فى معنى الأبيات نتفكر

التدوينة الى فاتت كنت حكيتلكم على حكاية الأبيات الى سمعتها من الطالب الأزهرى

أكتر حاجه شدتنى فى القصيدة بتاعت حافظ ابراهيم هى الابيات الى كنت غيرت لونها المرة الى فاتت .. حسيت انها بتكلمنا احنا دلوقتى .. يمكن يكون السياق الى اتكتبت فيه القصيدة ساعه ما كتبها حافظ ابراهيم مختلف .. و أعتقد زى ما بحس من الابيات انها كانت مكتوبة لمناسبات مبهجه و لحال أكثر اشراقا من حالنا حاليا .. بس ماتزال الابيات نوع من انواع الخطاب الفكرى لسياقات مختلفة و لأزمنة مختلفة عن السياق و الزمن الى اتكتبت فيه ..

حد فاهم حاجه ؟؟؟؟؟؟؟

طيب

تعالو كده نشوف ايه الى حضرتى طلعت بيه من القصيدة دى مع اسقاطه على واقعنا


لا تيأسوا أن تستردوا مجدكم .. فلرب مغلوب هوى ثم ارتقى



لا تيأسوا .. لازم يفضل فى أمل .. حتى و ان كان فى أشد الأوقات سوادا .. ليه ؟؟ لأن الأمل هو الى حيوصل الفرد للكملة الى بعدها فى البيت و هى :

تستردوا .. و الكلمة دى نفسها لما تقف عندها شوية حتلاقيها بتقول ان كان فى حاجه قبل كده .. فعلشان كده الشاعر قال تستردوا ..و الحاجه دى اغتصبت فستسترد لان ما يسترد هو ما أخذ بالقوة .. لانه اذا لم يؤخذ بالقوة لكان احرى بالشاعر ان يقول تستعيدوا .. ترجعوا .. تبنوا ..
و بعدين تستردوا تدل على ان الحاجه الى اغتصبت دى كانت من الغلاء و الرفعه و البهاء بمكان يدفع صاحبها ان يستميت _ حيث أن الاسترداد غالبا لا يكون سهلا او سلميا _ من أجل استردادها مرة أخرى .. و ده الى دفع الشاعر انه يعقبها بكلمة

مجدكم .. يعنى الى اغتصب و جار الظالمون على حق الآخرين فيه ده مش أى تاريخ ولا أى اصل ولا أى مجهود طبيعي .. لا ده مجد .. و المجد بيكون تراكم من الانجازات يفوق أى تراكم تاريخى من الممكن ان يتواجد فى اى بلد و لاى شعب .. و ده الى بيخليه سبب المفخرة .. و سبب شرارة الأمل التى تبث فى النفوس دائما .. مهما كانت تلك النفوس ضعيفة و مخذولة .. و ده الى نقل الشاعر لاختيار تعبيره

هوى .. كلمة لما تقرأها تحس بمدى التردى الى حصل .. لان هوى تعكس ان الشعب ده كان واقف على قمم المعالى و بعدها هوى لأسفل سافلين .. و بتعكس مدى الألم الموجود بداخل النفوس .. فهى مغلوبة نتيجة لانها هوت .. و بتعكس كمان مقدار العناء و البذل الى المفروض يبذلوه من اجل استرداد المجد .. و من أجل الاحساس بمدى أهميته للمحافظة عليه بعد استرداده .. بس لأن لسه بداخل النفوس أمل حتى و ان كانت فى أشد الاوقات قسوة .. الأمل الى عكسته كلمة لا تيأسوا .. فحتكون النتيجه ان المغلوب الى عنده أمل متمسكه بيه و باستمرار تسمكه بأمله و بالرغم من انه هوى الا انه

ارتقى .. و الكلمة دى كمان نتيجه طبيعية لأصالة الشعب و طيب أعراقه .. فلأنه عنده أمل .. و بذل جهد .. من أجل استرداد مجد .. كان النتيجه الطبيعية انه يرتقى .. مش بس يصعد ولا يرجع لحاله الاولى .. لا .. ده حيرتقى .. و حيسمو .. بس النتيجه دى جت بعد تعب و جهد و كفاح من أجل الاسترداد .. و ده الى دفع الشاعر انه يقول البيت :


انى رأيت المجد صعب المرتقى


طيب ليه المجد صعب المرتقى ؟؟ علشان تحس بقيمته فتحميه بعد ما تصل اليه .. لان الحالة الهاوية جعلت من الشعب أن يشعر بقيمة ما كان فيه من نعم سابقه لم يكن ليشعر بها الا حينما يحرم منها .. فكانت النتيجه ان بعد الهاوية و ألمها .. يأتى البذل بكل عنائه المرغوب فيه .. ليحفر فى ذكرى الشعب و فى كيانه أهميه التمسك بمجده و الحفاظ عليه و العمل على زيادته .. ليصل الى النتيجة النهائية و هى أن يرتقى .. لكن البذل و الجهد و النضال من أجل الاسترداد لن يكون بدون ضابط .. والا كان جهدا فوضويا غير خلاق .. و ده كان السبب فى ان الشاعر يقول الضابط و الأصل و قاعده البذل مبنية على فعل واحد كان :

فتعلموا .. يعنى لازم يسبق استرداد المجد و البذل و الجهد و الارتقاء الاعداد و الاستعداد له.. و الاستعداد القائم على أسس سليمة و مدروسة و ليست زوابع و انفعالات عارضه .. ليه ؟؟ لأن ما بنى على باطل هو باطل .. و لأن مطلبا سابقا على الارتقاء أن يكون الأصل ثابت .. فالشجرة التى أصلها ثابت .. يكون فرعها فى السماء .. بس العلم المطلوب هو أيضا له مواصفات أجملها الشاعر فى قوله :


ثم استمدوا منه كل قواكم


العلم المطلوب التسلح به علم بيقوى ما بيضعفش .. حد حيقولى هو فى علم بيضعف ؟؟ حقوله أيون سعادتك فيه .. لما يكون كل العلم الى حضرتك بتستعين بيه بيدور بس فى فلك استمرار واقعك الهاوى .. يبقى ده علم بيضعف .. لما يكون العلم الى بيتقدملك متفصل على انه يبينلك انه ليس فى الامكان ابدع مما كان يبقى ده علم بيضعف ما بيقويش .. و ده بالظبط الى خلا الشاعر يتكلم عن العلم النافع .. العلم الى بيقوى .. العلم الى بحق و حقيقي .. العلم الى حتكون انت منتج أغلبه و لا تلعب حياله دور المستهلك فقط .. و ده حيكون سبب طبيعي فى انك تستمد من علمك قوتك الى حتمكنك من البذل و خوض صعاب الارتقاء و مواجهة الغاصب و استرداد مجدك.. و ده الى خلى الشاعر يختم بحكمه واقعيه رائعه لمن يفهمها و هى :


ان القوى بكل أرض يتقى


لان القوة تخلق الحق و تحميه .. فما بالك لو كان الحق موجود أصلا و طيب المنبت و طيب الثمار .. فلابد له من قوة تحميه .. و ده حيكون لصيق بالارتقاء .. و ده لم و لن ينفى ابدا عن اصحاب ذلك الحق الأصل الطيب ولا النقاء ولا جميل الصفات التى يتصفون بها .. حيث ان لكل شىء ما يلزمه .. و القوى فى هذا الزمان هو المسيطر .. قد يكون مسيطرا باطشا و لكن ذلك يرجع الى كونه مغتصبا .. لكن القوة فى يد من هو ثابت الأصل و طيب المنبت .. صاحب المجد لن تكون بطشا و انما ستكون عدلا