هو م البلد دى

شكلى كده مش حعرف انزل التدوينة الى حتخلل فى دماغى دى وحنقضيها اعلانات صديقه بقى :P

ايوة حضرتك اعلان عن مدونة جديده .. يا ترى فى اى اعتراض مثلا !!!

مفيش ؟؟

طيب انا قلت كده برضه م الاول :)

يا ترى فاكرين البوست ده ؟؟

كويس :)

الزميل الفاضل ع .ع و صاحب البوست برضه و الى كان نزل البوست ده على كل الطلبة قبل كده

و اخى الذى لم ارزق به

و الى كان مصمم على انه يبتعد عن ذلك العالم الغريب و المجنون تدوينيا

و الى فاجئنى بخبر دخوله عالم التدوين من غير احم ولا دستور فى مكالمة عادية جدا لقيته بيقولى فجأه و ربنا

" هبة انا عملت مدونة "

اذهلنى ذلك الخبر فى الحقيقة و بعد شوية كلام و حبه اسئلة عرفت الاتى

المدونة تحمل اسم انا م البلد دى

هو بيكتب باسم

Vendetta





و داخل حامى من اولها بسلسلة تدوينية تحمل اسم " هي دي مصر يا بهية "

لا حضرتك انا لسه ما اعرفش مين بهية الى هو بيكلمها دى .. بس حنعرف باذن الله :)



vendetta مبروك يا حضرة الـ

على المدونة .. و باذن الله تكون مدونة ناجحه و تفيد قراء كتيييييييييييييير و خاصه من الشباب



قولوا آمين :)

نجوم الحيرة

هو انا كنت ناوية " و أعوذ بالله من كلمة ناوية :) " انزل تدوينة تانيه خااااااااااااااااااااالص غير دى .. بس بصراحه ما قدرتش يعنى الخبر ده الاقيه منور صفحات النت و ما اعلنش عنه .. و ما اقولكوش عليه .. و ما أزأططش كمان اه مبسوطة و مزأططة .. في ايه حضرتك ؟؟ يا ستار هو الواحد ما يعرفش يتبسط و هو طالب علوم سياسية !!

طيب بصو بقى .. م الاخر اصحاب مدونة نجوم الحيرة .. ايون نجوم الحيرة .. الى اسمها مشرف فى البانر هناك ده ..

مش ممكن !! لسه ما زرتهاش لحاد دلوقتى !!! ولا سمعت عنها حتى !!!

يبقى اسمحلى اقولك

فاتك من عمرك المعرفى كتييييييييييييييييييييييييير

بس ملحوقة يعنى

المهم ان الاتنين الجامدين صحاب المدونة يا جماعة عملولها " المدونة يعنى " اعادة تأهيل / ديكوريشن / ممكن تقول برضه نيو لوك .. خلوها حاجه جامدة كده

هى كانت جامده اصلا ..

بس دلوقتى بقت أجمد





مش بس كده

تؤ تؤ تؤ

كل واحد فيهم اخيرا عمل مدونة منفرده لشخصه الكريم

عمرو طموح الى قالى "التصميم بس " " علشان كلمته هى الى بتمشى " !!!!!!!!!!!!!!!!!!!!!!!!!

فتح له مطرح هنا





لا ما تستغربش خالص ..

ايون حضرتك قرات اسم المدونة صح

الامير الصغير

عادى طلبة العلوم السياسية ساعات بيمرو بظروف صعبه زى دى :P

عبدو ابن خلدون بقى بيفرشله تلكم المنطقة الى لسه مش عارفه انطق اسمها لحاد دلوقتى اصلا :$ :$ :$

عموما اسمها فى التدوينة دى .. الى يعرف يفسرهولى يكسب فيا ثواب و يقولى

هي لسه ما اتفتحتش يعنى اى حد حيدخل حيلاقى ده فى وشه




هو الخبر بتاع تجديد المدونة بصراحه فضلت متنحه قدامه كده شوية .. ولو اى حد كان بص عليا ساعتها كان قال يعنى البنت اكيد جاتلها حالة من سيولة الانبساط الى نادرا ما تحدث خاصه في الاونة الاخيرة ..

هي نجوم الحيرة ستظل عملا مشتركا بينهما

بدأت بطموح لوحده هنا

ثم انضم اليه ابن خلدون بدايه من هنا

و كانت اول تدوينة ليه هنا

المدونة دى الواحد كان ليه معاها ذكريات كتير أوى .. و الواحد ارتبط بيها نفسيا و عاطفيا جدا بصراحه ..

