" حد عايز 40 دبوس تحجيبة بجنيه ؟ 4 دبابيس طرحه بنص جنيه ؟ حد عايز بكر خيط ؟ ابر خياطة ؟ أساتك ؟؟ حد عايز ؟؟ "
" حد عايز شرابات محجبات ؟؟ شرابات حنة ؟؟شرابات منقوشة ؟؟ "
" معايا توكة حلوة بجنيه ، معايا شنطة مكياج بجنيه ، معايا بنس شعر بنص جنيه "
" حد عايز هنا البلي الى بيكبر في الميه ؟؟ حد عايز الحيوانات الى بتكبر في الميه ؟؟ "
" معايا قلم كحل أسود طبي طري "
" حد عايز هنا يا جماعة خواتم ألماز ؟ "
" حد عايز يشجع اللعبة الحلوة يا ولاد .. حد عايز يشترى منى نعناع و لبان ؟؟ "
" معايا مبرد للضوافر و مبرد للكعب تستعمليه بعد ما تنقعى رجليكي فى الميه الدافيه .. حد عايز ؟ "
" أيوة الفوط .. معايا فوط بكل الألوان و الاحجام .. قطن ميه فى الميه يا مدام ..حد عايز ؟ "
" معايا مقشرة البطاطس بتاعت المطبخ و فى نفس الوقت قطاعه .. من الناحية دى تقشري و من الناحيه دى تقطعى .. و باتنين جنيه بس .. حد هنا عايز ؟؟ "
" حد عايز مكنة الخياطة الى زي الدباسة .. تاخديها معاكى فى الشنطة و تنفع للجلود ؟ "
" معايا كتب فيها أحلى الوصفات للمطبخ و كتب تلوين للأطفال هنا حد عايز ؟ "
" حد عايز هنا يا جماعه كرت شحن فودافون أو موبينيل بعشرة ؟؟ "
" حد عايز يشترى فرش اسنان ؟ "
" معايا هنا مساحيق تنظيف اجنبية .. تنظف بقع الزيت و الشحم و تخلى اللبس نظيف "
" حد عايز صواريخ اعياد الميلاد و راس السنة العشرة بجنيه ؟ "
" معايا هنا غطا غسالة بعشرة جنيه ، معايا غطا انبوبة البوتاجاز ملون بعشرة جنيه، معايا مفارش سفرة و مفارش سرير بعشرين جنيه "
" معايا هنا البدي الاستريتش على كل الألوانات يلبس جميع المقاسات معايا المخطط و المنقوش و الساده "
" سلامو عليكو يا جماعة .. بالصلاه ع النبي كده احنا ستات و بنات زي بعضينا و محدش يتكسف .. حد هنا عايز قمصان نوم و ملابس داخلية حريمي ؟؟ "
لا حضرتك فهمت غلط .. دى مش وكالة البلح ولا حتى سوق التلات ، ولا سوق الخميس ولا سوق الجمعة ولا الاحد - و الاتنين بيبقى أجازة الحلاقين طبعا - ولا حتى سوق السيارات الى عندنا في مدينة نصر .. اطلااااااااااااااااااااقا
ده كانت لقطة مصغرة حية لعربية السيدات فى مترو الانفاق :)
أيون .. بس طبعا المشهد السابق ده كان باستثناء القاء الضوء على فئة الشحاتين الى فى المترو من أصحاب العاهات المختلفة الحميدة منها و المعدية " زى الى عندهم جزام مثلا " .. و ده علشان لو كنا عرضنا لقطة كاملة للتفاعل الحيوي فى عربية السيدات كده ما بين الركاب المتزاحمين و البائعات على مختلف الاعمار الى بيسلكو طريقهم بين الاجساد المتلاصقه فى عز زحمة المترو ساعة الذروة و بين الشحاتين على مختلف أطوالهم و اعمارهم رجالة و ستات و الى بتحاول الستات تفادى الارتطام بهم خاصه اذا كانو من الرجال البالغين كانت العملية حتبقى مزحومة أوى
و لو كنا كمان حطينا كمالة الصورة بقى خناقات الشحاتين مع بعض .. و خناقات الستات مع بعض .. و خناقات طلاب المدارس و الفاظهم البذيئة من الصبية الذكور الى بيركبو غلاسة فى عربية السيدات .. و عربدة أولاد الشوارع من الشباب الى بيركبو فرده و بلطجه جوه نفس العربية برضه .. فمتهيألى كده الصورة كانت حتبقى سكالنس خالص :S
على أية حال هو ده كان واقع عربيتين السيدات فى مترو الانفاق قبل بداية الفصل الدراسي الثاني .. و الى كان كفيل بأن أى واحده بتجهز .. كل الى عليها انها تقعدلها فى المترو بتاع اسبوع كده و هى حتطلع مشتريه العفش شخصيا من جوه !!
