رن جرس الهاتف .. فتناولت " سماعة التليفون " من صالون بيتنا العزيز لأجد ذلك الصوت الباسم الحانى لخالة والدتى يستقبلنى بالترحاب كعادته .. و دار الحوار التالى :
هي : ازيك ياااااا......
انا مسعفة لذاكرتها : هبه :)
هي : أيـــــــوة ، ازيك يا هبه ؟؟ عامله ايه يا حبيبي ؟
" دايما بتقولى يا حبيبي - بصيغة المذكر - مش عارفه ليه :D "
انا : الحمد لله يا خالتو بخير :)
هي : و ايه اخبار الكلية ؟ اخر سنة السنة دى مش كده ؟؟
انا ممازحة اياها : لأ .. اخر " تيرم " من فضلك :D
هي ضاحكة : ربنا يوفقك و تكملي على خير
انا : يا رب .. ربنا يكرمك
هي : و ناوية على ايه بعد كده ؟؟
انا : حكمل دراسات عليا باذن الله
هي بصوت تغير فجأة الى صوت حازم و صارم للغاية :
لأ
دراسات عليا لأ
ملهاش لازمة .. تعب و وجع دماغ ع الفاضى و بعدين " ما معناه بتبوظ الفكر " .. محدش حيملى عينك بعد كده .. لما يتقدملك حد حتستتفهى عقله .. و حتحسى ان مفيش حد مناسب ..
انا : :)
هي مستكملة حديثها : ايوة .. اصل الى حيتقدملك .. حتقولى لا ده مش مكمل دراسات .. لا ده مش عارفه عامل ايه .. و مش حتحسى ان فى حد مستواه مناسب
انا : :) :)
هي بانفعال شديد : و بعدين انت حتخلصى و حتنسى نفسك ، حتعملى دبلومة .. و بعدين لما تلاقى نفسك اخدتيها حتقولى طب اعمل الماجستير .. تاخدي الماجستير تقولى فاضل سنتين على الدكتوراه .. و حتفضلى بالمنظر ده لحاد ما نلاقيكي عنستى فى الاخر
فى هذه اللحظة تمالكت نفسى من الانفجار فى الضحك بأعجوبة شديده جدا
هي مواصلة حديثها : لا يا حبيبي دراسات عليا لأ .. تشتغلى معيدة ماشى .. اى شغالنه محترمة مفيش مشكلة .. انما الدراسات و الكلام ده .. لأ مش بتاعنا .. انت عارفه احنا وظيفتنا ايه فى الدنيا دى .. انه يتقالنا يا ماما .. ولا ايه ؟؟
انا : صح .. كلام حضرتك تمام :)
انهت مكالمتها معي بالدعاء لى مرة أخرى و السؤال على احوال اختى و ابى و طلبت منى ان اعطي الهاتف لامى
انتهت مكاملتى معاها على كده .. بس فى الحقيقة فضلت تتكرر جوايا كتير اوى
شد انتباهي اوى ربطها بين المستوى العلمى و العنوسة
يمكن هى اول واحده قابلتها عملت الربط ده بشكل مفصل كده :)
كلامها بالرغم من بساطته و انطلاقه من خوفها على من انى " أعنس " على الرغم من عدم تجاوزى العشرين من عمرى بعد .. الا انى شايفاه مهم جدا و لازم يتوقف عنده بالتفكير شوية
نظرة متفحصه :)
بعد ما خلص الحوار بتاعى معاها لقيت نفسى بسأل السؤال ده : هل فعلا فى علاقة بين رقى المستوى العلمى و العنوسة ؟؟ يعنى هل فعلا الكلام الى خالتو قالته ده بيحصل بنفس التصور الى هي شايفاه كده ؟؟ ولا فى رؤية مختلفه ؟؟
بعد تفكير لا بأس به وصلت للاتى :
هى كلامها الى حد كبير جدا مضبوط فيما يخص ان الرقى فى المستوى العلمى حيأثر على رؤيتي للاشخاص خاصه لو كان " حد متقدملى " زى ما هى قالت
بس الفكرة ان ده مش حيكون - من وجهة نظرى الشخصيه - من منطلق " استتفاه العقول " او الاستخفاف بها على حد تعبيرها
الفكرة و ما فيها هى ان بارتفاع المستوى العلمى للفرد بتوسع مدركاته .. و بيتبلور فكره .. بيبدأ يحط خطوط محدده لاشكال كتير فى حياته ما كانش باينلها منظر فى مراحل سابقه .. بيقدر يحكم و يتفاعل مع العالم من حوله بشكل اكثر عقلانيه و اكثر حكمه و بنظرة فاحصه عن كونها نظرة عابرة و السلام
يعنى التفكير فى نفس الاشياء و بخصوص نفس الموضوعات بيختلف من حيث الرؤية المتعلقه بالشخص و ده نظرا لاختلاف مستوى العلم الحاصل عليه هذا الشخص
فبالتالى حيبقى عندى قدرة اكبر على انى احكم على الناس الى " بيتقدمولى " بشكل انسانى اكتر منه شكل علمى او اكاديمي .. يعنى الموضوع معايا مش حيبقى الحكم على الفرد بشهاداته العلمية الى واخدها و معلقها عنده فى البيت زى ما خالتو فاكره .. بس الموضوع حيبقى بمستوى الاضافه الى ضافتها له الشهادات دى حتى لو كان حاصل بس على البكالوريوس او الليسانس
الوظيفة الأمومية
فيما يخص بقى الوظيفة الأمومية ..
