!! حادثة استوقفتنى

الزمان : امبارح صباحا .. الأربعاء الموافق 20/2/2008

المكان : رصيف محطة جامعة القاهرة بمترو الأنفاق

المشهد : يتلخص المشهد فى الآتى


وقف المترو فى المحطة كالعادة .. و احنا جوة لسه ما نزلناش واقفين طوابير طوابير فوق بعض .. و شايفين الأعداد الهكسوسية الغفيرة بره واقفة على الرصيف مستنيين لحظة الهجوم على داخل المترو حين يتكرم السائق بفتح البوابة ..

كل فريق يرسل للفريق الاخر نظرات نارية صاروخية عبر زجاج بوابات المترو النظيفة جدااااااااااااااااااااااااا تحمل فى طياتها معانى التحذير شديد اللهجة من النوع بتاع جامعة الدول العربية انك لو فكرت تقدم خطوة واحدة قبلى حيبقى ذنبك على جنبك و انت الى جبته لنفسك يا حلو .. و ما حدش بيتعلم ببلاش برضه .. و اهو يومين تقضيهم فى الدمرداش و لا القصر العينى كويسين عشانك لزوم الاستجمام من صخب الحياة .. و لزوم معايشة الواقع الى غيرك بيبات و يصبح فيه



الكل متأهب



مستعد



متحفز



منتظر اللحظة الحاسمة



الانفاس تتلاحق



ضربات القلوب تتصاعد




و فجأة




تاتاتاتااااااااااااااااااااااااااا



اتفتحت البوابات


و خد عندك بقى :

استنوا يا جماعة ننزل الاول و بعدين تطلعوا

اخلصى يا بنتى الراجل حيقفل الباب

يا اخوانا الشنطة .. الشنـــــــــــــــــطة

ما تزقوش كده .. سيبونا ننزل .. انتو ممكن تاخدو المترو الى بعده .. انما احنا دى محطة نزولنا

انزلوا بسرعة بقى عايزين نطلع قبل الباب ما يتقفل

سوسن .. سووووووووووسن .. حرام عليكو البنت اخدتوها معاكو و انتو طالعين .. استنوا نزلوها الاول

يالا بسرعة الحقو الباب بيتقفل

استنى يا مديحة بيقفل الباااااااااااااااااب


اتقفل باب المترو و كانت النتيجة الاتى :

الركاب الى كانوا عايزين يركبو كلهم ركبوا

و الركاب الى كانو عايزين ينزلوا كلهم نزلوا

و لكن

فى بنت كانت شايلة شنطة ايدها و السواق الهمام قفل الباب على ايدين الشنطة .. بقت الشنطة جوه المترو و البنت و ايديها متشعلقة فى ايدين الشنطة بره على الرصيف

العالم كلها تحاول تفتح الباب .. انه يتفتح مفيش فايدة

من بره .. من جوه .. ولا بيحوق

و فجأة .. و وسط ذهووووول الجميع المترو بدأ يتحرك

اه و الله .. المترو بيمشى من المحطة و ساحب البنت معاه ..

و الناس كلها تحاول تفتح الباب .. مفيش .. و المترو بيسرع .. و البنت بتصوت

نقلها سيبى الشنطة و سلكى ايدك .. مش عارفه تطلع ايديها من بين المترو و ايدين الشنطة

البنت اخدت رصيف المترو سحل بسرعة ..

لحاد ما فى الاخر الشنطة اتقطعت من شدة الجذب .. و ذهبت الشنطة الى حال سبيلها مع المترو .. و فضلت البنت معانا على الرصيف بعد ما قطعت نصه تقريبا جرجره و صويت



الاستنتاجات و الاستفهامات الذاتيه بعد سيبان المفاصل من هذا الحادث :

1- نفسى أعرف سواقين المترو بيفكرو ازاى .. 3 محطات اساسية لازم يستنوا فيها شوية على ما الناس تنزل و الى مستنى يركب : حسنى مبارك .. و أنور السادات .. و جامعة القاهرة

معرفش ايه الذكاء الى بينزل على العالم تقفل الباب فى اسرع وقت ممكن .. كأنها بتقولنا بلا علم بلا بتاع .. خليكو جوه احسن !! .. يعنى هما الى اتعلموا عملو ايه يا حسرة ؟؟؟

2- هما يا ترى ليه السواقين ما بيبصوش فى المرايه عندهم قبل ما يتحركو علشان يطمنوا اذا كان فى حد ممكن يروح فى الرجلين لو اتحركو ولا لا ؟؟؟؟؟!!!!!!!!!

3- الى حصل بقى كووووووم .. و موقف الناس كان كووووووووووووووووم تانى خاااااااااااالص

يعنى دلوقتى البنت اتحطت فى الموقف ده .. حاولتو تفتحوا الباب مرة و اتنين و المترو لسه واقف ما نفعش .. يبقى من الغباء انك تحاول مرة تالته و رابعه انك برضه تفتح الباب بايديك و المترو بقى ماشى و بيسحل البنت وراه

ليه العالم الى جوه المترو ما كسرتش زجاج مفتاح الانذار جوه و قالت للسواق يقف علشان حيموت واحده ساحبها وراه ؟؟

طب ليه ما كسروش زجاج مفتاح الامان جوه العربيات و فتحوا البوابات يدويا عن طريق المفتاح المخصص للطوارىء ؟؟

طيب ليه العالم الى كانت واقفه بطول رصيف المترو و الى كانوا قريبين من العربية الاولى و شايفه المشهد ما خبطوش على باب السواق قبل العربية الاولى وبلغوه انه يستنى و ما يتحركش لان فى بنت اتشبكت فى الباب و مش عارفين نسلكها منه ؟؟


السؤال الى لسه بيخبط فى راسى : هو ليه الناس ساعة المصيبة بتتلهى كده ؟؟؟؟؟؟؟؟


سلمنا الله و اياكم