Monday, April 21, 2008

فلرب مغلوب هوى ثم ارتقى





السلام عليكم جميعا و رحمة الله و بركاته


عارفه ان بقالى كتير ما كتبتش حاجه .. مع ان نفسى اكتب حاجاااااااات

بس ربنا يفرجها و ييسر باذنه

النهارده و انا راكبه الميكروباص من رمسيس كالعادة متوجهة الى بيتى الحبيب ركب جنبى شابين من جامعة الازهر .. واحد منهم من أول ما ركب و هو ما بطلش كلام .. بس كان كلامه جميل الحقيقة و شدنى ..

كان بسيط و تلقائى بس عميق أوى
المهم .. من ضمن الحاجات الكتير الى كان بيقولها ابيات شعر من كذا قصيده كل شوية كده .. أول حاجه قالها أول ما ركب و الى من ساعه ما سمعتها لحاد دلوقتى عماله تتردد فى أذناى ..جزء من بيت شعر لحافظ ابراهيم بيقول :

فلرب مغلوب هوى ثم ارتقى

بمجرد ما سمعت البيت ده و انا مر قدامى شريط طويل من المشاهد الى حصلت و بتحصل .. الاضراب .. محاكمات الاخوان .. الاعتقالات المدنية .. المظاهرات .. طوابير العيش .. زحمة الشوراع .. حال الطلبة .. الفقراء .. الحزن المرسوم على الوجوه .. و مليون حاجه وحاجه كلها مرت بشكل متصل قدام عيني

رجعت البيت و دورت على القصيدة كاملة .. لقيت فيها معانى كتير أوى .. و رسايل كتير أوى تخصنا و تخص حالنا الفترة دى ..

القصيدة محتاجه تحليل عميق .. حكتبه باذن الله بس مش فى التدوينة دى .. المرة دى حكتفى بانى انزل القصيدة بس

اقرؤها بتمعن .. افهمو كل سطر فيها .. اقرأوا المعانى فى السطور .. حسوا بكل كلمة مكتوبة .. الى ان القاكم فى التدوينات القادمة باذن الله





تحية الناشئين


أهلا بنابتة البلاد ومرحبا * جددتم العهد الذي قد أخلقا.


لا تيأسوا أن تستردوا مجدكم * فلرب مغلوب هوى ثم ارتقى.

مدت له الآمال من أفلاكها * خيط الرجاء الى العلا فتسلقا .

فتجشموا للمجد كل عظيمة * اني رأيت المجد صعب المرتقى.


من رام وصل الشمس حاك خيوطها * سببا الى آماله وتعلقا .

فتعلموا فالعلم مفتاح العلا * لم يبق بابا للسعادة مغلقا .

ثم استمدوا منه كل قواكم * ان القوي بكل أرض يتقى
.


لشاعر النيل : حافظ أبراهيم


Saturday, April 12, 2008

العبقرية المصرية بين الأهرامات الثلاثة و شخصية رفعت الجمال "رأفت الهجان" والجلوس على القهاوى



يا ما قعدنا و اتكلمنا و قولنا وحضرنا محاضرات و ندوات عشان نعرف مين هم المصرييين و مين هى الشخصية المصرية و هل مصر تستحق ندافع عنها ونضحى فى سبيلها و لا هى أرض زى أى أرض وخلاص...


امبارح كنت مع أسرتى فى مكان للأكل فى أول الهرم .. يعنى عند الأهرامات الثلاثة يالضبط .. و كان من حسن الحظ إن المكان كان فى موقع بيطل على الأهرامات من فوق ..




المهم قعدنا، وأنا كنت عمال بتأمل الأهرامات وبتفرج عليها، المهم كل أما أشوفها أستغرب إيه دا؟ معقولة حبة حجارة و رمل يفضلوا صامدون طول القرون اللى فاتت دى كلها ؟ معقول أهرامات تتبنى بالدقة دى و بالزاوية اللى لو جه أكثر مهندس حرفية النهاردة مش هيعرف يعملها على الواقع ؟


المهم لما بقعد اتأمل بلاقى إن الموضوع مش بس مجرد هندسة و تراب و رملة وحبة طوب .. الموضوع أكبر وأعمق من كده ..


