حاسه انى بنكمش داخليا
كل حد تجيله فرصه انه يطعنك بخنجر .. أيا كان نوع الخنجر و قوة الطعنة .. ما بيترددش لحظة واحدة فى انه يقدم على
الخطوة دى .. مع انك ممكن تكون حاطه فى مكانه عاليه أوى .. و بتبصله أحيانا على انه مثال .. ان ما كانش نفسك توصل اليه
.. الا انك بتخاف عليه من الهوا الطاير
الخطوة دى .. مع انك ممكن تكون حاطه فى مكانه عاليه أوى .. و بتبصله أحيانا على انه مثال .. ان ما كانش نفسك توصل اليه
.. الا انك بتخاف عليه من الهوا الطاير
صعب أوى لما تشوف فى زماننا ده مثال رائع صالح ..( ما أقدرش اسميه قدوه .. لكنه بصيص من الضوء فى زنزانة قاتمة الجدارن ) .. يتحطم قدامك
بتصدم أوى .. بالظبط كريستاله نازلة من ارتفاع 30,000 قدم مع شلال سرعته 30 كم / للدقيقة .. و فجأة اتفتتت على صخور القاع .. متخيل شدة الارتطام الى تقدر تفتت كريستاله عاملة ازاى ؟؟؟
هى دى حالتى دلوقتى بالظبط :(
لما بتكون بتحترم شخص أوى و بتقدره أوى و هو مش بيبادلك نفس الاحترام .. المفروض نفسيا تكون عامل ازاى ؟؟؟
لما تبقى دايما مستعد تسمع الناس كلها لما تطلب انها تكلمك و تفضفضلك بكل الى جواها من مشاكل و تعطل نفسك و مصالحك الى ممكن تكون مش محل تأجيل علشان تقعد معاهم .. تسمعهم .. و تسمع منهم كل الى هما عايزين يقولوه بالرغم من ان المواضيع دى ملكش فيها اصلا
لما تكون بتتعامل مع الكل بالشكل الى تحب انهم يعاملوك بيه
لما تكون مصدر لنجدة كل انسان يقصدك فى خدمة و ف ايدك انك تفيده فيها
لما تكون بتدى الى حواليك كل الى عندك سواء طلبوه او ما طلبوهوش
قل لى احساسك حيبقى عامل ازاى لما بعد ده كله .. تلاقيهم أول ناس بيدوك ضهرهم لو حسوا انك بتفكر فى اللجوء اليهم ؟؟؟
ليه لما " س ، ص ، ع " طلبو منى اسمع مشكلاتهم علشان اشاركهم فيها بالحل ما ترددتش لحظه واحده .. و سبت كل الى ورايا و اتفرغت ليهم .. و لما جيت اتكلم مع اى حد فيهم بعد كده لانى محتاجه حد يسمعنى .. قوبلت بعدم الاكتراث و " التقفيل " فى الكلام و احيانا الانفعال لضيق وقتهم !!!!
ليه لما اكون بحترم " س " من الناس و اكون حريصه دايما على انزاله مكانه معينه اعلى من الباقى حتى و ان لم يشعر بذلك بشكل كاف .. الاقيه لا يبادل هذا الاحترام احتراما حقيقيا !!!؟؟؟؟
ليه لما اكون رايحه لـ " ن أو ب أو ج " و منشرحه الصدر جدا لانى عايزة اهديهم حاجات كتير كويسه و اتأكد انى مش
مزعلاهم فى اى حاجه .. يكون الرد عدم الاهتمام او الضيق الشديد !!!!
ليه دايما بكون مطالبه من كل الى حواليا انى اقدم كل الى عندى فى الوقت الى هما يحددوه و انهم يلاقو معامله كويسه على طول و يعتبروا ده حقهم الاصيل .. لكن انا مش من حقى انى اطلب ولو 1/4 ده و ان كان بشكل غير مباشر ؟؟؟
ليه دايما بيتحول الفضل الى حق بمرور الوقت عليه ؟؟؟؟؟؟
الى بيضاعف الألم جوايا .. انى بكون عايشه حلم جميل .. او خلينا نسمى الاشياء بمسمياتها الحقيقيه .. بكون عايشه " وهم " جميل .. و دايما بفوق منه على ألم الطعنات ...
