المعرض الفني يا جدعااااااااان :)

السادة الكرام .. المعرض الفنى باذن الله حيبقى يوم الخميس 13 / 5 .. يعنى الخميس بعد الجاي ان شاء الله :)

حكون منشكحة آخر انشكاح باذن الله لو شفتكم كلكم السنة دى و شرفتونى بالحضور فى مبنى الكلية الموقرة أمام مكتبة الكلية بالدور الأول :)

مفيش أعذار حتقبل هذا العام نوهائيا خالص يعنى لو محدش جه زى المعرضين الى فاتو :)


مستنياكوووووووووووووو كلكم باذن الله :)

فاصل و نواصل :)

اعلان عن توقف التدوين لحاد يوم 21 من شهر 6 نظرا لظروف الامتحانات اللطشيفة :$

ادعولنا و ادعوا لاى حد بيمتحن زينا :)

اشوفكم على خير بعد الامتحانات بقى :)

استودعكم الله الذى لا تضيع ودائعه :)

المعرض الفنى .. كلاكيت تالت مرة :)

النهارده يوم التفوق فى كليتي الحبيبة كالعاده

و بالتالى هو برضه يوم المعرض الفنى

المعرض الى اعتذرت عنه السنة دى بعد ما اشتغلت له شوية .. نظرا لاسباب كتيرة جدا من ضمنها الضغط الدراسي :(

افتكرت معرض السنة الى فاتت و الى قبلها و الى ما شفتش حد منكو فيهم :(

بس يلا ما فاتكوش كتير .. اسيبكو مع صور لمعرض السنة الى فاتت و بعض صور تانية لاعمالي المتواضعه فيهم :)



معرض السنة الى فاتت















دى بقى صور لبعض مشاركاتى فى المعارض السابقة



دى كانت اعمال الطباعه " استنسل "





















ده بقى كان رسم عادى بألوان مائيه














كفاية كده النهارده .. باذن الله نبقى نباصى رسم الرصاص و البورتريهات و الاعمال الورقية فى مرة تانيه بقى :)

بحث التخرج كلاكيت رابع مرة :) :$ :'(

امبارح كنت انا و هديل فى الجامعة الأمريكية في التجمع الخامس علشان بنطبق آخر دفعه من الاستبيانات اللطشيفة بتاعت بحث التخرج بتاعى

حد حيقولى طيب و لما هو بحث التخرج بتاعك هديل كانت نازلة ليه ؟؟

حقوله : ببساطة أوفى صديقه فى الدنيا ربنا يكرمها .. كانت جايه معايا تساعدنى :)

رحنا على هناك .. و بعد ما اجتازنا البوابة للدخول الى عمق الجامعه _ بالمناسبة " لو حد حس انى باتكلم بصيغه استراتيجيات الحرب فاحساسه فى محله " الى احنا كنا فيه على البوابه كان لايقل عن حرب المائة عام الى كانت بين انجلترا و فرنسا فى العهد البائد !!

و بعد ما اخدنا جوله لطيفه بين مكاتب الدكاترة المسئولين و الى كنت عارفه انى حقوم بيها مسبقا_ نظرا للفت نظرى للقيام بها من أول مرة رحت اخد الموافقه على تطبيق الاستبيانات هناك من حوالى شهر فات_ .. قالتلنا احد السكيرتيرات فى مكتب نائب رئيس الجامعه الامريكية اننا ننزل نستريح نص ساعه و بعدين نروح لمكتب دكتور تانى بقى هو الى حيوافقلنا الموافقه النهائية على التصريح !!! :$

نزلنا فعلا قعدنا تحت احدى " الشماسى " الى الجامعه عاملاها للطلاب ( ايون حضرتك قرأت الكلمة صح " شماسى " الى هى جمع شمسية الى سيادتك ما بتشوفهاش الا على شاطىء مصطفى كامل لما بتروح انت و الاسرة السعيده المصيف م السنة للسنة :) ) الجامعه هناك حاطه للطلاب شماسى تحمي بشرتهم من ألسنة اللهب .. حنقر بقى !!!!!


المهم .. و احنا قاعدين افتكرت تدوينة محمد بتاعت قلم رصاص و أستيكة و طقت فى مخى ساعتها اننا نعيش اللحظة و اخوض التجربة انا و هديل خلال النص ساعه دى و نشوف احنا حنطلع بايه .. قولتلها احنا حنطبق الفكرة بشكل مختلف شوية .. كل واحده مننا حتقول جملة بحيث ان احنا الاتنين حنصنع القصه الى حتتكتب او ايا كان ايه الى حيطلع .. و هى وافقت و رحبت بالفكرة أوى .. و بالفعل بدأنا فى الموضوع و كان النتاج هو الاتى :


" ارشادات عامة قبل القراءة " :

1-هديل بدأت باول جملة و بعدين انا الجملة الى بعدها و هكذا .