لو حبيت تجاوزا اعتبر الامومة " وظيفة " من وظائف المرأة على مستوى العالم
و لو جيت اتكلم بلغة علم الادارة
فهل يا ترى حيكون فى علاقة بين رقى المستوى العلمى و تحسين الاداء الخاص بتلك الوظيفة ؟؟
حقيقى مش عارفه تحديدا الموقف ايه .. بس شفت امهات مش معاهم دراسات ولا حاجه و يضرب بيهم المثل فى اداء دورهم الطبيعي كأمهات لابنائهم ... بشكل يحسدهم عليه الكثيرات من الحاصلات على اعلى الدرجات العلمية
و شفت برضه امهات حاصلات على درجات علمية متقدمة جدا و لم ينعكس هذا الرقى العلمى على المستوى التطبيقي فى دورهم الاساسى كأمهات و مربيات
و العكس صحيح أيضا فى كل من الحالتين
متهيألى ان ده بيرجع لعوامل تانيه خالص غير المستوى العلمى و الى بيساهم بدرجه لا يمكن تجاهلها فى كون المرأة قادرة على ان تكون أم تسعى للمثاليه فعلا ولا لأ ..
يعنى التنشأة الاجتماعيه مهمه جدا .. الخلفيات المتنوعة الى تم زرعها فى شخصية الأم برضه مهمه جدا .. الخبرات المختلفه الى بتتعرضلها الام اكيد بتأثر بدرجه كبيرة .. الجانب الجزء الخاص بطبيعه النفس البشرية الخاصه بالام نفسها دى برضه لا تقل اهميه اطلاقا عن العوامل السابقه ..
فى الاخر يجي دور العلم الى تلقته الام على مدار سنوات عمرها المختلفه .. و الى حيتم توظيفه وفقا لكل العوامل السابقه و تكييفه و استخدامه و الى فى الاخر بيبلور نموذج لأم ينعكس فى تصرفاتها كل ما يبق ذكره
م الأخر
الواحد لما ياخد دراسات عليا و يتقدمله حد حيكون بيدور ساعتها على مواصفات معينه " مش من منطلق كم الورق الى مع المأسوف على شبابه و لا الشهادات الى محوشها على الحيطة فى بيتهم " و لكن حيكون بيحاول يلاقى في وسط عشرات البنى ادميين الى " ممكن ييجو " .. على واحد لا يقتصر فقط على توافر صفة الذكورة به .. و لكن بيسعي انه يلاقى زوج تتوافر فيه مواصفات الرجولة و الانسانيه " يعنى يكون راجل انسان " و التى تعتبر بدورها مواصفات صعبه شوية انه يلاقيها فى الزمن ده .. و ده نظرا لان النوعيه الى موجوده و مغرقه السوق اليومين دول معظمها عادة بتكون تايوانى مضروب.. و الواحد بيسعى للاسف للارتباط بواحد كده صناعه اصليه اصيلة بنت ناس يتطمن معاها باقى سنين عمره
بس فى حالة لا قدر الله انى ما عترتش فى الكاتيجورى ده فساعتها مش حكون عانس زى ما خالتو قالت .. اطلاااااااااااااقا .. ساعتها حبقى و بكل فخر .. قررت أن اكون عانس :)
10 comments:
نيا ها ها ها
نيا ها ها ها
نيا ها ها ها
نيا ها ها ها
نيا ها ها ها
نيا ها ها ها
نيا ها ها ها
ليا تعليق اقولهولك لما ارجع
انا مليش تعليق
واحد
انا ليا مليون تعليق
عايزة اعلق على كل كلمة
ومن كتر الكلام اللى عايزة اناقشك فيه
مش عارفة اقول ايه
:D
الموضوع مثقل بنقط كتير
--
كنت بتكلم مرة مع خالتى بردو
بتقولى لا يا منى انتى بقيتي خريجة كلية اعلام خلاص
يعنى ماتاخديش اقل مم حد اقتصاد وسياسة او السن او اعلام او طب او هندسة
لكن تجارة واداب وحقوق وزراعة دي انسيهم خالص
:D
انا ساعتها بردو مكونتش قادرة امسك نفسي من الضحك
