و كأن الحزن بيوحشنى ..
و كأنى بخاف أكون سعيدة ..
بحس انى ممكن انسى نفسى و أنسى الى حواليا
بخاف لقلبى يجمد و يقوى و ما يرجعش رقيق و حنين من تانى
ببقى نفسى أعيط أوى .. و فى نفس الوقت البسمة مرسومة على وشى
دايما فى صراع مع نفسى و مع أفكارى و أحلامى
أنا ولا أمتى ؟؟
الحاضر ولا المستقبل ؟؟
فرحتى ولا فرحة الناس ؟؟
الراحة ولا سعادة البذل ؟؟
حاسة بسكينة جميلة أوى .. لكن فيها مسحة حزن بتعطيها جمالا و بهاءا فوق جمالها و بهائها
حاسة بقلق بعيد أوى فى عمق هذه السكينة .. و كأنما يصارع ليصل الى قلبى
أعلم انه سيصل يوما
حلوة الحياة و هي هادية و الواحد عايش فيها مرتاح و فى حاله
راضى بحياته الصغيرة
و عايش لشريكه فيها و خواصه و بس
ولا داوش دماغه بحاجة
ولا محمل نفسه عناء التفكير فى حاجه
حاسس بسلام داخلى يكفيه من الدنيا أى شىء
لكن
الأحلى
لما تبقى حياتك مدووشة
شغل
و صراع
مناهدة
و تعب
علشان عايز تغير و تتغير للأحسن
عايز تعمل حاجة
عايز تفرق عن ملايين البشر الى جم و عاشوا و مشيوا من الدنيا من غير ما يسيبوا فيها بصمة واحدة تدل على انهم وطئوها يوما ما
لازم الطوفان فى يوم يهدى
الميه تتبخر
و الدوشة تسكت
و السفينة ترسى
بس يا ترى
حترسى على ايه ؟؟
7 comments:
مممممممم
بوادر فهم في هذه التدوينة يا دهاء:)
معاني التجاوز الإنسانية دائما تصيب العقلانية بالحيرة... أقصد هنا بالعقلانية الافتراض بأن الإنسان كائن رشيد يسعي لتعظيم سعادته و تقليل آلامه...
و هذا الافتراض يتجاهل معني في غاية الأهمية اشرت إليه في تدوينتك... السكينة... فمن الممكن إن الإنسان يعيش مبسوط... و لكن هناك متطلبات لكي يحيا في سكينة... و منها سعادة البذل... و حمل رسالة يضحي من أجلها... و بدونها لا نستطيع أن نقول أنه... يحيا... فهو مجرد... واحد معدي بسرعة :)
و كن رجلا إن أتوا بعده
يقولون: مر! و هذا الأثر
دمت في سكينة و طمأنينة
طيب ممكن نعرف السكينة دي بكلمة تانية؟
ممكن نقول ان السكينة مرحلة متقدمة من مراحل الرضا؟؟
الرضا باللى ربنا قسمه ليك
الرضا بأحوالك أيا كانت بس مع نفس الوقت انت دايما بتكافح للاحسن لكن ومع كل ذلك انت جواك طمأنينة انك مش هتاخد اكتر من المكتوب ليك
بس ايه علاقة مسحة الحزن وخوفك من السعادة بالسكينة؟؟
انتى مفرقة ليه بين السكينة والحياة المليانة صخب وكفاح؟
مانا زى ما قولت فى الاول ... ممكن اكافح وكل حاجة بس فى نفس الوقت راضية وحاسة بسكينة بما بين يدي
بس كدة :)
ربنا معاكى فى نتيجتك ان شاء الله ..امتياز مع مرتبة الشرف والتميز ... لن اقبل اقل من ذلك :)
أظن أن الحياة وإن كانت مليئة بالعمل والبذل والعطاء .. والمشاكل العابرة أحيانا , فيمكن أن يكون صاحبها في سكينة
تعرفي ؟؟ السكينة عمل قلبي قد يجده بائع متجول يبذل الجهد الكبير ويحصد المال القليل .. ولا يجدها غني فاحش الثراء لا يبذل من الجهد إلا القليل
السكينة عمل قلبي .. قد يتواجد معه الحزن .. قد يصيب الإنسان مصيبة فيحزن لها .. ولكن قلبه مطمئن راض عن ربه وعن حياته .. فهو في سكينة
ولكن لا يمكن أن تكون السكينة والإنسان بعيد عن الله .. قال أحد الصالحين ( لا أذكر من هو أو أظنه ابن تيمية ) : إنا لفي سعادة لو علمتها الملوك لحاربتنا عليها بالسيوف
أعانك الله ورزقك
:)
اول مره ادخل هنا بس ارتحت لكلمات جميله جدا مليئه بالمشاعر والاحساس الكامل لدى انسان موجود على الارض
سبحان الله
:p
هترسى أما تروح للمينا
:)
فى ناس بتيجى الدنيا دى
وبتمشى وهى عاملة أثر
يعنى واحد
زى
بوش
لا يمكن يتنسى
عامل أثر جامد
شكلى بخرف
سلام ياقمراية
هاترسي علي خير بإذن الله ماتخافيش
السلام عليكم و رحمة الله و بركاته
عمرو
اتكلمنا فى موضوع الفهم ده فى الكلية
؛)
كلامك تمام .. و اللهم آآآآآآآآمين على الدعااااء :)
ـــــــــــــ
MoMo
السكينة مرحلة متقدمة من مراحل الرضا .. معاك تمام
بالنسبة للسكينة و الحزن .. انا ما فرقتش بينهم نهائى .. بالعكس انا شفت ان فى واحده بتدى للتانيه جمال و بتزيد فى القلب مقدارا أعلى من الرضا
ممكن يكون فى سكينه مع صخب الحياة .. بس الفكرة ان الراحة بقى هى الى استحالة تكون موجوده بالشكل المطلوب مع صخب الحياة .. و هو ده الى كنت اقصده .. يمكن اكون اخطأت فى التعبير بس ده الى كنت اسعى لايضاحه .. و ان الراحة دى لما تتواجد مع القليل من الايمان حتكون سببا فى تواجد السكينة لفترة تدوم اطول من اى فترة حياتيه عادية
بالنسبة للنتيجه بقى .. فالادارة عماله تأجل ظهورها و قالولنا يوم الاحد .. ربنا ييسر و يستر :)
ـــــــــــ
وضاح
بوركت .. اتفق معك تماما :)
ــــــــــــ
صوت من مصر
شرفت مدونتى بقراءة سطورها المتواضعه يا فندم .. اهلا بحضرتك :)
ــــــــــ
همسات
انت ماشية فى نفس الخط مش بتخرفى ولا حاجه .. تمام .. الأثر يختلف .. اما صالح أو طالح و فى كلا من الحالتين ستفنى الشر و يبقى الأثر .. و كل و ما ترك .. فان خيرا فخير و ان شرا فشر
منورة :)
ــــــــــ
المفقوعة مرارتها
ربنا يطمنك .. يا رب
أتمنى تكونى من الزوار الدائمين هنا :)
Post a Comment