2-كل نقطتين جنب بعض زى دول ( .. ) يعنى فاصل بين جملتى و جملة هديل

3-هى ما طلعتش قصه بقدر ما هى كانت تقرير اعلامى عن وضعنا فى المنفى هناك :)

!! ENJOY-4


"

قعدنا نتشمس تحت الضليلة .. مستنيين الفرج .. الشورتات و البنطلونات على كل الالوان و الاشكال !! .. و أصوات الضحك فى " الحرم الجامعى " مجلجلة .. المبانى طراز عربي و الطلاب حاجه تانيه خااااالص .. الصيف عند الطلاب جالهم بدرى شوية
عننا

!! .. Booths و في بلالين على الـ ..

بس العمال شكلهم غلابه أوى .. مفيش حد من الطلاب معاه كتاب أو ورقة !! .. أمال يا ترى هما جايين ليه ؟؟ .. شدنى لافتة ( مطلوب عربي ) على البوث بتاع سايمال .. احنا على فكرة بنتكلم على الجامعة الأمريكية :) :) .. واحد قاعد ماسك كتاب و بعديها مجلة و بعديها ميكي !! .. طلاب من النوعيه دى يا ترى حيبقى ردهم ايه على الاستبيانات ؟!! .. ده لو دبور قالنا نوزعهم أصلا!! .. احنا لازم نسجل الوقت دلوقتى الساعه 12 الا ربع حنروح لدبور و نرجع نكمل انتظرونا ..




" دى صورة لاحدى بوابات الجامعه من جوه "



رجعنا تانى

هبة تتحدث : روحنا لدكتور دبور .. ما كنتش فاكره ان البيروقراطية المصرية وصلت لحاد الجامعة الأمريكية يا جدعاااااان !! .. الراجل قعد يقرأ فى التصريح ساعه و بعدين بصيلنا .. و بعدين طلب نسخه من الاستبيان .. و بعدين كلم دكتور من الدكاترة لمده نص ساعه تقريبا .. و بعدين فتح معانا تحقيق مفصل فيما يخص الاستبيان .. و بعدين قالنا تروحو تجيبولى تصريح تانى من الكلية بصيغه تانيه مكتوب فيها اساميكو و ارقام كارنيهاتكو و ممضى من العميده و تيجولى يوم تانى !! ..

هديل : دبور طلع نحله !!


الساعه 4 و نص .. خلصنا الاستبيانات على خير من ورا ضهره :) :) .. من الخندق للجامع الى فى الدور الرابع فى مبنى هندسه يا قلبي لا تحزن !! ، و اكتر حاجه مستفزة فى الطلاب ان كل واحد تيجي تديله الاستمارة يقولك عندى محاضرة بعد تو مينيتس :$ .. مكان الأكل فسيح و مريح .. معاملة الطلاب للعمال زى الزفت بجد :( :( :( .. الأكل كان وحش قوى و ماااالح :( .. عايزين نتصور قبل ما عمو أشرف ( أبي ) ييجي .. كان نفسى أوى ادخل المكتبة بس للأسف تعبانة جدا :'( .. مش عايزين ننسى البطايق بتاعتنا .. يا ترى ممكن يجي اليوم الى أدخل فيه الجامعة دى دكتورة فيها !!؟؟ .. وحشتنى دفعتى أوى !! .. يلا نقوم علشان نلحق نتصور و نروح على البوابة :)

"


ده كان الى طلعنا بيه بعد يوم طويل عريض من العناء و التعب و الارهاق و الترقب .. مش محتاجه اوصفلكم التفاصيل الدقيقه بتاعت الجامعه هناك و بهدلتنا فيها .. حسيبكو انتو تتخيلو بقى :) .. او ممكن تجربو تخطفو رجلكو لهناك و تحاولو تدخلو لاى حاجه عايزينها و انتو تجربو بنفسكو :(

بس فعلا قبل ما اختم لازم جدا اقول لهديل ربنا يباركلك و يكرمك و يرزقك رضاه عنك و يرزقك الفردوس الاعلى يا رب على تعبها معايا طول اليوم و هى ملهاش علاقة بالبحث خالص

و يسعدنى ان اتقدم بالشكر لكل من مرام بنت خال عمرو و سلوى صاحبه مرام على تعبهم معايا فى نص اليوم و وقفتهم جنبنا و احنا بنوزع الاستبيانات و بنطبقها هناك و من قبلها ارسال الاستبيانات بالايميل للطلاب علشان يملوها

و برضه عايزة اشكر واحد كمان .. هو طالب هناك فى هندسه فى سنة أولى انا ما اعرفهوش بس هو بعد ما ملا الاستمارة بتاعته منه لنفسه كده تولى مسئوليه انه يدورلنا على طلاب بعدد الاستمارات الى باقيه معانا فاضيه و قالهم يملوها و يهتمو بيها علشان ده بحث التخرج بتاعنا و مش كلام فاضى يعنى .. و كان جاد جدا و حريص على اننا نخلص مهمتنا على أكمل وجه وعلى خير :)

شكرا جدا لدكتور عزت فهمى وكيل كلية الهندسة فى الجامعه الامريكية لاهتمامه شخصيا بتيسير دخولنا للجامعه لما الامن كان مغلس علينا بره بعد ما اتصلت بيه مع انه ما شافنيش الا مرة واحده من شهر لما كنت عندهم باخد الموافقه المبدئيه على الاستبيانات :)