على اساس انى كلية خاصة يعني مش هقبل اقل من المجاميع دي :D
الموضوع مش بيتحدد كدة
فى ربط كبير بين مستوى الام ... اللى هى ممكن تكون محصلتش على شهادات كتير بس بيضرب بيهم المثل فى التربية والتنشأة وممكن غيرهم من يفوقهن تعليما يبقوا فاشلات فى العملية دي
وبين نقطة العريس اللى بشهادة عليا
او لا
اللى بيتحكم فى النقطتين هي تفتح الافق والعقل واستيعاب الحياة ماشية ازاى
واستيعابك انتى شخصيا
لو مشينا على كلام الخالات
جيبوا واحد معاه ماجيستير
بس لم يؤثر فى عقليته بشيء
انا شوفت ناس معاها دكتوراه ولسة مش فاهمين حاجات انا كنت فهماها ساعتها وكنت فى تانية كلية
وده مش شكر فى نفسي .. ده توضيح ان عقلهم كان فاضي فعلا
وفعلا بقي مادام احنا من الناس اللى مش بتأنتم قبل الجواز يبقي نوزن المواضيع بعقلنا لما ييجوا يتقدموا
ونشوفوا هيقدر يبقي زوج على قدر المسؤولية واب قدوة لاولاده او لا
خليني أقولك أولا كده ان الصورة البارزة على جبهة الموضوع ، معبرة جدا ، وأجمل ما فيها نظرة العين ( عين العروسة ) التي تغمز ( ربما ل " خالتو " بتاعتها )وكأنها غمزة تواطئ
ثانيا
أنا بافكر معاكي بقى بصوت عالي
الشهادات لا تصنع إنسانا ( باتساع مفهوم الانسانية وبأبعاده المختلفة )
لكنها طريق ووسيلة لتحقيق ذلك ، أو بالأحرى طريق مختصر لشحذ العقل وجعله في حالة استنفار دائم لإدراك ما حوله _ ما أسميته أنتِ "النظرة الفاحصة للأمور " _ لكن القدر أحيانا يتدخل لصالح أشخاص ، هم بحسابات الشهادات العليا أبعد ما يكونون عن الوصول لحالة الترقي المعرفي التي هم فيها
بالمثال يتضح المقال
الأستاذ هيكل مثلا ، مؤهله كان دبلوم ، مؤهل متوسط ، صحيح الجل درس بعد ذلك سحافة ، لكنه بالأساس حاصل على دبلوم
السؤال المهم هنا بقى
يا ترى يا هل ترى لو اتقدم ليكي شخص إنسان وراجل وصاحب عقلية تمنطق الأمور ، ويعي دوره الحضاري والإنساني ، وكل الصفات الحلوة اللي انتي قلتيها دي ، لكنه _ حاسبي المطب _ صاحب مؤهل متوسط ، أقل من بكالوريوس ، هيكون ردك علي طلبه ايه ؟
أنا ليه بأقول كل الكلام ده وباسأل كده
لأن المجتمع للأسف الشديد له شروطه وقيوده أيضا
وبالتالي ينظر لصاحب الشهادة نظرة فوقية على من دونه في مستوى التحصيل العلمي ( المجتمع هنا لا يقل إيمانه بالحتمية عن إيمان شيوعيو القرن ال 19 ) مع أنك تجدين في المجتمع وبكثرة شباب دون مستوى البكالوريوس ، لكنهم مع ذلك يفوقون أترابهم من حاملي الشهادات العليا
شئ أخير
ما يجعل القيود المفروضة من المجتمع تحافظ على تكتلها الشديد ، هو استنادها المفرط على الأعراف والتقاليد ، والأنكى اتكائها على أحكام فقهية من مثل ضرورة التكافؤ بين الزوجين ، وانسحاب هذا الشرط على كل ما يمكن وضعه في سلة المقارنة ، مع أن هذا الفهم " العرفي " للدين ، وتطويع الدين لصالح العرف هو سبب البلاوي التي نرفل فيها
دمتِ بنقاء
محمود عاطف
ممممممم
كلام مهم
نفسي اعلق بحاجات كتير .. بس حقيقي مش قادر
حنظلة
مستنيه العودة الى ارض الوطن و التعليق الى خلل ده :D
________________
كفاية طيبة
