نظرة عينك

كنت شوية مكتئبة و باكلم أعز اصدقائى منذ الطفولة البريئة :D

فبعتتلى لينك اغنيه من اليو تيوب .. عجبتنى و طلعتنى شوية من الحالة الى كنت فيها

حبيت اسمعهالكم معايا :)

شكرا يا ميرو :)

و ناويه على ايه ؟؟

رن جرس الهاتف .. فتناولت " سماعة التليفون " من صالون بيتنا العزيز لأجد ذلك الصوت الباسم الحانى لخالة والدتى يستقبلنى بالترحاب كعادته .. و دار الحوار التالى :


هي : ازيك ياااااا......

انا مسعفة لذاكرتها : هبه :)

هي : أيـــــــوة ، ازيك يا هبه ؟؟ عامله ايه يا حبيبي ؟
" دايما بتقولى يا حبيبي - بصيغة المذكر - مش عارفه ليه :D "

انا : الحمد لله يا خالتو بخير :)

هي : و ايه اخبار الكلية ؟ اخر سنة السنة دى مش كده ؟؟

انا ممازحة اياها : لأ .. اخر " تيرم " من فضلك :D

هي ضاحكة : ربنا يوفقك و تكملي على خير

انا : يا رب .. ربنا يكرمك

هي : و ناوية على ايه بعد كده ؟؟

انا : حكمل دراسات عليا باذن الله

هي بصوت تغير فجأة الى صوت حازم و صارم للغاية :

لأ

دراسات عليا لأ

ملهاش لازمة .. تعب و وجع دماغ ع الفاضى و بعدين " ما معناه بتبوظ الفكر " .. محدش حيملى عينك بعد كده .. لما يتقدملك حد حتستتفهى عقله .. و حتحسى ان مفيش حد مناسب ..

انا : :)

هي مستكملة حديثها : ايوة .. اصل الى حيتقدملك .. حتقولى لا ده مش مكمل دراسات .. لا ده مش عارفه عامل ايه .. و مش حتحسى ان فى حد مستواه مناسب

انا : :) :)

هي بانفعال شديد : و بعدين انت حتخلصى و حتنسى نفسك ، حتعملى دبلومة .. و بعدين لما تلاقى نفسك اخدتيها حتقولى طب اعمل الماجستير .. تاخدي الماجستير تقولى فاضل سنتين على الدكتوراه .. و حتفضلى بالمنظر ده لحاد ما نلاقيكي عنستى فى الاخر

فى هذه اللحظة تمالكت نفسى من الانفجار فى الضحك بأعجوبة شديده جدا

هي مواصلة حديثها : لا يا حبيبي دراسات عليا لأ .. تشتغلى معيدة ماشى .. اى شغالنه محترمة مفيش مشكلة .. انما الدراسات و الكلام ده .. لأ مش بتاعنا .. انت عارفه احنا وظيفتنا ايه فى الدنيا دى .. انه يتقالنا يا ماما .. ولا ايه ؟؟

انا : صح .. كلام حضرتك تمام :)

انهت مكالمتها معي بالدعاء لى مرة أخرى و السؤال على احوال اختى و ابى و طلبت منى ان اعطي الهاتف لامى

انتهت مكاملتى معاها على كده .. بس فى الحقيقة فضلت تتكرر جوايا كتير اوى

شد انتباهي اوى ربطها بين المستوى العلمى و العنوسة

يمكن هى اول واحده قابلتها عملت الربط ده بشكل مفصل كده :)

كلامها بالرغم من بساطته و انطلاقه من خوفها على من انى " أعنس " على الرغم من عدم تجاوزى العشرين من عمرى بعد .. الا انى شايفاه مهم جدا و لازم يتوقف عنده بالتفكير شوية




نظرة متفحصه :)




بعد ما خلص الحوار بتاعى معاها لقيت نفسى بسأل السؤال ده : هل فعلا فى علاقة بين رقى المستوى العلمى و العنوسة ؟؟ يعنى هل فعلا الكلام الى خالتو قالته ده بيحصل بنفس التصور الى هي شايفاه كده ؟؟ ولا فى رؤية مختلفه ؟؟

بعد تفكير لا بأس به وصلت للاتى :

هى كلامها الى حد كبير جدا مضبوط فيما يخص ان الرقى فى المستوى العلمى حيأثر على رؤيتي للاشخاص خاصه لو كان " حد متقدملى " زى ما هى قالت

بس الفكرة ان ده مش حيكون - من وجهة نظرى الشخصيه - من منطلق " استتفاه العقول " او الاستخفاف بها على حد تعبيرها