شكرا لمدام رباب جدا " سكرتارية الوكيل " على حسن استقبالها ليا و مساعدتها الجاده لما كنت عندهم من شهر فات :)


شكرا لعمرو على اهتمامه عامة و اهتمامه لما كلمته و انا هناك و طلبت منه انه يكلم مرام علشان تيجيلنا

شكرا لأحمد رضا على مساعدته فى ارسال الاستمارات بالايميل للطلاب علشان يملوها قبل ما اروحلهم بنفسى هناك

شكرا لكل حد دعالى او اهتم بأى شكل من الاشكال

و مسك الختام

شكرا جزيلا لأمى و أبي الى مستحمليني اخر احتمال و متبهدلين معايا اخر بهدله .. جزاهم الله عنى و اختى كل خير و رزقهما الفردوس الاعلى يا رب :)


ختاما

دعواتكو بقى اكتب بحث قيم و متميز :)

They r SUCKS !!

They r SUCKS !!


كانت دى أول جملة سمعتها من نسمة بعد قيامها بأول جولة توزيع لاستبيانات القاهرة الخاصة ببحثنا فى
الجامعة


البنت كانت جاية و هى وشها شراب مقلوب .. و كنت حاسه ان فى دخان طالع من تحت الايشارب و حسيت لما بصيت فى عينيها و هى لسه جاية عليا ان جواها كلام كتير اوى من نوعية @%*&**^%$##///^%$ .. اتجمع كله و خرج فى الجملة الى خبطتهالى بالانجليزي دى ..


طبعا سيادتك مش فاهم حاجه .. مش كده ؟؟


طيب .. تعالى نبدأ القصة م الاول


عندنا مادة مقرره علينا فى التيرم الأول اسمها مادة " الرأى العام و الاتصال " .. المادة دى يا سيدي اتطلب مننا اننا نكون مجموعات بحثية من 3 الى 5 افراد و نختار موضوع معاصر يهم الراى العام و نبدأ ندرسه و نشتغل عليه ميدانى .. ( ميدانى يعنى بننزل الشارع او مكان الحدث و بنطبق استبيانات مع الناس او بنعمل مقابلات معاهم ) ..

المهم ان مجموعتنا الموقرة اختارت قضية مصنع أجريوم فى دمياط علشان تجرى البحث بتاعها .. مما توجب تباعا اننا ننزل دمياط علشان نطبق الاستبيانات و المقابلات الخاصة بالموضوع هناك ..

كان عندنا نوعين من الاستبيانات واحد بنطبقه فى دمياط و التانى كان فى القاهرة .. و تحديدا فى الجامعة " جامعة القاهرة " .

بعد ما استقرينا على صيغة الاستبيان و راجعناه و طبعناه و صورنا منه 150 نسخه ، قسمنا نفسنا علشان نوزع الاستبيانات فى الجامعة عندنا .. مريم و هديل و نسمة كانو هما المسئولين عن تطبيق استبيانات القاهرة بالأساس .. وزعنا الورق على بعض و من أمام الباب الرئيسي لكليتنا المبجلة أخدوا قرار الانتشار .. حاجه كده زى " هجووووووووووم " ..

كل واحده راحت فى اتجاه و معاها عدد من النسخ و فضلت انا مستنياهم عند نقطة الانطلاق " باب الكلية " ..

قاعده انا لا بيا ولا عليا بشم النسيم العليل " بالمناسبة هو عليل علشان جنب باب الكلية الرئيسي " برفقة الشنط الى البنات سابوها معايا .. شوية و الاقيلكم خير اللهم اجعله خير نسمة داخلة عليا مكفهرة الوجه .. ممتعضة الأسارير .. متقوقعه الذات .. فى حالة شبيه جدا بحالة واحد شرب تراب الدنيا و هو ماشى فى الشارع فى يوم من ايام الخماسين و لما جه يغسل وشه لقى الميه مقطوعة !!


انا : ايه الاخبار ؟؟

they are sucks: هي بكل اشمئزاز


كلمة من هنا على كلمة من هناك فهمت منها ايه الى حصل :(


و اليكم التفاصيل



: ( نسمة ) الضحية الأولى

الحكاية و ما فيها ان نسمة و هى بتوزع استمارات الاستبيان كان من ضمن الناس الى اتوزع عليهم الاستمارات بتاعتها مجموعة من الشباب كانوا متواجدين فى ناحية من أنحاء الحرم الجامعى

ملحوظة على جنب : بتعجبنى أوى كلمة " حرم " لما تتحط جنب " الجامعى " خاصه لما استرجع قدامى منظر العفه و الطهارة الى فيها أبناؤه اليومين دول ولا سيما قدام مبانى كلية تشجااااااااااااااااااااااااااااااااااااااااااااارة


ما علينا ، خلينا نرجع تانى لموضوعنا :)

أى استمارة استبيان فى الدنيا بيبقى فيها جزء خاص بالبيانات الشخصية لازم الى بيجرى عليه الاستبيان يملاه الأول .. بتكون بيانات من نوعيه : السن ، النوع ، الديانه ، الحالة الاجتماعيه ، المؤهل كده يعنى .. بعد ما بيملو الورقة دى بيبدأو بقى يملو اسئلة الاستبيان نفسه بعد كده

الشلة اللطشيفة الى وقع حظ نسمة فيها لما مسكو ورق الاستبيان فى ايديهم و بعد ما البنت شرحتلهم الورق ده بتاع ايه و مين الى بيقوم بيه و طمنتهم كالعادة ان البيانات المدرجة فى الاستبيان لن تستخدم الا لأغراض البحث العلمى و فقط ..
.. مفيش أى حاجه شدتهم فى الورق الا الصفحه الاولى بتاعت البيانات الشخصية .. و تحديدا بند " الحالة الاجتماعيه " ..