الفكرة كلها

فى الفكر فى التوجه فى الإرادة فى التمكين، فى القوة


كل ده هو اللى حرك التراب ومسك الطوب وحوله لأهرامات غاية فى الإبداع والأتقان.




حد جميل حييجى يقولى طب إنت عايز إيه ما إحنا عارفين الكلام

ما أنا عارف إن الناس كلها قد تكون عارفة الكلام

أولا : أنا بس بفكركم إنتوا مين

ثانيا : عايز أنبه إن هى دى بذرة الحضارة الفكر و الإرادة والقوة والتمكين .. كل دا بيصنع الحضارات وبيخلى البشر يطلعوا بعبقرية غير مسبوقة، وبالذات المصريين على طول تلاقى الناس تقولك

المصريين دول طيبيين

المصريين دول فكاهيين

بس محدش لاحظ إن المصريين عباقرة

بس وقت أما يمتلكوا القوة و التمكين و الإرادة والانتماء، وأما يكون فى رسالة واضحة الناس بتسعى ليها ..


و بلاش الفراعنة خلينا نشوف نموذج تانى أكتر واقعية


عام 1954 وفى شوارع مصر البسيطة و من بين المواطنين المصريين البسطاء كان هناك مواطن مصرى اسمه رفعت الجمال و اللى اشتهر بعد كده باسم رأفت الهجان .. الراجل دا كان مواطن بسيط من أسرة بسيطة و كان فى حاله بس الدنيا لطمته كتير .. إخواته اضطهدوه .. وكان المناخ اللى اتربى فيه كان صعب و كان مؤلم و كان لازم يدفع الشاب دا للإنحراف وسكة النصب عشان يكسب و يعرف يعيش بعد ما جرب يشتغل بما يرضى الله بس برضه كان دايما بيقع فى إيد ولاد الحرام..

المهم انتحل كذا اسم و كان بارع و انتحل الأسماء الأجنبية منها اللى كان انجليزى و فرنساوى و منها اللى كان يهودى، و كان البوليس بيطارده فى كل حتة لحد أما اتمسك من الانجليز و اترحل السجون المصرية ..

الشاب محدش كان يتخيل إنه حد عبقرى إلا لما اكتشفه ضابط مخابرات مصرى و ابتدى يجنده بس تعالوا شوفوا الأسلوب اللى أوجد مفهوم المواطنة جوا البنى آدم ده ..


أولا : جابله أكل و جابله هدوم جديدة وخرجه من السجن و اداله فلوس

تعالوا نقف كده هو إحنا بنعانى من إيه النهاردة ؟؟

من الفقر و عدم الانتماء

طب شوف لما وفرله الضابط كل احتياجه أشبع رغباته ما كانش يقدر يقول غير : عايز منى إيه و أنا أعمله

المهم فضل ماشى معاه و ابتدى يتعامل مع الناس على إنه يهودى و ابتدى مشواره لحد ما عرف الحقيقة و إيه اللى عايزه منه الضابط ده إنه من المخابرات العامة المصرية و إنه عايز يبعته اسرائيل .. الشاب ده فقد اتنمائه لعيلته و بالتالى لبلده، بس الضابط حسسه إنه منتمى لعيله أكبر وهى مصر ..

الشاب ده راح اسرائيل و عاش هناك يبن اليهود اللى عمالين نقول عنهم أساطير 18 سنة لحد أما مات محدش يعرف إنه كان مصرى ومسلم .. و هو اللى جاب خبر العدوان الثلاثى و هو اللى جاب خبر النكسة قبل ما تحصل، و هو اللى جاب رسومات خط بارليف وساهم فى انتصار أكتوبر اللى بنحلف بيه لحد النهاردة ..




الشاب مقعدش على قهوة ينتظر الشغل لحد أما يجيله، كان دائم البحث عن الشغل الشاب كان بداخله الانتماء بس كان محتاج دفعة.

النهاردة الشباب لو قولت لواحد منهم أبعتك اسرائيل هيقولك فكك منى .. بس الفكرة إن عمال يضيع وقته فى الهلس والكلام الفاضى والجلوس بالساعات على القهاوى .. دا غير إنه مفيش رسالة قدامه واضحة .. سواء على المستوى الشخصى أو على مستوى المجتمع.