الفكرة و ما فيها هى ان بارتفاع المستوى العلمى للفرد بتوسع مدركاته .. و بيتبلور فكره .. بيبدأ يحط خطوط محدده لاشكال كتير فى حياته ما كانش باينلها منظر فى مراحل سابقه .. بيقدر يحكم و يتفاعل مع العالم من حوله بشكل اكثر عقلانيه و اكثر حكمه و بنظرة فاحصه عن كونها نظرة عابرة و السلام

يعنى التفكير فى نفس الاشياء و بخصوص نفس الموضوعات بيختلف من حيث الرؤية المتعلقه بالشخص و ده نظرا لاختلاف مستوى العلم الحاصل عليه هذا الشخص


فبالتالى حيبقى عندى قدرة اكبر على انى احكم على الناس الى " بيتقدمولى " بشكل انسانى اكتر منه شكل علمى او اكاديمي .. يعنى الموضوع معايا مش حيبقى الحكم على الفرد بشهاداته العلمية الى واخدها و معلقها عنده فى البيت زى ما خالتو فاكره .. بس الموضوع حيبقى بمستوى الاضافه الى ضافتها له الشهادات دى حتى لو كان حاصل بس على البكالوريوس او الليسانس




الوظيفة الأمومية



فيما يخص بقى الوظيفة الأمومية ..

لو حبيت تجاوزا اعتبر الامومة " وظيفة " من وظائف المرأة على مستوى العالم

و لو جيت اتكلم بلغة علم الادارة

فهل يا ترى حيكون فى علاقة بين رقى المستوى العلمى و تحسين الاداء الخاص بتلك الوظيفة ؟؟

حقيقى مش عارفه تحديدا الموقف ايه .. بس شفت امهات مش معاهم دراسات ولا حاجه و يضرب بيهم المثل فى اداء دورهم الطبيعي كأمهات لابنائهم ... بشكل يحسدهم عليه الكثيرات من الحاصلات على اعلى الدرجات العلمية

و شفت برضه امهات حاصلات على درجات علمية متقدمة جدا و لم ينعكس هذا الرقى العلمى على المستوى التطبيقي فى دورهم الاساسى كأمهات و مربيات

و العكس صحيح أيضا فى كل من الحالتين

متهيألى ان ده بيرجع لعوامل تانيه خالص غير المستوى العلمى و الى بيساهم بدرجه لا يمكن تجاهلها فى كون المرأة قادرة على ان تكون أم تسعى للمثاليه فعلا ولا لأ ..

يعنى التنشأة الاجتماعيه مهمه جدا .. الخلفيات المتنوعة الى تم زرعها فى شخصية الأم برضه مهمه جدا .. الخبرات المختلفه الى بتتعرضلها الام اكيد بتأثر بدرجه كبيرة .. الجانب الجزء الخاص بطبيعه النفس البشرية الخاصه بالام نفسها دى برضه لا تقل اهميه اطلاقا عن العوامل السابقه ..

فى الاخر يجي دور العلم الى تلقته الام على مدار سنوات عمرها المختلفه .. و الى حيتم توظيفه وفقا لكل العوامل السابقه و تكييفه و استخدامه و الى فى الاخر بيبلور نموذج لأم ينعكس فى تصرفاتها كل ما يبق ذكره




م الأخر




الواحد لما ياخد دراسات عليا و يتقدمله حد حيكون بيدور ساعتها على مواصفات معينه " مش من منطلق كم الورق الى مع المأسوف على شبابه و لا الشهادات الى محوشها على الحيطة فى بيتهم " و لكن حيكون بيحاول يلاقى في وسط عشرات البنى ادميين الى " ممكن ييجو " .. على واحد لا يقتصر فقط على توافر صفة الذكورة به .. و لكن بيسعي انه يلاقى زوج تتوافر فيه مواصفات الرجولة و الانسانيه " يعنى يكون راجل انسان " و التى تعتبر بدورها مواصفات صعبه شوية انه يلاقيها فى الزمن ده .. و ده نظرا لان النوعيه الى موجوده و مغرقه السوق اليومين دول معظمها عادة بتكون تايوانى مضروب.. و الواحد بيسعى للاسف للارتباط بواحد كده صناعه اصليه اصيلة بنت ناس يتطمن معاها باقى سنين عمره

بس فى حالة لا قدر الله انى ما عترتش فى الكاتيجورى ده فساعتها مش حكون عانس زى ما خالتو قالت .. اطلاااااااااااااقا .. ساعتها حبقى و بكل فخر .. قررت أن اكون عانس :)

شخابيط :)

كنت قاعده متضايقة شوية و ماسكة زى العاده ورقة و قلم .. فكان النتاج كالتالى :)


" اضغط على الصور للتكبير "



































و العاقبة عندكم فى المسرات :D

أخيرا خدمة الدى اس ال وصلت من جديد بعد انقطاع دام 3 شهور و شوية


و الحمد لله


و حسبى الله و نعم الوكيل :D

الى أخى الذى لم أرزق به .. لم أنم !!