و بدأت سيمفونية من الصفاقه و الغلاسة و قلة الأدب اللا متناهية من نوعيه : و ليه حاطين اختيارين بس أعزب و متزوج ؟؟ طيب و المرتبطين يكتبو ايه ؟؟ و الى على وش ارتباط طيب ؟؟ و الى خاطب يعلم على ايه ؟؟

و استلموا البنت فى شوط من قلة الادب و الى بالرغم من كون نسمة تعد قائد الجناح العسكرى لجمعية المرأة المتوحشة الا انها عجزت يا عيني عن الصمود امام هذه الصدمة المفاجئة من التهدور الخلقى أو التلطيش للعالم المهزأة الى كانو بيغلسو عليها و ده لانها بنت ناس و متربية كويس للأسف و ده ما بقاش ينفع اليومين دول :(



خلصت كلام مع نسمة و حاولت اهديها شوية من الحالة الى كانت فيها .. و يا دوب لسه بفوق من الصدمة الاولانية و اذ الاقيلكو باقى الضحايا بدأتو يتساقطو واحده ورا التانيه




الضحية التانيه : ( مريم )

مريم بقى وضعها مختلف شوية .. البنت قابلت نوعيه تانيه خااااااااااااااااااااااااااالص بقى

فاكرين مسرحية شاهد ما شافش حاجه بتاعت عادل امام ؟؟

فاكرين المشهد بتاع المحكمه لما كان كل شوية عادل امام يبقى مفزوع و يقول لممثل النيابه : بتكتب ايــــــــــــــــــــــــه ؟؟!! أنا اسمى مكتوب ؟؟؟؟؟؟؟؟؟؟؟؟؟؟؟؟

اهى مريم بقى كان نصيبها نوعيه بتكتب ايه دى

البنت تيجي تدى الاستبيان لحد و بعد ما تشرح الى نسمه شرحته سابقا من نوعيه بيانات الاستبيان لن تستخدم الا لأغراض البحث العلمى و فقط .. تلاقى الى بيقولها لا انا ما ليش دعوة


ملكش دعوه !! يا عم بنقولك استبيان و طلبه مزنوقه فى خدماتكم الجليلة و مادة رأى عام و درجات فى الماده


فيتحول الرد الى : انا ما بملاش ورق ولا بكتب حاجه


يا ابنى ما بتكتبش اسمك .. انت بس بتعبر عن رأيك


الى ربنا يهديله فكره و ياخد الاستبيان بقى و يملاه .. و الى يصر على موقفه .. و الى يديلها ضهره و يمشى


بعد ما سمعت الاتنين بصراحه خوفت على التالته لتكون اتمسكت بالاستبيانات على انها بتوزع منشورات مثلا ولا حاجه مهو أى هبل بقى


بالنسبة للضحية التالته : ( هديل ) فالبنت يا عيني بتحس بالى فيا من على بعد .. حاجه كده زى الاستشعار فتقريبا لما شافت منظرنا احنا التلاته و انا قاعده فى النص قررت انها تصبر و تحتسب و تسكت على الى حصل فيها هى كمان لان شكلى ما كانش ناقص



حالة اذبهلال مؤقتة : " هو ايه الى بيحصل يا جدعان ؟!!! "

مالقيتش اكثر من صورة القرد ده تعبيرا !!


جاتلى حالة اذبهلال مؤقتة " علشان هى راحت من عندى بعد كده الحمد لله " .. اذبهلال من كذا حاجه جم مع بعض فى الموقفين الى حكيتهملكو فوق دول

أولا : اذبهلال من كيفية تعامل الطلاب مع اقرانهم من الطلاب

ثانيا : اذبهلال من مدى تقدير الجهد العلمى المبذول من قبل الطلاب لزملائهم

ثالثا : اذبهلال من مستوى ثقافة تشجيع العلم فى البلد ولو على المستوى الفكرى للطالب المصرى العادى جدا

رابعا : اذبهلال من حالة الخوف المتمكنه من قلوب الخلق و الى غيمت حتى على عقولهم و منعتهم من التفكير بشكل منطقى


