

هى دى حالتى دلوقتى بالظبط :(

لما بتكون بتحترم شخص أوى و بتقدره أوى و هو مش بيبادلك نفس الاحترام .. المفروض نفسيا تكون عامل ازاى ؟؟؟


لما تبقى دايما مستعد تسمع الناس كلها لما تطلب انها تكلمك و تفضفضلك بكل الى جواها من مشاكل و تعطل نفسك و مصالحك الى ممكن تكون مش محل تأجيل علشان تقعد معاهم .. تسمعهم .. و تسمع منهم كل الى هما عايزين يقولوه بالرغم من ان المواضيع دى ملكش فيها اصلا


لما تكون بتتعامل مع الكل بالشكل الى تحب انهم يعاملوك بيه


لما تكون مصدر لنجدة كل انسان يقصدك فى خدمة و ف ايدك انك تفيده فيها


لما تكون بتدى الى حواليك كل الى عندك سواء طلبوه او ما طلبوهوش



قل لى احساسك حيبقى عامل ازاى لما بعد ده كله .. تلاقيهم أول ناس بيدوك ضهرهم لو حسوا انك بتفكر فى اللجوء اليهم ؟؟؟



ليه لما " س ، ص ، ع " طلبو منى اسمع مشكلاتهم علشان اشاركهم فيها بالحل ما ترددتش لحظه واحده .. و سبت كل الى ورايا و اتفرغت ليهم .. و لما جيت اتكلم مع اى حد فيهم بعد كده لانى محتاجه حد يسمعنى .. قوبلت بعدم الاكتراث و " التقفيل " فى الكلام و احيانا الانفعال لضيق وقتهم !!!!


ليه لما اكون بحترم " س " من الناس و اكون حريصه دايما على انزاله مكانه معينه اعلى من الباقى حتى و ان لم يشعر بذلك بشكل كاف .. الاقيه لا يبادل هذا الاحترام احتراما حقيقيا !!!؟؟؟؟


ليه لما اكون رايحه لـ " ن أو ب أو ج " و منشرحه الصدر جدا لانى عايزة اهديهم حاجات كتير كويسه و اتأكد انى مش
مزعلاهم فى اى حاجه .. يكون الرد عدم الاهتمام او الضيق الشديد !!!!


ليه دايما بكون مطالبه من كل الى حواليا انى اقدم كل الى عندى فى الوقت الى هما يحددوه و انهم يلاقو معامله كويسه على طول و يعتبروا ده حقهم الاصيل .. لكن انا مش من حقى انى اطلب ولو 1/4 ده و ان كان بشكل غير مباشر ؟؟؟

ليه دايما بيتحول الفضل الى حق بمرور الوقت عليه ؟؟؟؟؟؟

الى بيضاعف الألم جوايا .. انى بكون عايشه حلم جميل .. او خلينا نسمى الاشياء بمسمياتها الحقيقيه .. بكون عايشه " وهم " جميل .. و دايما بفوق منه على ألم الطعنات ...

مش عارفه العيب فى مين ؟؟؟

بعتذر

لنفسى من انى .. ظلمتها .. و بظلمها .. و حظلمها معايا من قسوة التقييم و التقويم الداخلى .. و الى فى اغلب الاحيان بيكون الناس ما تستحقش نتايجه

بعتذر

لقلبى المتحطم انى عجزت تماما عن المحافظة عليه و هو أغلى ما أملك

بعتذر

لدموعى الى مبهدلاها معايا .. كل شوية نازلة على ناس تستحق بكائها و ناس ما تستحقش

بعتذر

لعقلى الى انهكته فى التفكير فى حاجات كتير اوى المفروض ان غيرى هما الى يفكرو فيها مش انا

بعتذر

لوقتى الى اديته لكل شخص ما قدرش قيمته ولا حس بغلاوته عندى

بعتذر

لكل فرد احترمته و خوفت عليه و قدرته رغما عنه

بعتذر

لكل من سببت له ضيقا نفسيا بقراءة السطور السابقة

Get this widget Track details eSnips Social DNA

ملحوظة : الحروف المنفصلة التى ذكرت فى التدوينه لا تمثل كنايه عن اسماء اى اشخاص واقعيه

Our Oliver twist

وجه ملائكى .. أبيض اللون .. أكسبته حرارة شمس الصيف لونا برونزيا جميلا ..