الى أخى الذى لم أرزق به


الى من شهدت له أختى بحسن الخلق و الشهامة من لقاء دام لمدة 10 دقائق فقط " و دى شهادة مش بالساهل يعنى :) "


الى الأمل القادم مع النيل


الى " حنظلة " .. كتبت لتاريخ 31 /1 /2009



" مش لاقياله صورة عدله .. حلوة دى أوى : ) "



لم أنم البارحة قبل أن ادعو لك بالثلث الأخير بما فتح الله على به .. فقد كنت أشعر بأن دموعى تخنقنى ..


نعم .. أحسست بتأنيب ضمير قاس .. أدركت عظمة التوصية النبوية " لا تغضب " .. بعدما وصلت لبيتي .. و قصصت ما حدث على أختى .. أكدت لى على خطأى فى توجيه اللوم اليك ..

أعلم ان ما حدث كان خارجا عن ارادتك .. و أعلم انك قدمت من الاعذار ما يكفى .. كما أعلم ان ثورة غضبى طغت على التفكير المنطقى فيما حدث ..

أخى الفاضل .. لم تكن مخطأ على الاطلاق .. تصرفت كما ينبغى ان يتصرف من فى مثل خلقك و من وهب قيمك الاصيلة ..

من أخطأ فى حقك انا .. فأرجو المعذرة .. أرجو المسامحة .. فان فعل الظلم له من الاثر فى النفس ما يكفى لان يكدر صفو حياة المرء بأكملها و ان يقلب موازينها رأسا على عقب

كتبت تلك الكلمات .. ليشهد الجميع على نبل خلقك

لتعلم انى لم أجد حينها شيئا لاعتذر لك به سوى دعائى فى الثلث الاخير

لأؤكد على ما قلته سابقا


" حفتك بركات ملء السماء و الأرض "


:)

قاعدة مفاهيمية فى السريع !!

السلام عليكم جميعا .. كيف أحوال الامتحانات معاكم ؟؟ يا رب يكون الكل كويسين و بيأدوا بشكل محترم فى امتحاناتهم .. مش بس علشان نفسهم .. ولا علشان أهاليهم .. أو حتى علشان غزة .. لأ .. ده علشان الأمة كلها .. يمكن يكون فى واحد مننا هو الى حيكون سبب نصرةالأمة فى المستقبل .. مين عارف ؟!! كل الى علينا العمل و الاستعانة بالله . طيب هو بالرغم من انى مش شايفة قدامى تقريبا من فعصة الامتحانات الى الواحد فيها .. بس الى حصل الايام الى فاتت .. و الى اتوقع انه حيتعاد تانى فى فترة قريبة .. و الى لسه اثاره موجوده لحاد اللحظة دى .. كان لازم اقف عنده شوية .. خاصه ان السيناريو مكرر بشكل واااااااااااااااضح جدا .. و الى واضح معاه كمان ان فى حاجه غلط بحيث ان كل مرة بيتعاد نفس السيناريو بكل تفاصيله بل و أشد و محدش بيتعلم حاجه ..

طيب خلينا نشوف كده فى ايه ..

بداية التدوينة دى اتكتبت لسببين اساسيين هما : أولا : انها تفسير لمغزى التدوينة الى فاتت .. لانى لما كتبتها لقيت فى تعقيبات واضح منها ان مغزى التدوينة ما وصلهاش بشكل سليم .. و خاصه تعقيب عمرو عليها فى الفيس بوك

السبب التانى بقى : هى ان التدوينة دى تمهيد للتدوينة الى جايه باذن الله .. بس علشان لما التدوينة الى جايه تتكتب ما نضربش بعض فى التعقيبات بسبب اختلافنا على المفاهيم المستخدمة :)

طيب


خلينا نبدأ بالقاعدة الاولى :

التدوينة الى فاتت لما اتكلمت عن مفهوم المواجهة .. و الحرب .. و الفرق بينهم و بين الاعتداء و الابادة .. كان المهم عندى حاجه معينة .. هى توضيح ان كل من فعلى المواجهة و الحرب يتطلب طرفين فاعلين .. يعنى المواجهة تتقال لما يكون عندى طرفين متقابلين بيشاركو فى نفس الفعل بخصوص قضيه معينة فى توقيت محدد

نفس القصه فيما يخص مفهوم الحرب .. لما يبقى فى طرفين الى حد كبير متكافئين لكل طرف القدرة على الرد على الطرف الاخر .. فى الحالة دى ممكن اسمى الى بيحصل حرب


الفكرة بقى .. ان تحوير المفاهيم ده خطير جدا .. خاصه لما تلاقيه بيستخدم على نطق واسعه جدا و من ناس المفروض انهم فاهمين هما بيقولو ايه ..