كان اذبهلالى من تندى المستوى الخلقى فى الجامعه كبير بصراحه خاصه ان الى كنت اعرفه ان لما مجموعه شباب يكونو بيتعاملو مع بنت لأول مرة بيشوفوها فى حياتهم بيكون عندهم نوع من الحياء " المؤقت على الاقل " و حسن السلوك " المؤقت برضه " فى التعامل معاها و ده انطلاقا من حرصهم على مظهرهم العام " حاجه بالفطرة كده " خاصه قدام البنات و الى بيحبوا يبانو قدامهم رجاله ملو هدومهم و بيخدمو كمان !! .. بس حقيقي بعد الى حصل مع نسمه خريطة المفاهيم و القواعد الاساسية اتضربت عندى خالص ( الانفورميشن سيستم هاد بن فيروسد يا اخواننا ) :$

الكارثه التانيه انى لم اكن اتخيل ان مستوى التعاون عالى كده ماشاء الله بين الطلاب و بعضشيهم !! .. يعنى مما لا شك فيه ان الشلة اللطشيفه ما فكروش و لو للحظة واحده قبل كم السخف الى سمعوه للبنت ان الكام ورقة الى كانو فى ايديهم دول طلع عين الى خلفو الى كتبوهم علشان لما يوصل الورق لايدين البهوات يقدروا يفهموه بسلاسه بعقولهم النيرة .. و لا حتى فكروا ان من باب المجاملة انهم يعيروا الموقف اهتمامهم تشجيعا للبنت الغلبانه الى داخله الجامعه علشان تدرس مش علشان أى حاجه تانيه


ملحوظة على جنب : و زعلانين أوى من تدنى مستوى البحث العلمى فى مصر .. طيب مهو طبيعي يتدنى .. ده اذا كان على مستوى القواعد الاساسية مفيش أى تقدير للموقف من الطلاب بينهم و بين بعض اصلا .. و لا فى ريحه من قريب ولا من بعيد لاهتمامهم أو تشجيعهم حتى للعلم و الى عايزين يتعلمو .. مستنيين الحكومة تشجعه ازاى يعنى بالعقل كده !!!!!!

نرجع للكارثة الكبيرة بقى .. الصنف الى قابلته مريم ..

احنا وصلنا لمرحلة متقدمة جدا و لله الحمد فى سيطرة عقيدة الخوف علينا لدرجة طغت على التفكير المنطقى و لو لثوانى بعقلنا فى أى حاجه نقابلها فى حياتنا .. يعنى الشريحه الى مريم قابلتها لو كانو فكروا لمده 3 ثوانى بعقلهم كده كانو حيلاقو ان الموضوع آمان جدا و مفيهوش أى حاجه تخوف .. " مفيش أى بيانات تدل على شخصيه الى بيملأ الاستبيان مطلوبة نوهائى " .. ده العالم كده وصلت لمرحلة فيها بيخافو حتى من ابداء رأيهم فى أى حاجه أو مساعده غيرهم ليطلع وفقا لنظرية المؤامرة مثلا متحرى سرى و بيجمع معلومات عن الطلبة ولا حاجه ( اللهم احفظنا ) :$ .. متهيألى ان ده هو الى كانو بيفكرو فيه ساعتها !!

طب و بعدين بقى فى الموقف ده ؟؟ الحل ايه يعنى علشان الموضوع ده يتغير فى عقول الناس ؟؟ بالمناسبة الحل الى بسأل عنه مش الى المفروض تقوم بيه الحكومة .. انا بسأل عن الحل الى المفروض احنا نعمله بيننا و بين بعضنا



شككونى فى نفسى :$




بصراحه بعد الموقفين دول بدأت اراجع نفسى تانى .. هو انا لو اتحطيت مكان الناس دى يا ترى كنت فعلا حساعد الطلاب الى جايه تملأ الاستبيانات دى ولا كنت حتعامل معاهم بنفس رد الفعل الى هما اتعاملو بيه ؟؟ .. و لا الموقف حيحكمه عنوان الموضوع الى بيعملو عنه الاستبيان و حنقى بقى مين الى املا الاستبيان بتاعه و مين الى حطنشه ؟؟

و فى وسط ما انا بفكر فى الكلام العجيب الغريب ده اذ احس بحاجه كده زى واحد اخدك قلم مفاجىء فوقك من الى انت فيه .. ايون .. القلم ده كان من ذاكرتى العزيزة باعتاهولى علشان انا بدأت اخرف رسمى .. حاجه كده زى ايـــــــــــــــه العبط الى انت فيه ده ؟؟؟ .. انت مش فاكره انك ولا مرة رفضتى تملى استبيانات لحد فى الجامعه .. كل ما حد يجيلك باستبيان و يوقفك و يطلب منك تمليه كنت بتقفى و تمليهوله ... مالك فيكي ايــــــــــــــــــــــــه ؟؟!!!!!

فعلا ساعتها افتركت انى عمرى ما طنشت حد طلب منى املا اى استبيان خاص بدراسته .. العالم الى نسمه و مريم و هديل قابلوهم شككونى فى نفسى الوحشين :,(


بس بصراحه من بعد الموضوع بتاع استبيانات أجريوم ده و انا اخدت عهد على نفسى انه حيزداد التزامى بمساعده اى طالب جايلى باستبيان عايونى املاه او حتى اقول رأيي فيه .. لان بصراحه الناس بتبقى تعبانه جدا و مستنيه الى يقدر مجهودها و تعبها ده .. مش ناقصين حرقه دم و بهدله من العالم الى مش بتقدر حواليهم .