مش عارفه العيب فى مين ؟؟؟
بعتذر
لنفسى من انى .. ظلمتها .. و بظلمها .. و حظلمها معايا من قسوة التقييم و التقويم الداخلى .. و الى فى اغلب الاحيان بيكون الناس ما تستحقش نتايجه
بعتذر
لقلبى المتحطم انى عجزت تماما عن المحافظة عليه و هو أغلى ما أملك
بعتذر
لدموعى الى مبهدلاها معايا .. كل شوية نازلة على ناس تستحق بكائها و ناس ما تستحقش
بعتذر
لعقلى الى انهكته فى التفكير فى حاجات كتير اوى المفروض ان غيرى هما الى يفكرو فيها مش انا
بعتذر
لوقتى الى اديته لكل شخص ما قدرش قيمته ولا حس بغلاوته عندى
بعتذر
لكل فرد احترمته و خوفت عليه و قدرته رغما عنه
بعتذر
لكل من سببت له ضيقا نفسيا بقراءة السطور السابقة
ملحوظة : الحروف المنفصلة التى ذكرت فى التدوينه لا تمثل كنايه عن اسماء اى اشخاص واقعيه
9 comments:
بنكمش داخليا
كريستاله نازلة من ارتفاع 30,000 قدم مع شلال سرعته 30 كم / للدقيقة .. و فجأة اتفتتت على صخور القاع ..
ليه دايما بيتحول الفضل الى حق بمرور الوقت عليه ؟؟؟؟؟؟
تعبيرات رهيبة بجد ماشاء الله اصلا
بالنسبة لمضمون البوست .. مضمون مؤلم
وطالع من حد فعلا مصدوم فى الناس اوى
انتى دلوقتى هتحسي ان الناس كلها كدة فعلا ومفيش حد يستاهل
لكن بعد شوية هتهدي وتلاقي فى ناس محترمة فعلا حواليكي وتستاهل مشاعرك الحلوة المخلصة ناحيتهم
معلش تعيشي وماتاخديش غيرها ياقمر ان شاء الله :)
والاغنية جميلة اوى :)
"انت عالم باللي بيا.. ده انت أقرب حد ليا"
ليا تعليق عليها بس قبله عاوز أقول حاجة...
كان قريب قريت بوست عند بنت خالي فيه معاني قريبة قوي من ده... بس كان بلغة الفرنجة، و اسمحيلي أنقل تعليقي زي ما كان هناك
Cruelty does exist... and so does kindness.
Hate is a fact... and so is Love.
along the road there's always the Good's and the Bad's of all morals.
What does realy matter is: U >>>
will U b cruel when someone is so with U?!,
will u hate someone when he hates U?!
EZ as the answer may seem, hard as it can be to do!!!
Make ur heart the shelter for others, never let go when ppl do so, reach out fo ppl even when they turn away, treat not anyone with cruelty or anger... as if he is so... then U should not B too
--
الأغنية اللي انتي حطيتيها فكرتني بمعني حلو قوي...
أحيانا يجد المرء كل من حوله منصرفين عنه ليذكر أنه هناك من يرعاه من فوق سبع طباق... ليلجأ له مؤمنا و موقنا بعجز المخلوقات عن حمل همه و رفع غمه، و قدرة "الخالق" علي تنفيسها عنه فهو الوحيد الذي يملك أسرار و مفاتح النفوس... و هو بذلك يصدق حين ينادي ربه قائلا "انت عالم باللي بيا.. ده انت أقرب حد ليا"...