وجه مشرب بالحمرة .. تعلوه ابتسامه مشرقة .. عينان زرقاوان متطلعتان لامل قريب و مستقبل باسم رسمه خياله الحالم ..

حينما تتعانق سلاسل الشمس تعكس على خصلات شعره القصير لونا ذهبيا براقا ..

شعله متقده من الحماس و الجد الذى لا يخبو طوال الطريق ..

لم أكن الوحيدة التى لفت نظرها ذلك الشاب الصغير الذى لم يتجاوز ال14 من عمره .. ببريق عينيه و صوته " المبحوح " من حرصه على اتمام عمله بجد و اجتهاد لم أر مثله منذ زمن بعيد ، بل خطف أنظار و قلوب الركاب أيضا غيرى الذين جمعتهم عربة ميكروباص واحدة " ملاكى القليوبية " .

" ع ل ي " هى حروف اسم ذلك الفتى التى سمعت سائق الميكروباص يناديه بها طوال الطريق .

كانت بداية الرحلة من موقف رمسيس حينما صعدت الى العربة لأجد ذلك الملاك الصغير ينادى على الركاب و يطمئن على كمالة العدد ليعطى السائق اشارة البدء بـ " خبطتين من كفيه الصغيرين على سطح العربة " او بـ " تمام .. اطلع يا اسطى " ... و لأول مرة فى حياتى أسمع " تباع ميكروباص " يطلب من الركاب الأجرة بقوله " الأجرة من فضلكم " .

تحركت العربة فى طريقها و حركت خيالى معها حينما أخذت أتابع عن كثب " علي " فى حماسه و جده و حتى فى لحظات راحته التى كان يسترقها على فترات متباعده ليجلس لثوان معدودة قبل أن ينفجر فيه السائق غاضبا و ساخطا ليعيده لحالة الجد مرة ثانية بقوله " انده يا ابنى " و أحيانا " انده ياله " .

كان سائقا فظا غليظا .. لم يكترث لحرص " علي " على الاجتهاد فى عمله و لم يلق بالا لصوته المبحوح و لا جسده المنهك ولا حرارة الشمس اللافحه .. بل كان كل همه ان يظل ذلك الطفل منهكا فى عمله حتى و ان كان الطريق خاليا تماما من البشر !!!!

و كأنى أرى أمامى مرة أخرى أبطال القصة الشهيرة

Oliver Twist

لكاتبها المبدع

Charles Dickens

حيث يسخر " فاجين " الصبية الصغار لاجبارهم على العمل بالسرقة لامداده بالمال .. و يستسلم اولئك الصبية لقهر رئيسهم الذى فرضته عليهم .. قسوة المجتمع ، و بخل الاغنياء ، و جفاء الاحباب ، و شده الحاجه ، و طعنات الجوع ، و قرصات البرد ، و فقدان الشعور بالامن داخل بيتهم الكبير " الوطن " ..

رأيت فى ذلك السائق ملامح " فاجين " ، و رأيت براءة وجه "أوليفر " مرتسمه على وجه " علي " ، و أحسست حنان " نانسى " نادلة البار فى صوت ذلك الشاب الذى نصح " علي " بالجلوس للراحة قليلا ..

!! عالم عجيب

عالم الميكروباصات ده عالم غريب و جميل أوى فى نفس الوقت

كل ما اركب ميكروباص أحس انى دخلت آلة الزمن و بقيت عايشة فى القرن ال18 فى بريطانيا .. شريحه كاملة مش قليله على فكرة من المجتمع يمثلها " سواقين الميكروباص "

سواقين الميكروباص دول مجتمع جوه مجتمع .. مجتمع ناجح .. و عنده مقومات خطيرة جدا

بستغرب أوى لما أركب أى ميكروباص .. ازاى المجتمع ده موجود جوه مجتمعنا الكبير و لسه مجتمعنا عاجز عن انه ينفض كل البلاوى الى بيشتكى منها .. و يعيش بصفحة جديدة ؟؟؟؟