سؤال أخير



الى فكرنى بكل الى فات ده من أوله لآخره هو ان دزء كبير من مشروع التخرج بتاعى السنه دى حيكون ميدانى و بعتمد فيه اساسى على المعلومات الى حاخدها من الدراسه الميدانيه بتاعتى ..

تفتكروا ممكن يحصل معايا نفس الى حصل مع نسمه و مريم و هديل التيرم الأول و انا بطبق الاستبيانات كمان اسبوع ؟؟؟


ربنا يستر

حالة توقف

نعلمكم ايها السادة الكرام .. انه سيتم ايقاف تلكم المدونة و ذلك نظرا لان الامتحانات " حتهل علينا :( " بدءا من يوم الاثنين الموافق 26 من هذا الشهر و حتى يوم الخميس الموافق 12 من الشهر القادم "

على ان تكون العودة لكم من بعد تلكم المدة التى نسأل الله ان يجعل مرورها علينا خفيفا لطيفا و بدون اصابات :(

نلقاكم بعد هذا الفاصل الطووووووووووووويل على خير باذن الله

و سلام الله عليكم و رحمته و بركاته


انتهى الاعلان :( :(

خبرين

الخبر الأول

كنت قلت فى التدوينة الى فاتت فى ردودى عليها يعنى انى باذن الله حنزل شغل المعرض هنا على المدونة .. انا فعلا كنت حملت الصور و صور المعرض نفسه كمان .. بس للأسف لقيت الصور طالعه ألوانها بهتانه خالص و مبوظة الشكل بتاع الشغل تقريبا كله .. فتم تأجيل الموقف الى ان يتم حله .. بس يا رب يتحل

____________________________


الخبر التانى بقى

باختصار شديد .. حنبدأ نحاول نلم نفسنا في المذاكرة علشان امتحاناتنا حتبقى يوم
26 من هذا الشهر باذن واحد أحد

قدامنا حاجات كتير جدا محتاجه تتلم .. ما بين محاضرات .. لقراءات خارجية .. لكتب .. لحاجات المفروض نلمها مع نفسنا بس باذن الله نلحق نلم الموضوع دعواتكو .. احتمال كبير جدا يعنى نشاط المدونة يكون بيسط الفترة الى جاية علشان بنحاول نستعيد صفاتنا كطلبة ليها مهمة تانيه غير تسليم الابحاث و التكاليف :)

مؤتمر التطور الاقتصادي و السياسي لمصر في مائة عام

فى ظل مئوية جامعة القاهرة يقام غدا و بعد غد مؤتمر التطور الاقتصادي و السياسي لمصر في مائة عام فى كلية الاقتصاد و العلوم السياسية و اليكم جدول أعمال المؤتمر اليوم الاول غدا

اضغطوا على الصور للتكبير :)

اليوم الثانى

زورونا :)

باختصار شديد خالص يعنى ..

الخميس الى جاى الموافق 8/5/2008 .. حيكون يوم التفوق فى الكلية و حيكون برضه يوم المعرض الفنى هناك

كل واحد يفضى نفسه معرفش ازاى و ييجى يشرفنا هناك

علشان حضرتى من أهل ذلكم المعرض

أيون حضرتك الابداع ضرب خلاص :)

يوم الخميس من 10 الصبح

عايزة اشوفكم كلكم فى فيبس

حستناكم :)

على هامش النتيجة .. بكلم نفسى

أيون بالظبط حضرتك النتيجه الى قعدنا مستنينها 21 يوم هنا و بعدين ظهرت هنا و الى واضح طبعا انها ما كانتش زى منظر العالم المنشكحة فى الصورة العبيطة الى انا حاطاها دى نوهائى آت أوول يعنى

واحد حيقول حالا : طيب و انت فالقه دماغنا ليه يعنى ؟؟ لما النتيجه مش عاجباكى ما تتلمى و تروحى تذاكريلك كلمتين ينفعوكى بدل ما انت قاعده تصدعينا


بمنتهى الروح الرياضية حقوله : انا مش بكلمك انت يا رخم .. انا بكلم نفسى .. بس بصوت عالى .. لو مش عاجبك شوفلك اى موقع للجيمز سلى وقتك هناك و ابقى تعالى وقت تانى نكون خلصنا يا آبا .. ثم ثانيا انا بكلم أهل المدونة .. الناس المحترمة الى بتقرالى و بترد على جنابى .. و مستحملانى اخر احتمال .. و مبسوطين انى بكلمهم هنا .. يعنى م الاخر برضه اطلع منها و هيه تعمر