حد حيتكرم و يسألنى اشمعنى التوقيت ده بالذات ؟
حقوله علشان من بداية الفصل الدراسي الثاني و قد شهد المترو تغيرا جذريا أيها المواطن الكريم
ازاى ؟
حقولك حاضر
بص يا سيدي
المترو اتطور تطور مذهل .. و ده تم على سياقات مختلفة
فى فئات اندثرت تماما زى البياعين و الشحاتين من عربية السيدات ، و فى فئات بيحاولوا القضاء عليها زى الصبيان طلاب المدارس و الشباب من سن 14 سنة الى بيركبوا غلاسه فى العربية و احيانا بحجه انهم مع امهاتهم !!! ..برضه يدخل ضمن الفئة دى حبة الشحطة الى بيركبوا مع الستات و لما تقولهم يركبو عربية الرجالة صوتهم يجيب السلوم ولا اما تكون طعنتهم بخنجر مسنون فى أعز ما يملكو !!!
و لسه فى فئة هما مش قادرين عليها و هى فئة أبناء الشوارع من المشردين و يمكن المسجلين كمان الى راكبين بلطجة
ده مش بس كده .. ده فى تطور على سياق موازى كمان .. و هو في الحقيقة سياق ايجابي جدا و انا شخصيا مزأططه منه ع الآخر .. موضوع الاعلان و التوعيه بأبواب الصعود و النزول .. و انهم موقفين أمن على الابواب علشان الناس تلتزم و تتبع التعليمات .. و مبسوطة جدا من الاستجابه الرائعه الى فى عربيات السيدات للموضوع ده و الى يمكن تصل لنسبة 95% .. لدرجة ان دلوقتى الناس بقت بتقول لبعضها من غير أمن ولا حاجه و بتوعى المخالفين للتعليمات و بتزعق كمان للى بتصر على عدم الالتزام ! :)
بالمناسبة دى يا جماعه من فضلكم ابقو اشكرو أفراد الأمن الى واقفين على البيبان فى كل محطة و بيستحملو سخافات كتير من بعض الناس .. بجد هما بيتعبو أوى و فى الاخر حتلاقو مرتباتهم فى الارض .. حسسوهم بتقديركم لقيمة الى هما بيعملوه .. ارفعو من معنوياتهم .. الكملة معاهم حتفرق للأحسن صدقونى .. حيبقو حاسين انهم فعلا بيقومو بدور ايجابي و حيحبو شغلهم .. و حتحسسوهم ان ليهم قيمة و ان ليهم كيان مش تماثيل واقفين ولا حد معبرهم الا لو رمالهم كلمة سخيفة
الواحد مننا بحيب الناس تقدره و تقدر الى بيعمله و خاصه لو كان الى بيعمله ده بينفع الناس .. الكلمة يمكن ما تفرقش معاكم بس صدقونى حتفرق معاهم أوى .. و مش حتتخيلو احساسكم ايه لما تشوفو الابتسامة الى بتترسم على وجوههم لما بيسمعو كلمة " شكرا على الى انتو بتعملوه علشانا " .
نرجع تانى لتطور سياقات المترو .. عندنا سياق كمان تشهده محطة رمسيس الى هي " حسنى مبارك " فى المترو و هو عدم الاعتراف بآدمية المواطنين أخيرا بشكل صريح .. و ازالة كل المقاعد الموجوده على رصيف القطار علشان المواطنين المهلوكين من الشقى و السعى على رزقهم و الغلب الى عايشينه و الحر الى ضارب دماغهم ما يلاقوش كرسي يرتاحو عليه لحاد ما المترو يجي .. و يفضلو كده مصلوبين مستنيين الفرج .. و ده طبعا علشان المواطن يتعلم قيم الصبر و التحمل و الجلد و ما يبقاش مواطن متدلع كده و ما يسدش فى الازمات .. بس حقولك ايه يا مواطن و انت البعيد لا بتفهم و لا بتقدر ان كل الى بيحصل ده " من أجلك أنت " !!
وبما اننا بنتكلم عن التطور فطبيعي يعنى التطور ده مش حيقتصر بس على الحكومة و سياساتها .. اطلاقا .. فى تطور موازى فيما يخص الركاب كمان .. اصلها حتبقى وحشه أوى فى حق النفر مننا ان العالم كله من حواليه بيشرب بايب و هو لسه بيضرب سيجارة بنى !!