بس
إذا ضاقت بك الدنيا ففكر في "ألم نشرح"
؛
فعسر بين يسرين إذا فكرته تفرح!
أعانك الله و أزاح همك و كتب لك الرضا و السعادة في الدارين
والله مش عارفة اقولك ايه
غير اني عارفة بالضبط الكلام ده والشعور ده
بيخنق الواحد من جوه وفي نفس الوقت ما بتقدريش تبطلي تمدي ايدك لحد حتي ما بعد بيعملوا ايا كان اللي بيعملوه
لأن للاسف المثل العليا والقيم الحميدة بقت نادرة جدا في ايامنا
فشيلي من دماغك س , ص , ع
بس ما تبطليش العطاء اللي عندك وفي الاول والاخر دي حاجة فيكي جزء منك
مش من حق اي حد انه باي تصرف يخليكي تندمي في يوم من الايام
ونصيحة مني شخصيا :)
"لأني تقريبا زي حالاتك في المواضيع دي
أبدا أبدا .... تحسي أنك محتاجة لحد
في أي وقت
ربنا أداكي كل حاجة تقدري تعيشي حياتك بيها زي ما تحبي
اعملي كده وهتتغير بالنسبة لك حاجات كتير
والناس اللي ادوكي ضهرهم مرة مش هتضايقي منهم تاني
لأنك ببساطة مش محتاجة لحد
وبفكرك ... انك دايما هتلاقي ناس بيقدروا
و بيحافظوا على مشاعر اللي قدامهم
ودايما موجودين وقت الزنقة
بس هما برضه زيك ... منكمشين داخليا
.......
وان شاء الله تبقي دايما في احسن حال
.......
السلام عليكم و رحمة الله و بركاته
جزاكم الله خيرا يا جماعه على كلامكم ده ..
و جزاك الله خيرا يا عمرو على الدعاء
الحمد لله بدأت أشعر بتحسن نفسى الى حد ما :)
عن ابن عمر –رضي الله عنهما- "المؤمن الذي يخالط الناس ويصبر على أذاهم خير من المؤمن الذي لا يخالط الناس ولا يصبر على أذاهم"
المؤمن الذي يخالط الناس، ويدعوهم إلى الخير، ويدعوهم إلى الإسلام، ويصبر على ما يناله من أذى في سبيل دعوتهم، وإيصال الخير إليهم خير من المؤمن الذي ينعزل عن الناس؛ لأن الأول صاحب نفع متعد، والثاني صاحب نفع خاص
أعانك الله
:)
السلام عليكم و رحمة الله و بركاته
وضاح
جزاك الله خيرا كثيرا
تذكرنا و المسلمين بدعائك
:)
السلام عليكم"ربنا يذكرك بالخير يا ارسم بالرصاص"عودتنى ع العاده اللذيذه دى
المهم بعد التحيه والذى منه
فيه مقوله حلوه قوى لحد مش فاكر اسمه
بتقول ان
اصحاب الفضل أعطوا الفضل ليتفضلوا بيه
يعنى ربنا بيدى الناس الخير والحنان وانهما يفهموا الناس ويفرجوا كربتهم دى نمره واحد يعنى من ربنا مش منك
ونمره 2 ربنا اعطاك الفضل ده علشان تديه للناس وتتفضل بيه علشان يديك تانى سبحانه
مش تخليه عندك وتقلى اعتذر
ثانى هام...ماحدش بيدى من غير ما ياخد يعنى عمرك شفتى كوبايه فاضيه بتدلق على غيرها..طبعا لا لازم تبقى مليانه ومطرشقه لفمها علشان تدى لجيرانها م الكوبيات
كذلك نحن بنى البشر لازم نتملى علشان نفضى ..ربنا سبحانه وتعالى بينعم علينا بنعمه والكوزبياه تتملى نقوم احنا نفضى منها شويه
تقوم تتملى تانى ويحصل فيها بركه
ثالث هام بقه