كلامى غريب مش كده ؟؟؟؟

طيب

تعالى كده معايا جوه ميكروباص فى العاصمة خط السابع - رمسيس

السواقين الى هما ساعات تشوفهم بيتخانقوا مع بعض علشان مين يحمل عربيته الاول .. تلاقيهم فى ساعات اكتر كتير بيحملو لبعض عربياتهم و يتأكدوا من كمالة العدد عند بعضهم و بعدين يحملو عربيات نفسهم

ساعات تلاقيهم بيدوا تباعين بعض لبعض

و ساعات برضه تلاقيهم شغالين على عربيات بعض

و على طول بقى تلاقيهم مستعدين يخدمو بعنيهم لو اى واحد منهم فى زنقه

و تلاقيهم فى اى خناقه يقفو وقفه راجل واحد حتى لو كانو على باطل

و بعدين ليهم شبكه اتصالات غير طبيعيه حتى لو ما كانوش يعرفو بعض شخصيا .. يعنى لما تلاقى كده و انت داخل خير اللهم اجعله خير على العباسيه .. و لسه خارج خير اللهم اجعله خير برضه من نادى السكه و الشارع لمن لم يشهده من ذى قبل " حلوة ذى دى أوى مش كده :) !! " اتجاهين .. بينهم رصيف على غير العادة فى الشوارع المصرية و يستشعر السائق بخبرة سنوات مرمطة فى ايدين امناء الشرطة ان فى كده تكدس مرورى يوحى بان هناك مصيبة لاصحاب تلكم العربات تلاقى فجاة السؤال المعتاد نط من احد الاتجاهين بتوع الشارع للاتجاه الاخر

هوه فى حاجه ؟؟؟؟؟؟؟؟


و يكون الجواب

اما

لا مفيش اطمن

او

اه
و اما انه يليها تفاصيل الموقف او ان الرد يخلص على قد كده و خلاص



عالم متعاونة جدا جدا جدا لدرجه لا تصدق

و تحس انهم فى احيان كتير قلبهم على بعض

بحس انهم عاملين شبكه ماسكه البلد كلها بالظبط زى الشبكة الى كان عاملينها الغجر فى باريس فى فيلم أحدب نوتردام


الغريب


و العجيب


و المذهل


جدا


جدا


جدا

بالنسبالى

.. ان بالرغم من كل التعاون الى هما فيه ده ، و بالرغم من القدرة الاتصاليه الفائقه الى بينهم ، و بالرغم من انك تحسهم ايد واحده فى مواقف كتير .. ما بيقدروش يقولو لا لاى ضغط مرورى امنى عليهم .. مع انهم لو وقفو نفس وقفتهم فى اى خناقه جنب بعض .. حيقدروا على الاقل يحطو حدود فى التعامل كويسه تضمن فى حاله اضعف الايمان ان لما اى امين شرطه يركب ميكروباص يدفع الجنيه الى كل البشر الى راكبين معاه دفعوه .. و الى بيخلينى عايزة اتسحب من لسانى و اقول للتباع ياخد منه الاجرة زيه زينا .. بس ببقى متوقعه انى الاقى التباع و السواق و الامين كلهم عليا انا .. :$


طب هوه ايه الى مانعهم صحيح ؟؟؟

" بتستعبط دى ولا ايه ؟؟؟؟ " .. لا لا لا عيــــــــــب بلاش الكلام الى جوه نفس كل واحد فيكم دلوقتى ده :)

الحكاية وما فيها ان هما قادرين بشوية جرأة كده و وقفه مع بعض انهم يخفضوا الفرده الى بتتفرض عليهم من كل متر بيخطوه فى شوراع المحروسة و يطلعلهم فى كل خرابه عفريت

و انهم يقدروا يكونو قوة مضاده فى وش القوة الى عماله تديهم على دماغهم بسبب او من غير سبب

و انهم برضه حيرحمونا احنا من عده حاجات حيكون ليهم فيها الاجر و الثواب :