السؤال : ما ينفعش الفراعنة أو شخصية رفعت الجمال تتكرر تانى فى إطار العبقرية المصرية ؟؟ ما ينفعش يبقى الشعب المصرى كله رفعت الجمال فى مجاله؟!

_________________________


كتبها زميلي الفاضل ع .ع.


Friday, April 11, 2008



A new day wiTh wOndErfUl feEliNgS :)





Al 7amdu le Allah

I'm feElinG bettEr :)


Monday, April 7, 2008

على هامش النتيجة .. بكلم نفسى



أيون بالظبط حضرتك النتيجه الى قعدنا مستنينها 21 يوم هنا و بعدين ظهرت هنا و الى واضح طبعا انها ما كانتش زى منظر العالم المنشكحة فى الصورة العبيطة الى انا حاطاها دى نوهائى آت أوول يعنى

واحد حيقول حالا : طيب و انت فالقه دماغنا ليه يعنى ؟؟ لما النتيجه مش عاجباكى ما تتلمى و تروحى تذاكريلك كلمتين ينفعوكى بدل ما انت قاعده تصدعينا


بمنتهى الروح الرياضية حقوله : انا مش بكلمك انت يا رخم .. انا بكلم نفسى .. بس بصوت عالى .. لو مش عاجبك شوفلك اى موقع للجيمز سلى وقتك هناك و ابقى تعالى وقت تانى نكون خلصنا يا آبا .. ثم ثانيا انا بكلم أهل المدونة .. الناس المحترمة الى بتقرالى و بترد على جنابى .. و مستحملانى اخر احتمال .. و مبسوطين انى بكلمهم هنا .. يعنى م الاخر برضه اطلع منها و هيه تعمر

طيب

يعنى الى حضراتكو على مشارف قراءته ده كلام بكلم نفسى بيه .. حتلاقوه ملخبط و مشخبط و ملهوش راس من رجلين و احتمال يكون فى اجزاء فيه ملهاش اى دعوة باى حاجه من اجزاء تانيه .. و أحب اديكم اوفر فيو عن الى انتو مقدمين عليه كده فى السريع .. ابشركم بان فى كلاب بتهوهو فى دماغى .. و ناس بتضرب بعض .. و قاعات مؤتمرات شغاله .. و عالم بتتكلم و ترد على نفسياتها جوه .. و ناس نايمة و عالم بتصحى فيها و ناس تانيه عايزة تنام و عالم غير الاولانيين بقى بيفوقوهم .. و هي حاليا بالظبط عاملة زى اخينا الى فى الفيلم ده






نهدى بقى و نشوف فى ايه ؟؟

ايه الحكاية بقى يا بنتى ؟؟

كان فى تيرم فات كان ملعبك شوية .. فى الحقيقة شويتين تلاته .. يعنى انشطة كتير اتزحمت على دماغ الواحد علشان ما نفعش تيجي فى مرحلة سابقة عن دى .. و بعدين كان تيرم عصيب بصراحة .. المواد كانت لطيفه اه .. بس دسمة .. كنت مستمتعه بيها اه .. بس اسلوب تناول المواد عقيم .. مناهج قد تكون محترمة اه .. بس دكاترة محتاجه اعادة تأهيل ..
اعداد طلبة فى المواد الاختيارى بتكون كبيرة و الدكتور مش فاضى لينا كلنا و وراه مليااااااار حاجه مسئول عنها
كم الاسيمنتس الى الواحد كان مبتلى بيها رهيب .. من كترها الواحد ما كانش لاحق يذاكر علشان يلحق يخلصها و يسلمها فى وقتها .. و كانت بتتكروت برضه لان التزاحم بتاعها ده كبير .. فمكنتش لاحقه اعملهم بضمير اوى او زى ما انا عايزة فكان الناتج بيطلع دايما اقل من المستوى الى ارغب فى انه يكون عليه


طيب ها لسه فى حاجه تانيه عندك ولا خلاص

ثوانى كده اشوف

طيب

اه لسه .. كانت حالتى النفسية سيئه جدا .. و كان فى مشاكل كتير فى كل حته و كلها كانت فى وقت واحد مع بعض .. من بين بيت لعائلة لدراسة لزملاء لاصدقاء لتلبك نفسى على تلبك عاطفى .. سخافات كتير حصلت و استنزفت وقت و جهد و فكر الواحد بغباء



