!!!! ضحكت

ضحكت

ضحكت .. يعني قلبها مال و خلاص الفرق ما بينا اتشال
يلا يا قلبي روحلها يلا قلها كل اللي بيتقال

مستني ايه بعد الضحكة دي الضحكة فاتحالك السكة
مش هي دي اللي انت عاشقها و بقالها ياما شاغلة البال
و بقالها ياما شاغلة البال

ضحكت يعني حاسة هواك و موافقة تعيش العمر معاك
روح يا حبيبها ده انت حبيبها طمن شوقها اللي استناك

مستني ايه بعد الضحكة دي الضحكة فاتحالك السكة
مش هي دي اللي انت عاشقها و بقالها ياما شاغلة البال
و بقالها ياما شاغلة البال

في حد يستنى على دي ؟؟ دي كفاية بس الضحكة دي
شفت اهه ضحكت تاني .. يعني اللي شفته مكنش خيال
يعني اللي شفته مكنش خيال

اهه ضحكت .. يعني قلبها مال و خلاص الفرق ما بينا اتشال
يلا يا قلبي روحلها يلا قلها كل اللي بيتقال

ضحكت .. يعني قلبها مال و خلاص الفرق ما بينا اتشال
يلا يا قلبي روحلها يلا قلها كل اللي بيتقال

يا داهية دقى !!! كل دى استنتاجات من ضحكت ؟؟!!!!! أمال لو كانت اتكلمت كان حصل ايه بالصلاة ع النبى ؟؟؟

الى فوق ده للى ما يعرفش " ايون فى ناس ما تعرفش عادى مستغربين ليه ؟؟ " كلمات احدى أغانى عمرو دياب فى ألبومه الجديد

حضرتى سمعت الكلمات الى متربعه بالاعلى دى فى حفل افتتاح فاعليات نموذج الكونجرس الأمريكى لما شريف طلع على المنصه و بدأ يغنى

ملحوظة على جنب :

I don't know who Shrief is & don't ask me about him

المهم ان حضرتى كانت من " الناس الى ما تعرفش " الى اتكلمت عنهم فوق دول و ده يرجع الى ان سموى حفظنى المولى مش من العالم السميعة للأغانى

كلمات الاغنية لفتت انتباهى جدا .. لانها مش كلمات عادية ..

لا لا لا لا

دى منظومة قيم جاية فى رسالة مخفية عمو عمرو بقصد أو من غير قصد الله أعلم بيوصلها بصوته لكل البنات الى لسه عندهم شوية من الأحمر

بس قبل ما نتكلم فى الأحمر .. احم .. قصدى الرسالة .. الكلمات دى باطلع بحاجتين منها و ده طبعا بعد النظرة المتعمقه للمواضيع .. و التحليل المنطقى لسير الأحداث .. و المناقشه الذاتيه الهادفة لتعميق قنوات استاكيوس .. و استخدام اقتراب مأزمومية الأزمة الشهير " تأكد ان العيب مش من عندى لو سموك مش فاهم حاجه "

الحاجه الأولانية : حقيقة مؤكدة بالنسبالى على الأقل

و التانيه بقى فاتحه فيها الحوار من هنا لحاد ما تزهقوا .. علشان دى أصلا ظاهرة غريبة جدا بالنسبالى نفسى افهملها تفسير منطقى ..

خلينا نبدأ بالحقيقة الأول

الحقيقة دى متلخصه فى البيت التالت من الأغنية

" مستني ايه بعد الضحكة دي الضحكة فاتحالك السكة"

البيت ده بيقول باختصار شديد جدا و بعمق يحسد عليه كاتبه ان " البنت مفتاح نفسها " آه و الله ..

يعنى طول ما الواحدة ماشية كافية خيرها شرها و محترمة نفسها و مش ماشية توزع ابتسامات

ملحوظة :

ابتسامات دى كنايه عن كل البلاوى الى بتشوفوها فى الشارع ، بس لو فضلت اعدد انماط مفاتن الشارع المصرى مش حخلص

مش حتفتح سكك من بتاعت عمو عمرو

سبحان الله !! الغريب و العجيب و المستفز جدا .. ان دلوقتى لما تمشى فى الشارع عموما و الجامعات المصرية خصوصا تشوف نمط عجيب من البنات و الى بيحسسونى انى غفير مخضرم جنبهم و انى لا انتمى لصنف الحريم من اصله !! آه و ربنا ..

مهو لما تلاقى العالم و بغض النظر عن المظهر الخارجى طبعا " و الى بيتسمى اليومين دول حجاب !!!!!!!!!!!!!!!!! " جالها فجأة لين عظام و عرج و كساح فى المشى ..و سبحان الله تحس ان الحياة فى مصر مبهجه و مفرحة و ان شكرة سيجنال تو شغاله الله ينور فى اسنان المصريات .. يبقى اكيد فى حاجه غلط

اما عندى

او عندهم

او عند اهاليهم

او عند المجتمع كله على بعضه

الاستفزاز بقى لما بحاول افسر سبب العته الى الواحد بيشوفه كل يوم ده

!!!!!!! يعنى البنت عايزة ايه بالظبط ؟؟؟؟؟

الواحده مننا طبيعى يعنى عايزة تحس انها مصدر جذب و اعجاب الطرف الاخر بها .. ما اختلفناش .. بس مش بالطريقة المقرفة دى ..