حيرحمونا من حرقه الدم على حال البلد

و حيرحمونا من الضغط الى بيجيلنا لما نقف ساعه علشان الباشا بيتأكد من الرخص

و حيرحمونا من السكر الى حنبتلى بيه لما الباشا يركب و ما يدفعش و ان طلع الجنيه و عايز يدفع يرجعله تانى عملا بمبدأ " الجنيه الكاوتش يعنى تخبطه فى الحيطه يردلك تانى :) " علشان اونكل السواق خايف ياخد من عمو تمن شقاه و تعبه

و حيرحمونا برضه من كمية السيئات الى الواحد بيلمها لما العالم تبدأ تطهق من كتر الوقفه الى واقفينها فى التفتيش على الرخص و تبدأ تسمع حاجات كده من قبيل السباب الحميد و احيانا كثيرة غير الحميد و ان ما سمعتش سباب فاحب اقولك انك برضه مش حتسلم علشان حتلاقيك بتشتم جواك فى الى قاعدين و الى فى الحاله دى بيكونوا بينصحوا السواق انه يمشى حاله مع الباشا علشان نخلص و نروح مصالحنا

ده بقى غير انهم حيرحمونا من غسيل طروف البنطلونات " للشباب " و الجيبات " للبنات " الى اتمسح بيها تراب السكك من كتر الجرجره و السحل ورا الميكروباص و هوه ماشى متشعلقين رجل جوه و رجل بره علشان تحلق تركب قبل ما يفتح البيه السواق على 120 علشان الباشا جاى و ليلته " السواق يعنى " حتبقى بيضه او كحلى على حسب طقس اليوم




Our Oliver Twist

مش بس علي هوه الى أوليفر تويست

لا

ده سواق الميكروباص نفسه هوه كمان أوليفر تويست

الطالب الى مدرسه فارد جناحاته عليه فى المدرسه هوه كمان أوليفر تويست

العيان الى بيستنى الكشف ساعات فى المستشفى علشان الدكتور عنده كشوفات فى العياده الخاصه و مش فاضى يجى يشوف العالم الغلابة هوه كمان أوليفر تويست

البنت الشغاله الى فى بيت ناس بيصبحوها بعلقه و بيمسوها بعلقه هيه كمان أوليفر تويست


ذوى الاحتياجات الخاصه فى بلدنا أوليفر تويست


المسنين فى دور الرعايه هما أوليفر تويست


الايتام فى الملاجىء الحكومية أكتر بشوية من أوليفر تويست


الموظف الى قاعد على المكتب طلعان عينه طول النهار و مديره مكرهه فى العيشه و الى عايشينها علشان اخر الشهر ياخدله كام ملطوش هوه برضه أوليفر تويست


المدرس الى مش فاكر حاجه فى حياته غير مواعيد الدروس الخصوصيه و ما شافش ولاده من اخر سبوع اتعمل لابنه الكبير زيهم برضه أوليفر تويست

استاذ الجامعه الى تشوفه تفتكره يا ماهنا يا ماهناك وهو مرتبه ما بيقضيهوش لاخر الشهر و عنده ضمير و ما بيكروتش العيال فى الشرح ولا بينزلهم كتب من غير فايده يستفيد بتمنها هوه برضه أوليفر تويست



أوليفر تويست فى مجتمعنا يا سادة يا كرام مش واحد ولا اتنين ولا حاله و لا حالتين




أوليفر تويست




هو




كل مرؤوس استسلم لقبضة رئيس ظالم

حتى و ان كان هذا الرئيس نظام مجتمع بأكمله

فضفضه جوانيه 8/1

احساس بقاله فترة ليست بالقليله مسيطر على ذاتى الضعيفه سيطرة شبه كاملة

اول مرة فى حياتى يستمر الاحساس ده لمدة طويلة كده

كنت معتاده على ان يزورنى هذا الاحساس من فترة لاخرى اثناء فترات الضغوط النفسيه فقط