طيب

يعنى الى حضراتكو على مشارف قراءته ده كلام بكلم نفسى بيه .. حتلاقوه ملخبط و مشخبط و ملهوش راس من رجلين و احتمال يكون فى اجزاء فيه ملهاش اى دعوة باى حاجه من اجزاء تانيه .. و أحب اديكم اوفر فيو عن الى انتو مقدمين عليه كده فى السريع .. ابشركم بان فى كلاب بتهوهو فى دماغى .. و ناس بتضرب بعض .. و قاعات مؤتمرات شغاله .. و عالم بتتكلم و ترد على نفسياتها جوه .. و ناس نايمة و عالم بتصحى فيها و ناس تانيه عايزة تنام و عالم غير الاولانيين بقى بيفوقوهم .. و هي حاليا بالظبط عاملة زى اخينا الى فى الفيلم ده






نهدى بقى و نشوف فى ايه ؟؟

ايه الحكاية بقى يا بنتى ؟؟

كان فى تيرم فات كان ملعبك شوية .. فى الحقيقة شويتين تلاته .. يعنى انشطة كتير اتزحمت على دماغ الواحد علشان ما نفعش تيجي فى مرحلة سابقة عن دى .. و بعدين كان تيرم عصيب بصراحة .. المواد كانت لطيفه اه .. بس دسمة .. كنت مستمتعه بيها اه .. بس اسلوب تناول المواد عقيم .. مناهج قد تكون محترمة اه .. بس دكاترة محتاجه اعادة تأهيل ..
اعداد طلبة فى المواد الاختيارى بتكون كبيرة و الدكتور مش فاضى لينا كلنا و وراه مليااااااار حاجه مسئول عنها
كم الاسيمنتس الى الواحد كان مبتلى بيها رهيب .. من كترها الواحد ما كانش لاحق يذاكر علشان يلحق يخلصها و يسلمها فى وقتها .. و كانت بتتكروت برضه لان التزاحم بتاعها ده كبير .. فمكنتش لاحقه اعملهم بضمير اوى او زى ما انا عايزة فكان الناتج بيطلع دايما اقل من المستوى الى ارغب فى انه يكون عليه


طيب ها لسه فى حاجه تانيه عندك ولا خلاص

ثوانى كده اشوف

طيب

اه لسه .. كانت حالتى النفسية سيئه جدا .. و كان فى مشاكل كتير فى كل حته و كلها كانت فى وقت واحد مع بعض .. من بين بيت لعائلة لدراسة لزملاء لاصدقاء لتلبك نفسى على تلبك عاطفى .. سخافات كتير حصلت و استنزفت وقت و جهد و فكر الواحد بغباء



مممممممممم


كملى سامعاك


الحالة العامة بتاعت البلد كانت بتكمل عليا كل يوم انزل فيه الشارع .. كل حاجه عينى كانت بتقع عليها .. كل كلمة ودنى كانت بتلقطها .. كل تفاعل كان بيتم بين الناس و بعضها قدامى او بينى و بينهم .. كل يوم كنت بنزل فيه الشارع باطلع بنتيجه جديده تضاف لكم النتايج الى عندى .. و ارجع تانى اعيد ترتيب الى طلعت بيه علشان ابلوره فلاقى ان فى حاجات كتير محتاجه تتظبط و ان الواحد عليه مسئولية كبيرة واى لازم يقوم بيها و ما بيقومش غير بربعها فساعات اكتئب اكتر و ساعات اتحمس انى ارفع من همتى علشان الربع يكبر و يبقى نص


اه .. و ايه تانى ؟؟


الحالة الدينية و الالتزامية كانت مش لطيفه بالنسبالى الى حد ما .. يعنى دخلت فى صراع غريب كده بين ما هو كائن و ما يجب ان يكون و اليات المواءمة بين الحالتين و ايه الى كان زمان بس ممكن ياخد شكل تانى فى تجليه دلوقتى .. و ايه الى لازم يفضل زى ما هو على شكله الاصلى .. و مسلسلات من التقييم الى كانت كويسه بس كلها وقفت عند حد التقييم فقط ..


مممممممممم

ايه كمان

ممم بس كده .. مش فاكره حاجه تانى دلوقتى


طيب حلو اوى

نمسك حاجه حاجه كده و نقول بسم الله

اتفضلى

يعنى انا ملاحظة من كلامك انك عمالة ترمى المسئولية على الدكاترة و على الدكاترة و على الدكاترة .. بس متهيألى الحقيقة مختلفه شوية ولا ايه ؟؟

يعنى اه انا معاكى فى جزء كبير من الى انت قلتيه .. بس برضه انت عليك جزء لا بأس به

ازاى ؟؟

حقولك ولو انى عارفة انك عارفة

بصى يا بنتى .. كان فى سوء تنظيم فى الوقت .. ايون كان فى سوء تنظيم فى الوقت .. بتهدرى وقت بالهبل .. ما ينفعش كده خالص .. ممكن تقللى الهدر ده شوية و تستغليه فى انك تخلصى شغلك بشكل افضل .. يعنى ليه لازم تزنقى نفسك زنقة البوبيز الى انت بتحطى نفسك فيها كل مرة ؟؟؟؟؟


عبد الرحمن كان عنده حق لما قالك بدل ما بنزنق نفسنا فى يوم قبل الامتحان ما كان قدامنا الشهر من أوله كان ممكن نوزع المذاكرة فيه