البوست طالع بحرقه شديده جدا بيفكرنى ببوست كتبته ليه نفس المحتوى
انى بدى من غير ما باخد وده شئ جارح جدا
بحترم الناس والناس مش مقدره ده
بالعكس بضيع وقتى علشان اعلى من مستوى ناس وهما بيكرهو منى ده وبيعتبروا تدخل ويحتقرونى
هو فعلا شعور قاسى ع النفس ممكن يجبرك تقولى اكتر من كده
بس بتبقى لحظه وبتعدى زوبعه ف فنجان وبتهدى والسماء هترجع هتصفى والقمر يرجع ينور والشمس تسطع على ارضك وتدى وتملى الدنيال خير ونماء ان شاء الله
وهى دى الحياه بنحاول نهرب من الناس والاحساسا بيهم ونعيش لنفسنا فى قوالب ثلج زي الروس ولا نعيش فى عزله انا لنفسى زى الانجليز وخلاص
ومش بنقدر انها تلك الجينات التى تعد بمثابه الحبال التى تيعدنا دائما لنقطه انطلاقنا من الفطره وتكبح جماح شهواتنا المختلفه
فى تشبيه مش داخل دماغى ...الكريستاله لما بتبقى نازله مع الشلال بيبقى فيه مياه وبالسرعه اللى ذكرتيه وبالارتفاع كمان هى هتنزل بسرعه وهتبقى متوسطه للمياه يا اما المياه هتلحقها وتنزل ف البحار مع "التش"هتبطأ سرعتها وتنزل بهدوء لتستقر فى سكينه على قاع البحر بعيده عن اعين الأغبياء الذين لا يقدرون مثلها
إلا أن ياتيها من يقدرها"فارس البحار"فياخذها على دفتيه ويصنع منها عالم ماسى ملئ بالاحلام المحققه
وكمان مافيش صخور بتبقى فى وسط البحر مطرح ما بينزل الشلال ..بيبقى بس على الجوانب لو وجد وبتبقى فى بعض البحيرات
ع العموم ممكن بردو
نيجى بقه ف اول الموضوع كنتى بتحترمى واحد وبعدين الايام تولت كشفه وسقط ف نظرك
وبعدين شويه ..احترمتى واحد وهو ما قدرشى شعورك
فى فرق بين ال 2
يعنى الاولانى وحش
فعلا
الثانى ما عندوش اللى يديه بس هو حلو انما طبيعه شخصيته كده
ياريت اكون قدرت اوضح رأيى
مكمل قرايه على فكريه فاضل حبه بوستات لذيذه مستنيانى
سلاموو يا رفيقه
sagittarus
و عليكم السلام و رحمة الله و بركاته
ولو انى حسيت بقسوة شوية فى كلام حضرتك .. بس اتفق معاك فيه ..
عارف .. ساعات فى أوقات الألم النفسي الشديد الواحد بينسى ان الى بيعمله ده جزء اساسي من فروض حياته الربانية يعنى زى ما حضرتك قلت " أعطيت لتفعلى " .. و لما الواحد بيفوق بعد ما يهدا شوية يلاقى انه كان مطالب بالتعامل بحكمة اكبر و بصبر اكثر
كلامك مضبوط .. جزاكم الله خيرا :)
بالنسبة للتشبيه الى مش داخل دماغ حضرتك .. فانا فعلا كنت بكتب ساعتها الى حاسه بيه .. بصرف النظر بقى عن احكام القوانين الطبيعية و الفيزياء و المنطق .. ما جاش فى بالى ساعتها اتخيل المنظر الواقعى و جغرافيا المحيطات :)
بس برضه المنطق الى حضرتك اتكلمت بيه سليم ده طبعا بعيدا عن فارس البحار و فارس المحيطات و الفوارس الكتير دى :)
أخيرا شكرا جزيلا على التعقيب الوافى ده و سعيدة جدا بان حضرتك جايب المدونة من أولها لاخرها قراية و تعليقات :)
Post a Comment