مش عارفه هل معنى كده ان حياتى بقت مكربسه اوى و مزدحمة جدا و كل مواضيعها فوق بعض

و لا انا الى مستوى الحساسية النفسيه عندى بقى زايد زياده جنونية

نفسى اوقف الزمن

اه و الله نفسى اوقف الزمن

نفسى اخد فرصه مفتوحه لمراجعه الفترة الاخيرة من حياتى بضمير

نفسى اراجع تانى علاقاتى مع كل الى حواليا

نفسى ارتب كل امورى و استقر نفسيا و بعدين اكمل المشوار الى الواحد ماشى فيه ده

نفسى اعرف كل فرد من الى بيتعاملو معايا عايز منى ايه بالظبط

نفسى اشوف الناس على حقيقتها

نفسى انزع عن كل الوجوه اقنعتها

نفسى اتأكد من صدق تعامل كل فرد معايا

ساعات كتير بتمنى انى اعيش لوحدى

فى مكان بعيد اوى

حتبقى الحياة اهدى كتير

مفيهاش حد بيئذيك على الاقل نفسيا

حتقدر تتنفس هواء نقى من غير شوائب

حتبقى فاهم انت بتعمل ايه و ليه

بحس ساعات كتير انى باخد قرارات مش بكامل رضايا بحس ان فى دايما قوى اجتماعيه و نفسيه بتدفعنى انى استمر فى تناول مواضيع معينه و انا لسه ما استقرتش هل انا فعلا عايزة استمر فيها ولا لأ

مستوى الافعال الغير مرضى عنها نفسيا من داخلى مش لحاجه غير انى ما اخدتش وقت كافى بما يناسبنى لانى اقدم عليها او استمر فيها زاد اوى فى الفترة الاخيرة

بسأل نفسى سؤال متكرر الفترة الى فاتت

انا ايه الى خلانى اعرف الناس الى انا اعرفها دى كلها ؟؟؟

عايزة أغمض عينيا

عايزة اغمض عينيا و افتحها الاقى كل الامور الملعبكة فى حياتى اتحلت



عايزة اغمض عينيا و افتحها الاقى كل الى حواليا بيتعاملو معايا بصراحه و وضوح من غير لف ولا دوران



عايزة اغمض عينيا و افتحها الاقى الناس الى بتعامل معاها كلها بتتفاعل و تتجاوب مش علشان مصلحه شخصيه حتعود عليها لكن علشان عايزين حياتهم كلها تبقى للاحسن



عايزة اغمض عينيا و افتحها الاقى الناس نضفت داخليا



عايزة اغمض عينيا و افتحها الاقى الناس واخده امور حياتها جد عن كده شوية



عايزة اغمض عينيا و افتحها الاقى الناس ما بيحركهاش دافع الانانيه



عايزة اغمض عينيا و افتحها الاقى الناس فهمت يعنى ايه مبدأ و مين هوه القدوة و ايه هوه الهدف و ازاى يبقى ليهم منهج يعيشو وفقا ليه











بحلم

بحلم ارجع طالبة فى مدرستى تانى

بحلم ارجع تانى اقعد فى فصولها

بحلم ارجع تانى اصحى الصبح بدرى و انا مبسوطة انى رايحه المدرسه علشان انا حابه اروح المدرسة

بحلم ارجع تانى اعيش فى الجو الملائكى الى كنت عايشه فيه مع كل الناس الى هناك

بحلم ارجع تانى اشوف الدنيا وردى و التفاؤل يملا حياتى زى ما كانت زمان

بحلم وقت الضيق الاقى قلب كبير بيضمنى

بحلم المس الحنية فى تعاملات الناس

بحلم ان الرحلة الى انا عايشاها تنتهى على خير و احسن مما اتوقع

بطلب

بطلب من اى حد و كل حد يقرا البوست ده يدعيلى كتير

بطلب من اى حد و كل حد يقرأ البوست ده يراجع سير حياته و يحاول يقيمه علشان يقومه

بطلب من اى حد و كل حد يقرأ البوست ده يعرف ان بمحاوله بسيطه منه ممكن يكون سبب سعادة كل الناس الى حواليه

بطلب من اى حد و كل حد يقرأ البوست ده يعرف ان ايد لوحدها ما تسقفش و ان لازم كلنا نتحرك مع بعض لو كنا فعلا زهقنا و قرفنا من الحال الى بنعيشه

و اخيرا بطلب من كل حد و اى حد يقرأ البوست ده انه يسمع الانشودة الى فى اللينك الى تحت ده بعد ما يحملها