و بعدين يطلع ايه بقى الاعجاب الآنى ده ان شاء الله ؟؟؟؟

يعنى كبيرها ايه ؟؟ حتتعاكس ؟؟

طب و بعدين ؟؟؟

كل واحد حيروح لحاله .. استفادت هيه ايه بقى ؟؟؟؟

و لا تبقى مصيبة لو البنات بقى عندهم التريند الجديد الى ماشى بقاله فترة فى عباس العقاد و ارصفه وندرلاند فى الساعات المبكرة من النهار و المبكرة ايضا من الليل " و طبعا اذا ذكرت الساعات المبكرة فبالاحرى يمكنك تخيل الساعات المتأخرة عامله ازاى " و الى بسميها ساعات العربيات المفتوحة .. شعار : " احنا فى الخدمة بس اضحك انت يا جميل "

" فاتحالك سكة "

جملة جامدة اوى .. لا و معناها يختلف لو غيرت التشكيل .. و الاتنين بيصبوا فى مستنقع واحد ..

لو اخدناها من باب الخطاب للمذكر زى ما هى فى الاغنيه كده .. فبدون مقاطعه كده يعنى السكة دى الى هيه بتبدأ منين و بتنتهى فين بالظبط ؟؟

ولو غيرنا التشكيل و خلينا الخطاب للمؤنث فالمصيبة أعظم .. حتبقى انهى سكة بقى المقصودة ؟؟

سكة السلامة ؟؟

و لا سكة الندامة ؟؟

و لا سكة الى يروح ما يرجعش ؟؟

المجتمع المصرى و الى الشارع مرايته بقى فيه مؤشرات غايه فى الخطورة بتنبىء بحدوث طفرات اجتماعية و سلوكية سريعه و قريبة و هادمة لكل ذو قيمة فى مجتمعنا الحبيب

ربنا يستر .. بس فى الاخر لازم اقول شكرا لعمرو دياب على كلمات الاغنية الى اتمنى ان كل واحده لما تتكون بتسمعها تكون بتشغل عقلها فى فهم الكامن بين سطور الكلمات دى

الحاجه التانيه بقى و الى طلعت بيها من الحياة الى عايشينها و من الاغنيه برضه بتخص معشر الشباب

يا جماعه انتو محتاجين عمرة فى المستويات الادراكية و الاستيعابية و التفسيرية كمان

"ضحكت .. يعني قلبها مال و خلاص الفرق ما بينا اتشال "


مين قال بقى الكلام ده بالصلاة ع النبى ؟؟؟؟؟؟؟؟!!!!!!!!!!!


"ضحكت يعني حاسة هواك و موافقة تعيش العمر معاك
روح يا حبيبها ده انت حبيبها طمن شوقها اللي استناك"

ما شاء الله !! يعنى فى الاول طلعت بتحبه و دلوقتى جوزوهاله !!!!!!!!!!

ده كل ده من الضحكة واخدين بالكم انتم !!!

ياليلة فحلقى !!!

حاجه كانت قالتها واحده من اعز اصدقائى فى موقف معين كان حصل كده مختصرها :

نحن معشر البنات يعنى يتوجب علينا اننا نخلى بالنا كويس و احنا بنتعامل مع الشباب لاننا ممكن نكون بنتعامل عادى خالص و تفاجأ البنت يا عينى بان فى واحد متعلق بيها بقاله سنتين تلاته ولا حاجه و فاكرها بتعامله معامله خاصه

حقيقى بعد ما سمعت الكلام ده منها بدأت الاحظ فى المجتمع الى حواليا هل فعلا الكلام ده حقيقى ولا لا

و ما اخبيش عليكم الصراحه .. استغربت جدا .. لان الكلام الى اتقالى ده طلع حقيقى بنسبه لا بأس بها

طب يا ترى ده سببه ايه ؟؟؟

انا شخصيا مش عارفه الاقي له تفسير !!!!!

لا و الادهى و الامر بقى ان ممكن الفرد يكون عمال بيبنى افتراضات و يستنتج استنتاجات و يأكد لنفسه كمان ان الى عمال بيطلع بيه من استنتاجات و افتراضات ده مضبوط .. و هوه اصلا بانى ده كله على " افتراض " وهمى فى خياله استقاه من واقع عاااااااااااادى جدا ..

و البنت ياعينى تبقى عايشه حياتها عادى .. و اخينا بقى شغاااااااااااااااااال استنتاجات

علشان انا عارفة انى احتمال كبير اتضرب بعد التدوينة دى فخلينا نوضح بس للمعترضين وسامعه صوتهم من السلوم هناك ان ده مش تعميم ..علشان بس ما حدش يقلق :) دى بس كانت دراسه حاله " تقدروا تعتبروها مجرد خواطر لو حبيتو" نتيجه للاغنيه و كلام صاحبتى :)

بس انا برضه مستنيه تفسير ..


سيبكو بقى من ده كله .. فى اخر حفل الافتتاح و شريف لسه بيغنى و تحديدا بعد ما قال :

" في حد يستنى على دي ؟؟ دي كفاية بس الضحكة دي
شفت اهه ضحكت تاني .. يعني اللي شفته مكنش خيال "

!! لقيت مريم بتميل عليا و بتقولى .. طب و افرضى كانت كل ده بتضحك لواحد قاعد وراه .. يبقى ازى الحال بقى