They r SUCKS !!

They r SUCKS !!


كانت دى أول جملة سمعتها من نسمة بعد قيامها بأول جولة توزيع لاستبيانات القاهرة الخاصة ببحثنا فى
الجامعة


البنت كانت جاية و هى وشها شراب مقلوب .. و كنت حاسه ان فى دخان طالع من تحت الايشارب و حسيت لما بصيت فى عينيها و هى لسه جاية عليا ان جواها كلام كتير اوى من نوعية @%*&**^%$##///^%$ .. اتجمع كله و خرج فى الجملة الى خبطتهالى بالانجليزي دى ..


طبعا سيادتك مش فاهم حاجه .. مش كده ؟؟


طيب .. تعالى نبدأ القصة م الاول


عندنا مادة مقرره علينا فى التيرم الأول اسمها مادة " الرأى العام و الاتصال " .. المادة دى يا سيدي اتطلب مننا اننا نكون مجموعات بحثية من 3 الى 5 افراد و نختار موضوع معاصر يهم الراى العام و نبدأ ندرسه و نشتغل عليه ميدانى .. ( ميدانى يعنى بننزل الشارع او مكان الحدث و بنطبق استبيانات مع الناس او بنعمل مقابلات معاهم ) ..

المهم ان مجموعتنا الموقرة اختارت قضية مصنع أجريوم فى دمياط علشان تجرى البحث بتاعها .. مما توجب تباعا اننا ننزل دمياط علشان نطبق الاستبيانات و المقابلات الخاصة بالموضوع هناك ..

كان عندنا نوعين من الاستبيانات واحد بنطبقه فى دمياط و التانى كان فى القاهرة .. و تحديدا فى الجامعة " جامعة القاهرة " .

بعد ما استقرينا على صيغة الاستبيان و راجعناه و طبعناه و صورنا منه 150 نسخه ، قسمنا نفسنا علشان نوزع الاستبيانات فى الجامعة عندنا .. مريم و هديل و نسمة كانو هما المسئولين عن تطبيق استبيانات القاهرة بالأساس .. وزعنا الورق على بعض و من أمام الباب الرئيسي لكليتنا المبجلة أخدوا قرار الانتشار .. حاجه كده زى " هجووووووووووم " ..

كل واحده راحت فى اتجاه و معاها عدد من النسخ و فضلت انا مستنياهم عند نقطة الانطلاق " باب الكلية " ..

قاعده انا لا بيا ولا عليا بشم النسيم العليل " بالمناسبة هو عليل علشان جنب باب الكلية الرئيسي " برفقة الشنط الى البنات سابوها معايا .. شوية و الاقيلكم خير اللهم اجعله خير نسمة داخلة عليا مكفهرة الوجه .. ممتعضة الأسارير .. متقوقعه الذات .. فى حالة شبيه جدا بحالة واحد شرب تراب الدنيا و هو ماشى فى الشارع فى يوم من ايام الخماسين و لما جه يغسل وشه لقى الميه مقطوعة !!


انا : ايه الاخبار ؟؟

they are sucks: هي بكل اشمئزاز


كلمة من هنا على كلمة من هناك فهمت منها ايه الى حصل :(


و اليكم التفاصيل



: ( نسمة ) الضحية الأولى

الحكاية و ما فيها ان نسمة و هى بتوزع استمارات الاستبيان كان من ضمن الناس الى اتوزع عليهم الاستمارات بتاعتها مجموعة من الشباب كانوا متواجدين فى ناحية من أنحاء الحرم الجامعى

ملحوظة على جنب : بتعجبنى أوى كلمة " حرم " لما تتحط جنب " الجامعى " خاصه لما استرجع قدامى منظر العفه و الطهارة الى فيها أبناؤه اليومين دول ولا سيما قدام مبانى كلية تشجااااااااااااااااااااااااااااااااااااااااااااارة


ما علينا ، خلينا نرجع تانى لموضوعنا :)

أى استمارة استبيان فى الدنيا بيبقى فيها جزء خاص بالبيانات الشخصية لازم الى بيجرى عليه الاستبيان يملاه الأول .. بتكون بيانات من نوعيه : السن ، النوع ، الديانه ، الحالة الاجتماعيه ، المؤهل كده يعنى .. بعد ما بيملو الورقة دى بيبدأو بقى يملو اسئلة الاستبيان نفسه بعد كده

الشلة اللطشيفة الى وقع حظ نسمة فيها لما مسكو ورق الاستبيان فى ايديهم و بعد ما البنت شرحتلهم الورق ده بتاع ايه و مين الى بيقوم بيه و طمنتهم كالعادة ان البيانات المدرجة فى الاستبيان لن تستخدم الا لأغراض البحث العلمى و فقط ..
.. مفيش أى حاجه شدتهم فى الورق الا الصفحه الاولى بتاعت البيانات الشخصية .. و تحديدا بند " الحالة الاجتماعيه " ..