مممممممممم


كملى سامعاك


الحالة العامة بتاعت البلد كانت بتكمل عليا كل يوم انزل فيه الشارع .. كل حاجه عينى كانت بتقع عليها .. كل كلمة ودنى كانت بتلقطها .. كل تفاعل كان بيتم بين الناس و بعضها قدامى او بينى و بينهم .. كل يوم كنت بنزل فيه الشارع باطلع بنتيجه جديده تضاف لكم النتايج الى عندى .. و ارجع تانى اعيد ترتيب الى طلعت بيه علشان ابلوره فلاقى ان فى حاجات كتير محتاجه تتظبط و ان الواحد عليه مسئولية كبيرة واى لازم يقوم بيها و ما بيقومش غير بربعها فساعات اكتئب اكتر و ساعات اتحمس انى ارفع من همتى علشان الربع يكبر و يبقى نص


اه .. و ايه تانى ؟؟


الحالة الدينية و الالتزامية كانت مش لطيفه بالنسبالى الى حد ما .. يعنى دخلت فى صراع غريب كده بين ما هو كائن و ما يجب ان يكون و اليات المواءمة بين الحالتين و ايه الى كان زمان بس ممكن ياخد شكل تانى فى تجليه دلوقتى .. و ايه الى لازم يفضل زى ما هو على شكله الاصلى .. و مسلسلات من التقييم الى كانت كويسه بس كلها وقفت عند حد التقييم فقط ..


مممممممممم

ايه كمان

ممم بس كده .. مش فاكره حاجه تانى دلوقتى


طيب حلو اوى

نمسك حاجه حاجه كده و نقول بسم الله

اتفضلى

يعنى انا ملاحظة من كلامك انك عمالة ترمى المسئولية على الدكاترة و على الدكاترة و على الدكاترة .. بس متهيألى الحقيقة مختلفه شوية ولا ايه ؟؟

يعنى اه انا معاكى فى جزء كبير من الى انت قلتيه .. بس برضه انت عليك جزء لا بأس به

ازاى ؟؟

حقولك ولو انى عارفة انك عارفة

بصى يا بنتى .. كان فى سوء تنظيم فى الوقت .. ايون كان فى سوء تنظيم فى الوقت .. بتهدرى وقت بالهبل .. ما ينفعش كده خالص .. ممكن تقللى الهدر ده شوية و تستغليه فى انك تخلصى شغلك بشكل افضل .. يعنى ليه لازم تزنقى نفسك زنقة البوبيز الى انت بتحطى نفسك فيها كل مرة ؟؟؟؟؟


عبد الرحمن كان عنده حق لما قالك بدل ما بنزنق نفسنا فى يوم قبل الامتحان ما كان قدامنا الشهر من أوله كان ممكن نوزع المذاكرة فيه



يعنى هو انا مش من حقى ارتاح شوية .. حرجع من الكلية بعد كل الوش الى فيها و بعد المشوار الى ما يعلم بيه الا ربنا ده .. من غير اى راحه ابدأ الشغل الى المفروض يخلص على طول كده !!! يبقى حفضل فى الدوامة دى مش حعرف ارتاح ابدا



لا مين الى قال كده .. الحكايه مش حتبقى بالشكل الرهيب ده .. انت عارفه انك تقدرى تعملى اكتر من الى انت بتعمليه بكتير بس انت الى مش قادره تقاومى نفسك شوية و تصحى الهمة الى نامت جواكى



نظمى وقتك عن كده و انت حتنجزى و حتعملى العجب كله .. بس انت خدى الخطوة و بداى فى لم الوقت الى بيتدلدلق ده .. حتى لو ما كانش ليك نفس .. اغصبى على نفسك شوية .. مش حنفضل نتدلع كده كتير يعنى .. عيب بقى



و بعدين الانشطة الى سيادتك دخلتيها دى كلها جت على حساب راحتك و على حساب صحتك جدا .. كان ممكن أوى تخلعى من كام نشاط بعد ما خدتى منهم الى انت عايزاه و خلاص .. بس المهم ان الكارثه دى ما تتكررش تانى نوهائى



انا عارفة انك عملتى مجهود كويس الى حد كبير جدا التيرم الاول فى المذاكرة كمذاكرة .. بس واضح من النتيجه ان مش ده المستوى المطلوب خااااااااااااااااااااااااااالص .. يعنى محتاجين نتلم شوية .. لأ .. فى الحقيقة نتلم كتير ..