بك استجير

البؤسااااااااااااااء

.. حينما يدق الملل بابك .. تشعر و كان العالم يتوقف عن الحركة

.. تمر عقارب الساعه ببطء شديد كما لو كانت لا تتحرك تماما

.. تشعر و كأن الدنيا ضاقت بصدرها و كأنها تفتح الباب لتعطيك " شلوتا " كبيرا خارج نطاقها

.. لحظات الملل قد تكون لحظات ابداع عندما تحاول كسرها .. او حينما تحاول تسجيلها بالقلم

.. لحظات الملل من الممكن ان تكون لحظات مراجعة لنفسك فى كل أمورها السابقة

!!لحظات الملل من الممكن ان تكون نهاية حياة انسان فى مكان ما على ظهر هذه البسيطة

ـــــــــــــــــــــــــــــــــــــــــــــــــ

قاعدة .. و ربنا يكفيكو شر القاعدة الى كنت قاعداها

مردج رخام .. تكييف درجة حرارته أسقع من القطب الشمالى .. أبلة فضيلة عماله تحكى " هيه المفروض بتشرح "

بس هيه فى الحقيقة كانت بتحكيلنا قصة قبل النوم !!

الوقت داخل على 4 العصر .. بقالنا نص ساعة كاملة على دى الهيئة ..

هيه أول ما دخلت شخطت شخطتين .. وطبعا نتيجة جينات " شعب تلمه زمارة و تفرقه عصاية " العالم كشت فى جلدها

و كله حط لسانه جوه حنكه و هووووووووووس خالص .. لو رميت دبوس يرن يا ربى !!!!

!!!!ده ايه الهدوء ده يا دفعة مهيسه ؟؟؟

.. شوية شوية الواحد بدأ يسمع ناس بتعطس .. و عالم بتكتك من السقيع الى بيلف المكان

.. أبله فضيلة عماله تحكى يا ولاد .. و العالم بدأت تناااااااااااااااااام

تتابع عيناى عقارب الساعة ..

3:30

3:31

3:32

3:33

3:34

3:35

هيييييييييييييييييييه و قفلنا خمسه على بعض

الله يمسيكى بالخير يا سالى يا خليفة .. فين ايام ما الواحد ما كانش بيبقى عايز يخلص المحاضرة .. و يستنى الى

بعدها بفارغ الصبر

فهمت كلمة

ابن خلدون لما همس قبل ما طنط فضيلة تبدأ و قالى : " دهاء شوفى بقى الشغل العالى " .. يا ريتنى كنت فهمتها بدرى شوية .. أو حتى كان قالها بدرى شوية

" آه يا دنيا تعبنا فيكى اتاريكى ماشية عكس "

عينى عليكو يا طلبة سياسة .. وأنتو اتحولتوا كتبه .. لأ و ايه .. صمٌ .. بكمٌ .. عمى .. و الا حتبقى سنتك بيضة منك ليها ليها له

ـــــــــــــــــــــــــــــــــــــ

ماذا تفعل لو كنت مكانى ؟؟؟؟؟؟؟؟؟؟

.. حالة تجمد شبه كلى فى النصف السفلى عندى .. و شبه روماتويد بدأ يغزو النصف العلوى

3:45

3:46

3:47

3:48

3:49

3:50

!!!! يا مهون كل أمر عسير يا رب

ياللهول !! أبله فضيلة تفضلت و قامت من كرسى العرش على السبورة تشرح الخريطة بالقلم الماركر ..

!! الله !! طنط طلعت كائن متحرك متفاعل اهى .. شوف الزمن يا برعى

الله يرحمك يا سيبويه .. لو كان عاش الراجل للمحاضرة لخر صريعا من السكته الدماغية

مهو لما نجر الفاعل و نرفع المضاف اليه و ننصب ع الطلبة .. احم .. قصدى و ننصب ظرف الزمان .. و خلى بالك معايا بقى .. احنا معانا فى نفس ذات اللحظة تجمد كلى دلوقتى فى السيقان و منطقه الحوض .. و روماتويد متأخر الحالة فى النص الفوقانى .. و الساعة الان 3:55 و معرفش كام ثانيه .. و طنط راسمه البلقان على يمين المضايق التركية