تفهمو من كده ايه ؟؟ ايون بالظبط .. مش حفضل مشحططة نفسى بين 3 مدونات .. هى نجوم الحيرة و ممكن ابقى اشقر عند كل واحد منكم شوية يعنى

- - - - - - - - - - - - - - - - -

حاجه مهمة بس على جنب كده لعمرو من بنى طموح : الرائع فى المدونة الجديدة التصميم اصلا " تحس ان الى مصممه كده عنده خبرة راقية فى الالوان خاصه الجنزارى " :P

- - - - - - - - - - - - - - - - - -

بصو بقى انا لو قعدت اتكلم عن المدونة او اصحابها مش حخلص .. اكتشفوهم انتو بقى براحتكو


كفايه كده علشان وجعت دماغكو :)



مبروووووووووووك يا شباب :)

حصل و ربنا حصل :)

احكيلكم القصة من الاول طيب

الموضوع بدأ من موقع كل الطلبة

الموهبة شفتها هناك

ما كنتش اعرف اى حاجه عن الشخصية دى .. كل الى اعرفه ان اسمه دكتور كنافة .. و انه طالب فى صيدلة القاهرة " طلعت طنطا بعد كده :D "

و بعد مرور الوقت عرفت بالصدفة انه ما كانش بيفهم حاجه من المناقشات الى كانت بتتفتح بينى و بين شيوعي حتى النخاع على صفحه سياسة ( هو الى قال كده فى مرة على فكرة ) .. بس ده طبعا لا يعنى ان السياسيين كلامهم مكلكع " بالتأكيد العيب عندكم انتم :P "


و مع تطور التعاملات المنتدياتيه ( نسبة الى منتدى يعنى ) عرفت انه بيكتب شعر

و بعدين بالصدفة البحته برضه عرفت ان ليه مدونة

و سبحان الله فى مرة من المرات قلت ادخل كده اشوف فى ايه .. فلقيت المواضيع كلها عادية يعنى و مفيهاش حاجه

و بعد فترة انقطاع كبيرة .. خبطنى عقلى و قالى يا دهاء ادخلى شوفى ايه اخبار المدونة دى

دخلت لقيت اول قصيدة نزلت بعنوان سلمى

ما اخبيش عليكم .. كبرت دماغى

بس بعد كده المدونة ما بقاش ينزل عليها اى حاجه خالص غير الشعر

و بمرور الوقت .. بقيت من متابعى تلكم المدونة

و بصراحة .. جذبنى الأسلوب الشعرى المتميز

و رقى الكلمات

و تطور المستوى من رائع لأروع

و أكثر ما أعجبنى كان ان لسه فى حد بيكتب باللغة العربية الفصحى شعر بالمعنى الى اعرفه طول حياتى و بالابداع ده .. و كمان ان الموهبة ليست قاصرة على الفصحى و بس .. لا فى العامية كمان لبلب ما شاء الله :D

معظم قصائده عجبتنى جدا خاصة .. باقة أشعاري .. أعانيك .. الدويتو الشعري الى كان بينه و بين خالد.. و طبعا الفيتو

و تمر الأيام .. و خير اللهم اجعله خير الاقى خبر كان رائع اتحدفلى هنا على المدونة حتلاقوه هنا

و من خلال متابعتى للجروب الخاص بذلك المشروع المبهج.. و ايضأ المدونة الخاصة به .. اليكم الخبر التالي

أبناء المحروسة الكرام

بعد طول انتظار

و سهر

و دعوات

و كفاح

و حاجات تانية كتير ما علينا منها

صدر العدد الأول من الديوان الشعرى الخاص بشاعر الصيادلة عمرو صبحى " حاليا " .. دكتور كنافة " سابقا " :)

الكتاب يحمل اسم

الدهشة الأولى

صادر عن دار اكتب

تم الإنتهاء من الطبع وأخيراً الكتاب يطرح بالأسواق مع الباعة

بدءاً من يوم السبت القادم


منافذ التوزيع

بمكتبة عمر ستور ، طلعت حرب ومكتبة البلد، أمام الجامعة الأمريكية ..

وبدءاً من يوم الأحد

بمكتبة سندباد وسط البلد

وبمكتبة ديوان الزمالك

وبمكتبة سنابل وسط البلد


وبدءاً من يوم الأربعاء بالهيئة العامة للكتاب، فرع الساقية

.. وخارج القاهرة ابتداءاً من الأربعاء القادم ، في مكتبة محمد ضرغام ببورسعيد

، Book and Beans بالمنصورة

ومكتبة أوروبا، بالسويس

والمعرض الإسلامي ومكتبة أمير بمحطة الرمل بالإسكندرية

المكتبة القومية الحديثة ، طنطا شارع القاضي

سعر الكتاب 5 جـ






حيفوتكو كتييييييييييير لو ما عرفتوش تجيبو نسخة

لمزيد من التفاصيل تابعوا هنا


أخيرا .. دكتور عمرو .. مبارك يا فندم .. استمر موفقا باذن الله

:)