و بدأت سيمفونية من الصفاقه و الغلاسة و قلة الأدب اللا متناهية من نوعيه : و ليه حاطين اختيارين بس أعزب و متزوج ؟؟ طيب و المرتبطين يكتبو ايه ؟؟ و الى على وش ارتباط طيب ؟؟ و الى خاطب يعلم على ايه ؟؟

و استلموا البنت فى شوط من قلة الادب و الى بالرغم من كون نسمة تعد قائد الجناح العسكرى لجمعية المرأة المتوحشة الا انها عجزت يا عيني عن الصمود امام هذه الصدمة المفاجئة من التهدور الخلقى أو التلطيش للعالم المهزأة الى كانو بيغلسو عليها و ده لانها بنت ناس و متربية كويس للأسف و ده ما بقاش ينفع اليومين دول :(



خلصت كلام مع نسمة و حاولت اهديها شوية من الحالة الى كانت فيها .. و يا دوب لسه بفوق من الصدمة الاولانية و اذ الاقيلكو باقى الضحايا بدأتو يتساقطو واحده ورا التانيه




الضحية التانيه : ( مريم )

مريم بقى وضعها مختلف شوية .. البنت قابلت نوعيه تانيه خااااااااااااااااااااااااااالص بقى

فاكرين مسرحية شاهد ما شافش حاجه بتاعت عادل امام ؟؟

فاكرين المشهد بتاع المحكمه لما كان كل شوية عادل امام يبقى مفزوع و يقول لممثل النيابه : بتكتب ايــــــــــــــــــــــــه ؟؟!! أنا اسمى مكتوب ؟؟؟؟؟؟؟؟؟؟؟؟؟؟؟؟

اهى مريم بقى كان نصيبها نوعيه بتكتب ايه دى

البنت تيجي تدى الاستبيان لحد و بعد ما تشرح الى نسمه شرحته سابقا من نوعيه بيانات الاستبيان لن تستخدم الا لأغراض البحث العلمى و فقط .. تلاقى الى بيقولها لا انا ما ليش دعوة


ملكش دعوه !! يا عم بنقولك استبيان و طلبه مزنوقه فى خدماتكم الجليلة و مادة رأى عام و درجات فى الماده


فيتحول الرد الى : انا ما بملاش ورق ولا بكتب حاجه


يا ابنى ما بتكتبش اسمك .. انت بس بتعبر عن رأيك


الى ربنا يهديله فكره و ياخد الاستبيان بقى و يملاه .. و الى يصر على موقفه .. و الى يديلها ضهره و يمشى


بعد ما سمعت الاتنين بصراحه خوفت على التالته لتكون اتمسكت بالاستبيانات على انها بتوزع منشورات مثلا ولا حاجه مهو أى هبل بقى


بالنسبة للضحية التالته : ( هديل ) فالبنت يا عيني بتحس بالى فيا من على بعد .. حاجه كده زى الاستشعار فتقريبا لما شافت منظرنا احنا التلاته و انا قاعده فى النص قررت انها تصبر و تحتسب و تسكت على الى حصل فيها هى كمان لان شكلى ما كانش ناقص



حالة اذبهلال مؤقتة : " هو ايه الى بيحصل يا جدعان ؟!!! "

مالقيتش اكثر من صورة القرد ده تعبيرا !!


جاتلى حالة اذبهلال مؤقتة " علشان هى راحت من عندى بعد كده الحمد لله " .. اذبهلال من كذا حاجه جم مع بعض فى الموقفين الى حكيتهملكو فوق دول

أولا : اذبهلال من كيفية تعامل الطلاب مع اقرانهم من الطلاب

ثانيا : اذبهلال من مدى تقدير الجهد العلمى المبذول من قبل الطلاب لزملائهم

ثالثا : اذبهلال من مستوى ثقافة تشجيع العلم فى البلد ولو على المستوى الفكرى للطالب المصرى العادى جدا

رابعا : اذبهلال من حالة الخوف المتمكنه من قلوب الخلق و الى غيمت حتى على عقولهم و منعتهم من التفكير بشكل منطقى


كان اذبهلالى من تندى المستوى الخلقى فى الجامعه كبير بصراحه خاصه ان الى كنت اعرفه ان لما مجموعه شباب يكونو بيتعاملو مع بنت لأول مرة بيشوفوها فى حياتهم بيكون عندهم نوع من الحياء " المؤقت على الاقل " و حسن السلوك " المؤقت برضه " فى التعامل معاها و ده انطلاقا من حرصهم على مظهرهم العام " حاجه بالفطرة كده " خاصه قدام البنات و الى بيحبوا يبانو قدامهم رجاله ملو هدومهم و بيخدمو كمان !! .. بس حقيقي بعد الى حصل مع نسمه خريطة المفاهيم و القواعد الاساسية اتضربت عندى خالص ( الانفورميشن سيستم هاد بن فيروسد يا اخواننا ) :$