!!!! مساااااااااااء الافيــــــــــــــون

ــــــــــــــــــــــــــــــــــــــــــــــــــــــــــــــــــــــــــــــــــ

!! آآآآآآآه على التعليم فيك يا مصر

نوع من الدكاترة لازم يعدموه فى الجرد الجديد .. نظام اكتم العيال .. و افضل كر كر كر كل الى عندك .. المهم .. العيال نايمة .. و السكوت علامة الرضا يا حاج .. على بركة الله

!! الولد للبنت يا ام حسين

!!! ايه الى انا بقوله ده ؟؟؟ انا شكلى لسعت

!!! لا لا لا .. ده الفيوز الخامس على ايدك الشمال و انت داخل فى النخاع المستطيل بدأ يكون تلج

افتكرت منظر محمد هنيدى وهوه مدفون فى القطب الشمالى فى فيلم جاءنا البيان التالى

حموت و اعرف العالم دى بتكتب ليه ؟؟

التلاته الى ورا ... خرق صوت فضيلة ودنى .. العيال زهقت يا حبة عينى .. سيبيهم يفكو عن نفسهم شوية

ما علينا .. نرجع تانى للتعليم المصرى ..



مهزلة !! سؤال بيخبط فى دماغى حالا .. هوه ليه ما بيتعملش للدكاترة انترفيو قبل ما يتعينوا ؟؟؟

!!! المفروض اننا فى كلية محترمه يعنى

حاجه مهمة يا ولاد الحلال الهى يا رب الى يبقى فيكو وزير تعليم عالى او واطى يحطها فى اللايحه و يتم التنفيذها فور تولى معاليه المنصب ..

( على كل استاذ او داكتور فى مهة " تعليم " الطلبة .. انه يقدم شهادة تبرىء جانبه من أى مرض نفسى سيكولوجى عويص و مكلكع .. على ان تكون الشهادة من اى داكتور برضه مشهور و خارج نطاق التأمين الصحى )

الساعه 4:05 يا مسهل يا رب !! فاضل 25 دقيقة على المحاضرة .. هييييييييييييييييييييه

الله أكبر .. العالم بدأت تتذمر و مش طايقه و عايزة تروح

كفاية .. حرام ..

كفاية .. حرام ..

لا طبعا ده مش صوت الطلبة .. ده بس صوت امنياتهم ..

فضيلة : الى عايز يخرج يخرج .. او تكملو الحتة الباقية من الكتاب و نلم و نمشى

صدح صوت من خلفى تقريبا كده اعرفه .. : يا دكتور الى عايز يخرج يخرج .. فى ايه ؟؟

آآآآآآآآآه .. شكلى كده فهمت ابن خلدون غلطت خاااااااااااااااااااااالص لما قالى الجملة اياها فى أول المحاضرة .. طب وليه يا ابن الحلال كده ؟؟ تخسر زمايلك و اصحابك ليه طيب ؟؟ .. معلش حنعمل احنا الكبار المية ..قصدى المرة دى

ـــــــــــــــــــــــــــــــــــــــــــــــ

الشعب المصرى ده شعب صبووووووور بشكل !! .. اعجاز علمى متحرك على الارض

التعليم فى مصر نااااااااااازل يشرب م الترعة .. ولا خط طفل عنده 4 سنين فى كى جى ون

نفسى و منى عينى انزل اقف جنب فضيلة هانم أشوف منظر العالم بشكل شامل كده عاملين ازاى ؟؟ .. و لو انى متوقعه

أفيون

كُلّة

حشيش

هروين

برشام

!! كله منه يا شقيق

ــــــــــــــــــــــــــــــــــــــــــــــــــــــــــــ

4:15

طنش تعش تنتعش

فينك يا اسماء دلوقتى تشوفى الى بيحصل فيا

طب اطنش المهزلة دى ازاى ؟؟؟؟

يا رب رحمتك الواسعة

الحالة الحرارية : حموووووووووووت م البرد

!!! حرام عليك يا فضيلة بقى .. حرام عليك .......ده مش انا .. ده الى جنبى يا عينى بدأت تكلم نفسها