يعنى استغربت جدا ان فى قمة الدوحة لقيتهم بيقولو على الى بيحصل فى غزة انها حرب غير متكافئة !!!! .. هما ازاى شافوا ان الى بيحصل ده اصلا ممكن يتقال عليه حرب من اى ناحية !! حتى لو كانوا بيوصفوها بانها غير متكافئة .. بس هى لاتزال تفتقد العناصر الاساسية الى بها ينطبق لفظ حرب على الى بيحصل ..


الاغرب بقى كمان ، و الأهم بالنسبالى جدا فى الموضوع ده .. الى بيحصل فى المظاهرات عندنا .. لما يقولك ان الى حصل من ضرب و رزع و بهدلة اسمه " مواجهات " بين الامن و المتظاهرين !!!

ازاى و برضه اركان المفهوم لم تكتمل علشان يتسمى مواجهه ؟؟ اذا كان الفعل بيتم من طرف واحد بس !!

حاجه كانت ريم قالتها على الفيس بوك كانت مهمة بالنسبالى قالت : " اولا لما تقري في مكان معين ان المواجهات كانت عنيفه جدا بين قوات الامن و المتظاهرين يبقى معناه ان يا حرام قوات الامن عانت و تعبت من كتر ما ضربت المتظاهرين ورغم كده هما لسه بيتظاهرواااا "

السؤال هنا .. هما ليه لسه بيتظاهروا ؟؟؟ و ليه لسه متبعين نفس الوسيلة فى التظاهر ؟؟؟ طيب ده بيخلينى اسأل سؤال اعمق شوية .. هو ايه مفهوم الناس عن كلمة تظاهر اصلا ؟؟

تعقيب دكتورة نغم على الفيس بوك برضه كان فى اضافه مهمة جدا لما قالت : " المواجهة : مواجهة أي اثنان ـ و أكثر وجههم لبعض يعني المتظاهرين لم يعطوا الامن قفى وكفى .. بل استمروا في الوقوف في وشهم وهم مصابين بالبله المغولي المعدي "


الى يهمنى قوى فى الحتة الى فاتت هما الكلمتين دول : ( ان المتظاهرين استمروا في الوقوف في وش الامن وهم " المتظاهرين يعنى كما فهمت او كما اريد ان افهم " مصابين بالبله المغولي المعدي ")

طيب عندى سؤال كابس على نفسى بقاله كتير اوى ..

بعد كل الى بشوفه من المظاهرات الى بتقوم فى مصر و بالمتابعه الدقيقه لكل تفاصيلها .. سؤالى هو : " هو ايه الى الناس بتبقى عايزاه من ورا فعل التظاهر ده ؟؟ "

السؤال بطريقه تانيه : " ايه هدف المتظاهرين من المظاهرات الى بيقوموا بيها فى الاخر ؟؟؟ "

طيب حد فكر قبل كده ان المظاهرات الى الناس بتقوم بيها هى جزء من مسرحية تسييس و تغييب و احتواء الغضب الشعبى " ده لو اعتبرته غضب حقيقي فعلا " ؟؟؟


الكملتين الى ايهاب قالهم فى تعقيبه على التدوينة الى فاتت على الفيس بوك كان فيهم حكم الصراحه بخصوص الموضوع ده .. قال : " الخلاصة : المواجهة ............ بنهرب منها ، الاعتداء .............. بيحصل علينا ، الحرب................. بنخاف منها ، الابادة ............... لما بنفشل في المراحل التلاته "




القاعدة الثانية

حد ممكن يقولى الى فهمه من الجملة الى قالتها ليفنى فى بدايه الابادة الجماعيه لما قالت بكل حزم و وضوح الصراحة الجملتين الى جايين دول :
Hamas must understand enough is enough

الجملة دى باعتبرها جملة محترمة سياسيا جدا .. ولو انى لو كنت مكانها كنت قلتها بشكل مختلف شوية