ده يعني ايه ؟
ده يا سيدي يعنى انك دلوقتى بالصلاة ع النبي تدخل المترو فتلاقى ان الشرايح الى قلنا انها اندثرت من المترو فوق دى .. بيتم استبدالها بكائنات جديدة نوفى بقى .. بتتمتع بوسائل و آليات متطورة و منسجمة مع عصر التكنولوجيا الى احنا فيه ده
أحدث مثال كان انبارح آه و ربنا و كان نصه الآتي " بس الهى ربنا يسترك تركز كويس فى الموقف علشان انا حطلب منك استشارة فى الآخر "
الموقف هو :
التوقيت : الساعه 9 و نص مساء " كنا لسه مخلصين محاضرة د/ سيف "
المكان : عربة السيدات الأولى فى المترو
الموقف : بنت شابه عندها ما يقرب من 26 سنة ممشوقة القوام محجبه حجاب الى حد كبير ابن ناس و محترم ، لابسة تونيك طويل للأرض واسع و تحته بنطلون .. شكلها محترم و طبيعي جدا
اتقفلت بوابات المترو و بدأ يتحرك بينا .. و فجأة على صوت البنت دى بما نصه التالى :
" يا جماعه لو سمحتو ركزو معايا شوية عايزة أقولكم حاجه .. الى فيكم يا بنات عايزة تشتغل تكتب الرقم ده 017.... "
العربية كلها تنحت ناحيتها لأن دى اول مرة تحصل حاجه كده .. قامت البنت مكررة نفس كلامها السابق ده بنصه تانى بعلو صوتها
و سكتت
أنا لقيت ناس فعلا بتكتب الرقم وراها .. بصيت لسحر " من أعز الناس الى اتعرفت عليهم من الكلية " و قلتلها لا مش حنسكت طبعا .. الموقف ده مريب جدا
قمت انا كمان بعلو صوتى سألتها و دار بيننا الحوار التالى مع متابعه جاده من قبل الركاب
أنا : هى ايه الشغلانه بالظبط ؟
هي : علاقات عامة
أنا : ده فين ؟
هي : شركة
أنا : الشركة دى اسمها ايه ؟
هي : اسمها شركة ناس ( و قامت بتهجى حروفها بالانجليزية )
أنا : و فين الشركة دى ؟
هي : فى فيصل
انا : الشركة دى بتنتج ايه بالظبط ؟
هي : .....
واحده من الركاب : و الشغل على كده متعب فى الشركة ولا كويس ؟
هي : لأ الشغل هناك مريح راحه .. مريح ع الآآآآآآآآآآخر
انا : و المرتب كام ؟
هي : بيبدأ من 1000 و بيطلع بعد كده
واحده من الركاب : و عايزين مؤهلات ايه ؟
هي : لأ .. أى مؤهلات
واحده من الركاب : و ده ينفع شباب كمان ؟
هي : لأ بنات بس
سألوها عن شغلها هناك ايه و هى جاوبت بس للأسف ما سمعتش من دوشة المترو .. و سألوها عن مرتبها و برضه ما سمعتش للأسف و ان كنت استشفيت انه ما يقرب من 8000 لان الناس كانت مذهولة جدا و بيقولو طيب كويس ده المرتب كبير
محطة كمان كررت فيها البنت نفس الكلام تانى مع تجمهر عددد لا بأس به من الشابات حولها لمعرفة التفاصيل .. و بعدين المحطة الى بعدها نزلت من المترو و سابتنا
انقسم المترو لقسمين .ز ناس مصدقة و واخده الموضوع جد و سجلت النمرة .. و ناس بتشك فى الموضوع و بتقول لا طبعا دى اكيد وراها مصيبة مسيحة عمرنا ما شفنا شغلانة يعلنو عنها فى المترو و بالمرتب ده و بنات بس
انا طلبت من واحده من الى سجلت الرقم انى آخد الرقم
اديتهولى .. وسألتنى ليه ؟ انت حتشتغلى ؟
قلنالها انا و سحر : لأ طبعا احنا حنتحرى و نبلغ
دلوقتى الرقم معايا .. و انا شاكة بنسبة كبيرة جدا ان الشغلانه دى كمين لاستدراج الفتيات .. تفتكروا المفروض أعمل ايه دلوقتى ؟؟
عايزة أسمع رأيكم .. اتصل بيهم الأول و اشوف الموضوع ايه .. و لو طلع فى حاجه مش مظبوطة ابلغ ؟ ولا أبلغ على طول ؟ و لا ايه العمل ؟؟
ماذا تفعل لو كنت مكانى ؟؟ فى تلك اللعنة الخاصه بمترو الانفاق ؟؟