( اللى بيتحكم فى النقطتين هي تفتح الافق والعقل واستيعاب الحياة ماشية ازاى
واستيعابك انتى شخصيا)
ده صحيح
( علا بقي مادام احنا من الناس اللى مش بتأنتم قبل الجواز يبقي نوزن المواضيع بعقلنا لما ييجوا يتقدموا )
ضحكتيني .. فكرتيني بواحده صاحبتى فى الكلية كانت بتقولى الكلية بتاعتنا دى ما معناه حتوقف حالنا لو ما كناش نتصرف من دلوقتى اعرفى ان الموضوع كده انتهى خلاص .. و بما اننا مش من الناس الى بتتصرف فالموضوع انتهى فعلا :D :D :D
نورت يا بنوته .. رزقك الله زوجا صالحا يا رب :)
محمود من بنى عاطف
لما شفت تعقيبك حسيت بحاجه كده زى ياااااااااااااااااااااه عااااااااااش من شااااااافك يا عم
:D
___________________
الصورة الى انا حاطاها مسخرة بصراحه .. انا شخصيا اول ما شفتها ضحكت جدا
:D
___________________
( الشهادات لا تصنع إنسانا ( باتساع مفهوم الانسانية وبأبعاده المختلفة )
لكنها طريق ووسيلة لتحقيق ذلك ، أو بالأحرى طريق مختصر لشحذ العقل وجعله في حالة استنفار دائم لإدراك ما حوله _ ما أسميته أنتِ "النظرة الفاحصة للأمور " _ لكن القدر أحيانا يتدخل لصالح أشخاص ، هم بحسابات الشهادات العليا أبعد ما يكونون عن الوصول لحالة الترقي المعرفي التي هم فيها
)
معك فيما قلت تماما :)
_______________________
بالنسبة لسؤالك .. فبصراحه مش عارفه .. موضوع الشهاده العليا ده زى ما انت قلت مهم علشان الشكل الاجتماعي .. بس فى نفس الوقت لو حد بالمواصفات دى يبقى الموضوع محتاج تفكير للصبح .. عمرى ما فكرت فيها قبل كده بصراحه .. بس اعتقد ان الموضوع حيخضع لمناقشات طويلة عريضه و ممكن جدا ينتهى بمالموافقه .. لان فى الاول و الاخر فى بلاوى كتير فى المجتمع بتحكم تصرفاتنا و هى اصلا ملهاش اى مبرر من المنطق فمش حيبقى فى مشكلة ساعتها ان يتم كسر القاعده بمثال ناجح :)
____________________________
( استنادها المفرط على الأعراف والتقاليد )
كارثة بكل المقاييس .. اعانى منها معاناه خفيفه حتى الان فى بعض الامور المشابهه .. بس الموقف محتاج شوية جرأة و طولة بال علشان تكسر تلك القواعد الزائفة و تواجه من حولك :)
____________________________
( تطويع الدين لصالح العرف هو سبب البلاوي التي نرفل فيها
)
انا موافقه جداااااااااااا
___________________
بوركت يا بشموهندس .. و رزقت زوجه صالحه
" احنا اى حد بيعقب على الموضوع ده بندعيله بالجواز :D :D
محمد
فاتت ايام كتير بقى .. متهيألى كانت راحه كافيه
مستنيه تعقيبك علشان بيهمنى اقرأ كلامك
:)
أخيرا في واحدة بتفهم وهتبقى معانا في المدونة :D
تنورينا طبعا بقرارك ده :)
انا لسه كنت بكلم واحدة كبيرة بردوا من عيلتنا
اني هعمل ماجستير لما اخلص
قالت لي ده فأل وحش
ان شاء الله هتتجوزي ومش هتضطري تعملي ماجستير
:D
موضوع جميل
السلام عليكم و رحمة الله و بركاته
فلسطينية الهوى
واضح ان كل الخالات تقريبا بيفكروا من نفس المنطلق :D
جزاكم الله خيرا على كلماتك .. و مستنيه اشوف تعقيباتك هنا على طول بقى :)
نورت مدونتى المتواضعه :)
Post a Comment