The world must understand enough is enough

حد فهم بعد الكلام ده ايه المغزى الى كانت عايزة توصلهولنا ليفنى من جملتها دى ؟؟

من وجهة نظرى هى ما كانتش بتكلم حماس من اصله .. الكلام كان لكل الجمهور الشعبى الخاص بالعالم الاسلامى عامة و العربى خاصة باستثناء حماس

متهيألى ان لو كان حد فهم معنى الى قالته ما كانش حتتعمل مبادرات وقف اطلاق نار .. و لا قمم معرفش ايه فين .. لانها قالتها بصراحه


Enough is ENOUGH


بتهذوا ف ايه بقى ؟؟ ما قالت كفايه


كنت حاساها بتقولنا : لقد اصابنا من السأم و الاعياء ما يكفى من خنوعكم .. " م الاخر يوم ما يبقى فيكو راجل ابقو تعالو كلمونا " .



القاعدة الثالثة و الاخيرة


نظرية الادوار مهمة أوى فى السياق الشعبى المظاهراتى المصرى الى الناس مش عايزة تفهمه أو فاهماه و بتستعبط و مش عايزة تواجه نفسها لان المواجهة حيبقى فيها كلام كتير و حتفضح كل بنى ادم قدام نفسه و قدام الى حواليه كلهم و حاجات تانيه كتير كده

المهم .. النظرية بتطرح سؤال مهم أوى الى هو :

هو حد ينفع يوصل الدور الثالث فى العمارة من غير ما يعدى على التانى ؟؟؟

فى حالة الاجابة بـ " لا " .. ممكن تقولى طيب امال انتو بتهتفوا لغزة ليه و قايمين بمظاهرات و الامن لسه محاوطكم من كل ناحية و مش قادرين حتى توصلوا بالمظاهرة فى قلب الشارع ؟؟

مممممممم .. طيب ممكن تقولى غزة ايه الى انتو عايزين تنصفوها و حتنصفوها ازاى و انتو لسه ما عديتوش الحاجز الامنى قدام نقابة الصحفيين ؟؟

فى تعقيب
simplicity
حدفتهولى المرة الى فاتت هنا .. كان بيقول : " كلنا حاسين باللي انتي بتقولي عليه الضرب هنا قبل هناك " و لو انها كانت تقصد حاجه تانيه خالص غير الى انا قاصداه دلوقتى .. بس جملتها الخاصه بالضرب هنا قبل هناك دى مهمة بالنسبالى من منظور تانى .. الى اقصده منها ان الدور الاول هنا لازم تعدوا عليه قبل ما نوصل للدور التانى هناك فى غزة
طيب ده بس الى كان فى نفسى لحاد ما التدوينة الجاية تنزل باذن الله .. منتظرة تعقيباتكم .. و دعواتكم لينا و لغزة الى بالمناسبة لسه بتقصف و للامة كلها

ملحوظة : فضلا قبل الشروع فى كتابه التعقيب فضلا انظر هنا أولا

اجاباتكو يا ولاد الحلال

محتاجه منكو اجابات بالى انتو شايفينه و بكل الى فى نفسكو و فى خلفياتكو المعرفية و خبراتكو الاجتماعية .. الخ عن السؤالين الى تحت دول .. بس خدوا حكاية الاجابة دى جد ربنا ما يوقعكو فى ضيقه علشان الموضوع بدأ يجيبلى ارتكارية حادة و حاسة كده ان فى مفاهيم اتضربت فى الخلاط مع بعض عند ناس كتير مع انها ما تنفعش تتحط مع بعضشيها كده و خلاص .. و الناس مش واخده بالها و بتتعامل عاتشى يعنى

لما تقرأ فى احدى الصفحات جملة زى : " و قد كانت المواجهات بين قوات الامن و صفوف المتظاهرين عنيفة مما ادى الى ... "

ممكن لو سمحت تقولى بس ايه تعريف سيادتك لمفهوم المواجهة ؟؟

و لو ممكن يعنى ايه الفرق بين المواجهه و الاعتداء ؟؟


طيب و لما تقرأ فى حته تانيه بقى خاااااااااااااالص حاجه من نوعية : " و قد صرح مش عارف مين بان الحرب فى فلسطين لن تنتهى الا بالتزام الاطراف المعنية بالمشعارف ايه كده "

معلش يا باشموهندس انا عارفه انى تقلت عليك و الله .. بس لو تسمح يعنى بالمرة تقولى تعريف جنابك ايه لمفهوم الحرب ؟؟

و الفرق كمان بعد اذنك بين الحرب و الاباده ؟؟


منتظرة اجاباتكم جميعا .. و ما نجيلكوش فى حاجه وحشه !!!