الكارثه التانيه انى لم اكن اتخيل ان مستوى التعاون عالى كده ماشاء الله بين الطلاب و بعضشيهم !! .. يعنى مما لا شك فيه ان الشلة اللطشيفه ما فكروش و لو للحظة واحده قبل كم السخف الى سمعوه للبنت ان الكام ورقة الى كانو فى ايديهم دول طلع عين الى خلفو الى كتبوهم علشان لما يوصل الورق لايدين البهوات يقدروا يفهموه بسلاسه بعقولهم النيرة .. و لا حتى فكروا ان من باب المجاملة انهم يعيروا الموقف اهتمامهم تشجيعا للبنت الغلبانه الى داخله الجامعه علشان تدرس مش علشان أى حاجه تانيه


ملحوظة على جنب : و زعلانين أوى من تدنى مستوى البحث العلمى فى مصر .. طيب مهو طبيعي يتدنى .. ده اذا كان على مستوى القواعد الاساسية مفيش أى تقدير للموقف من الطلاب بينهم و بين بعض اصلا .. و لا فى ريحه من قريب ولا من بعيد لاهتمامهم أو تشجيعهم حتى للعلم و الى عايزين يتعلمو .. مستنيين الحكومة تشجعه ازاى يعنى بالعقل كده !!!!!!

نرجع للكارثة الكبيرة بقى .. الصنف الى قابلته مريم ..

احنا وصلنا لمرحلة متقدمة جدا و لله الحمد فى سيطرة عقيدة الخوف علينا لدرجة طغت على التفكير المنطقى و لو لثوانى بعقلنا فى أى حاجه نقابلها فى حياتنا .. يعنى الشريحه الى مريم قابلتها لو كانو فكروا لمده 3 ثوانى بعقلهم كده كانو حيلاقو ان الموضوع آمان جدا و مفيهوش أى حاجه تخوف .. " مفيش أى بيانات تدل على شخصيه الى بيملأ الاستبيان مطلوبة نوهائى " .. ده العالم كده وصلت لمرحلة فيها بيخافو حتى من ابداء رأيهم فى أى حاجه أو مساعده غيرهم ليطلع وفقا لنظرية المؤامرة مثلا متحرى سرى و بيجمع معلومات عن الطلبة ولا حاجه ( اللهم احفظنا ) :$ .. متهيألى ان ده هو الى كانو بيفكرو فيه ساعتها !!

طب و بعدين بقى فى الموقف ده ؟؟ الحل ايه يعنى علشان الموضوع ده يتغير فى عقول الناس ؟؟ بالمناسبة الحل الى بسأل عنه مش الى المفروض تقوم بيه الحكومة .. انا بسأل عن الحل الى المفروض احنا نعمله بيننا و بين بعضنا



شككونى فى نفسى :$




بصراحه بعد الموقفين دول بدأت اراجع نفسى تانى .. هو انا لو اتحطيت مكان الناس دى يا ترى كنت فعلا حساعد الطلاب الى جايه تملأ الاستبيانات دى ولا كنت حتعامل معاهم بنفس رد الفعل الى هما اتعاملو بيه ؟؟ .. و لا الموقف حيحكمه عنوان الموضوع الى بيعملو عنه الاستبيان و حنقى بقى مين الى املا الاستبيان بتاعه و مين الى حطنشه ؟؟

و فى وسط ما انا بفكر فى الكلام العجيب الغريب ده اذ احس بحاجه كده زى واحد اخدك قلم مفاجىء فوقك من الى انت فيه .. ايون .. القلم ده كان من ذاكرتى العزيزة باعتاهولى علشان انا بدأت اخرف رسمى .. حاجه كده زى ايـــــــــــــــه العبط الى انت فيه ده ؟؟؟ .. انت مش فاكره انك ولا مرة رفضتى تملى استبيانات لحد فى الجامعه .. كل ما حد يجيلك باستبيان و يوقفك و يطلب منك تمليه كنت بتقفى و تمليهوله ... مالك فيكي ايــــــــــــــــــــــــه ؟؟!!!!!

فعلا ساعتها افتركت انى عمرى ما طنشت حد طلب منى املا اى استبيان خاص بدراسته .. العالم الى نسمه و مريم و هديل قابلوهم شككونى فى نفسى الوحشين :,(


بس بصراحه من بعد الموضوع بتاع استبيانات أجريوم ده و انا اخدت عهد على نفسى انه حيزداد التزامى بمساعده اى طالب جايلى باستبيان عايونى املاه او حتى اقول رأيي فيه .. لان بصراحه الناس بتبقى تعبانه جدا و مستنيه الى يقدر مجهودها و تعبها ده .. مش ناقصين حرقه دم و بهدله من العالم الى مش بتقدر حواليهم .




سؤال أخير



الى فكرنى بكل الى فات ده من أوله لآخره هو ان دزء كبير من مشروع التخرج بتاعى السنه دى حيكون ميدانى و بعتمد فيه اساسى على المعلومات الى حاخدها من الدراسه الميدانيه بتاعتى ..

تفتكروا ممكن يحصل معايا نفس الى حصل مع نسمه و مريم و هديل التيرم الأول و انا بطبق الاستبيانات كمان اسبوع ؟؟؟


ربنا يستر