ـــــــــــــــــــــــــــــــــــ

4:23

!!! اللهم ارزقنى ببطانية من السماء

ـــــــــــــــــــــــــــــــــــــــــــ

فضيلة : فرنسا رفضت انها تلتزم

سموى داخليا طبعا : و الله عالم ميه ميه .. عارفه تاخد حقها ازاى .. حسره علينا احنا .. ثابت على سياسة النفس الطويــــــــــــــــــــــــــل

!!! أول مرة اعرف ان بالى طويل كده

أمه دعياله و الله .. صاحب النصيب :)

مهو مش اى حد يستحمل الى انا مستحملاه دلوقتى ده ..

!!! يا رب بطانية لحسن انا حطلع مجففه من هنا

ـــــــــــــــــــــــــــــــــــــــ

4:26

هيييييييييييييييييه مروااااااااااااااااح

بسم الله نبدأ

اسجل اولى خطواتى فى عالم التدوين الذى طالما تابعته من بعيد ..









يا مسهل ..












بما ان دى اول تدوينة بشكل رسمى يعنى على مدونة و حركات من دى .. تفتكروا المفروض اقولكم ايه ؟؟؟ و يا ترى انتو متوقعين
تقرأوا ايه فى اول تدوينة عندى ؟؟؟

مممممممم

طيب خلينا نفكر تفكير منعكش كده ..

ـــــــــــــــــــــــــــــــــــــــــــ


بصو بقى .. سموى حفظنى المولى عملت المدونة دى لعدة اسباب

اولا : بتجرب ..

ثانيا : عايزة تثبت لنفسها شوية حاجات كده على جنب ..

و ثالثا بقى : منظور جديد الناس تشوفنى من خلاله .. يعنى الواحد مننا جواه حاجات كتير مش كلها بالضرورة لازم تظهر فى الحياة بره

.. الشوية الى ممكن يكونو جوه لسه او ما نسميه نحن اهل السياسة " الكامن " فى الموضوع دوروا عليه حتلاقوه هنا ..

انا برضه " و اعوذ بالله من كلمة برضه " مقتنعه بحاجه كده .. انعكست فى اسم المدونة

ايون اسم المدونة الى شايفينه منور فوق ده " عيش اللحظه " مستغربين ليه ؟؟

هوه مش برضه يا جماعه مشوار ال1000 ميل عبارة عن خطوات !!

و الجبل ما هو الا ملايين من حبات الرمل !!!

و البحر بلايين من قطرات المطر !!!

و الجنيه المصرى المتعوم شلنات و برايز !!

حياتنا هيه كمان مش اقل من الجنيه المتـ..... احم .. قصدى هيه كمان عبارة عن لحظات ..

ايوة .. لحظات .. لحظات كتير مختلفة بتمر علينا .. كل لحظه منهم بتضيفلنا حاجه جديده بتخلينا مستعدين نستقبل اللحظة الى بعدها ..

كل لحظة هي جزء من حياتنا .. لو حاولنا نهرب من اى لحظه فيهم حتبقى الصورة النهائية مشوهه و غير مكتمله

لو حاولنا نعيش كل لحظة منهم حنلاقينا بنستمتع برسم طريق حياتنا

لو عيشنا كل لحظة بصدق حنلاقينا قادرين نفهم حاجات كتير بتحصل حوالينا و بنلعن فيها العيشة و الى عايشينها مرات كتيرة مع اننا احنا الى مسئولين عنها بالاساس

لو عيشنا كل لحظة باخلاص حنقدر نستوعب واقعنا و ندرس مشكلاتنا و نبتكر الحلول و نستفيد من النتايج

كل لحظة فى حياتنا ليها طعم مختلف و أثر مختلف ..

حتلاقوها ساعات بتضحك

و ساعات بتكشر

مرة بتتخانق

و مرة بتهيس

و احيانا بتتفلسف

و ممكن تستغبى

و مفيش مانع تتكلم لغات كمان

اختلافات كتــــــــــــــــــــــــير اوى بس أهم حاجه انك فى الاخر تـعيش اللحظة