بالنسبة بقى لموضوع حالتك النفسيه



هو فى جزء و هو الجزء الاكبر ربنا معاكى فيه .. انا و انت ما نقدرش نعمل ازائه اى حاجه ..



طيب بالنسبة للجزء الى نقدر نتخذ موقف حياله بقى ..هديل و مها و الله قالوها كلمة ارمى كل الى مش نافع يعنى .. ده الاتنين قربوا يجيلهم الضغط .. انا معاك ان انت تصرفك دينيا مقبول و سليم بس برضه فى ناس اصلا ما تستاهلش اى حاجه خالص

بصى انت كملى التعامل زى ما انت بكل ادب و احترام .. بس سيبك بقى من كل الى بيعملوه .. حاولى تكبرى الجى و تريحي الدى لان مفيش حاجة تستاهل .. و علشان ثوابك يكبر .. و كل الكلام الى انت عارفاه اكتر منى ده


بالنسبة للتلبكات فحتتحل باذن الله .. حنتصرف يعنى .. بس برضه حاولى تكبرى دماغك



بالنسبة لحال البلد .. فلا تعليق .. من حقك .. بس كملى يا بنتى و ارفعى همتك و ربنا يقويك



نيجي بقى للحالة الدينية .. فانت عارفه حترجعى تانى زى الاول ازاى .. ابدأى فى اسرع وقت ممكن .. و انت عارفه ان اول خطوة بس فى الطريق بتجر الى وراها بسرعة ..استمرى فى مسلسل التقويم حيجيب نتيجه باذن الله و ان تأخرت شوية بس حتيجي .. و خليكي فاكره " ان تنصروا الرحمن حقا تنصروا " .. ربنا يوفقك و يقويكي و يهديكي و يهديلك نفسك و فكرك و ينزل عليك سكينة وطمأنينة من عنده و يبعد عنك وساوس الشيطان و يحفظك من كل سوء يا رب



انا عارفه ان كل الكلام الى قلته ده انت عارفاه و حتى الى انا ما قلتهوش انت برضه عارفاه ما احنا الاتنين واحد :)



طيب هو انت لسه عندك حاجه تانيه تقوليها


اه طبعا أهم حاجه خالص



ايه هى ؟؟

انك تحبينى


نعم ؟؟؟؟؟؟

ايوة انك تحبينى .. انت بجد محتاجه تحبينى زيادة شوية .. فعلا عمرو كان عنده حق .. محتاجه تبقى المعامله اكثر آدمية من هكذا .. الولد قرب ينضم لقائمة اصحاب مرض الضغط و السكر و الانفلونزا من كتر ما بيأكد على الموضوع ده و الله

طيب هل انت نفسك فى ايتها حاجه ؟؟

اه

ايه قولى ؟؟

نفسى اتمرجح .. انا عارفة ان عمرو لما قلتله كده قالى بدأت اقلق عليكي .. بس بجد محتاجه اتمرجح و طبعا علشان اتمرجح محتاجه اخرج بديهي يعنى .. و شوية حاجات تانيه كده بقى .. بس خلاص

طيب .. انا متشكرة انك سمعتيني ..مفيش بقى اى حاجه كده للناس الحلوة الى صبرت لاخر البوست و احتمال تعقبلك كمان علشان عارفين انك حتستفيدي بكل كلمة حيقولوها فى تعقيباتهم ؟؟

اه طبعا فى

فين طيب

هنا




Sunday, April 6, 2008



أكثر مقولة خاطئة سمعتها فى حياتى

" فاقد الشىء لا يعطيه "

:$


Saturday, April 5, 2008



There is always something hidden


Thursday, April 3, 2008


أى فراشة علشان تطلع من شرنقتها لازم بتاخد وقت

بس لو الفراشة أخدت وقت أكتر من اللازم علشان تخرج للعالم الحقيقي

يا ترى المشكلة حتكون فى مين ؟؟

الفراشة ؟؟

و لا الشرنقة ؟؟

Wednesday, April 2, 2008


BecaUse Of U tHe sUn shOwn In mY liFe AGAIN :)