يعنى هو انا مش من حقى ارتاح شوية .. حرجع من الكلية بعد كل الوش الى فيها و بعد المشوار الى ما يعلم بيه الا ربنا ده .. من غير اى راحه ابدأ الشغل الى المفروض يخلص على طول كده !!! يبقى حفضل فى الدوامة دى مش حعرف ارتاح ابدا


لا مين الى قال كده .. الحكايه مش حتبقى بالشكل الرهيب ده .. انت عارفه انك تقدرى تعملى اكتر من الى انت بتعمليه بكتير بس انت الى مش قادره تقاومى نفسك شوية و تصحى الهمة الى نامت جواكى


نظمى وقتك عن كده و انت حتنجزى و حتعملى العجب كله .. بس انت خدى الخطوة و بداى فى لم الوقت الى بيتدلدلق ده .. حتى لو ما كانش ليك نفس .. اغصبى على نفسك شوية .. مش حنفضل نتدلع كده كتير يعنى .. عيب بقى


و بعدين الانشطة الى سيادتك دخلتيها دى كلها جت على حساب راحتك و على حساب صحتك جدا .. كان ممكن أوى تخلعى من كام نشاط بعد ما خدتى منهم الى انت عايزاه و خلاص .. بس المهم ان الكارثه دى ما تتكررش تانى نوهائى


انا عارفة انك عملتى مجهود كويس الى حد كبير جدا التيرم الاول فى المذاكرة كمذاكرة .. بس واضح من النتيجه ان مش ده المستوى المطلوب خااااااااااااااااااااااااااالص .. يعنى محتاجين نتلم شوية .. لأ .. فى الحقيقة نتلم كتير ..


بالنسبة بقى لموضوع حالتك النفسيه


هو فى جزء و هو الجزء الاكبر ربنا معاكى فيه .. انا و انت ما نقدرش نعمل ازائه اى حاجه ..


طيب بالنسبة للجزء الى نقدر نتخذ موقف حياله بقى ..هديل و مها و الله قالوها كلمة ارمى كل الى مش نافع يعنى .. ده الاتنين قربوا يجيلهم الضغط .. انا معاك ان انت تصرفك دينيا مقبول و سليم بس برضه فى ناس اصلا ما تستاهلش اى حاجه خالص
بصى انت كملى التعامل زى ما انت بكل ادب و احترام .. بس سيبك بقى من كل الى بيعملوه .. حاولى تكبرى الجى و تريحي الدى لان مفيش حاجة تستاهل .. و علشان ثوابك يكبر .. و كل الكلام الى انت عارفاه اكتر منى ده


بالنسبة للتلبكات فحتتحل باذن الله .. حنتصرف يعنى .. بس برضه حاولى تكبرى دماغك


بالنسبة لحال البلد .. فلا تعليق .. من حقك .. بس كملى يا بنتى و ارفعى همتك و ربنا يقويك


نيجي بقى للحالة الدينية .. فانت عارفه حترجعى تانى زى الاول ازاى .. ابدأى فى اسرع وقت ممكن .. و انت عارفه ان اول خطوة بس فى الطريق بتجر الى وراها بسرعة ..استمرى فى مسلسل التقويم حيجيب نتيجه باذن الله و ان تأخرت شوية بس حتيجي .. و خليكي فاكره " ان تنصروا الرحمن حقا تنصروا " .. ربنا يوفقك و يقويكي و يهديكي و يهديلك نفسك و فكرك و ينزل عليك سكينة وطمأنينة من عنده و يبعد عنك وساوس الشيطان و يحفظك من كل سوء يا رب


انا عارفه ان كل الكلام الى قلته ده انت عارفاه و حتى الى انا ما قلتهوش انت برضه عارفاه ما احنا الاتنين واحد :)


طيب هو انت لسه عندك حاجه تانيه تقوليها


اه طبعا أهم حاجه خالص


ايه هى ؟؟

انك تحبينى


نعم ؟؟؟؟؟؟

ايوة انك تحبينى .. انت بجد محتاجه تحبينى زيادة شوية .. فعلا عمرو كان عنده حق .. محتاجه تبقى المعامله اكثر آدمية من هكذا .. الولد قرب ينضم لقائمة اصحاب مرض الضغط و السكر و الانفلونزا من كتر ما بيأكد على الموضوع ده و الله

طيب هل انت نفسك فى ايتها حاجه ؟؟

اه

ايه قولى ؟؟

نفسى اتمرجح .. انا عارفة ان عمرو لما قلتله كده قالى بدأت اقلق عليكي .. بس بجد محتاجه اتمرجح و طبعا علشان اتمرجح محتاجه اخرج بديهي يعنى .. و شوية حاجات تانيه كده بقى .. بس خلاص

طيب .. انا متشكرة انك سمعتيني ..مفيش بقى اى حاجه كده للناس الحلوة الى صبرت لاخر البوست و احتمال تعقبلك كمان علشان عارفين انك حتستفيدي بكل كلمة حيقولوها فى تعقيباتهم ؟؟

اه طبعا فى

فين طيب

هنا

و قد أثبتت النتيجة ان العلم بالفعل يكيل بالبتنجان :$

يا مهون كل أمر عسير يا رب

بقالنا 3 أسابيع فى انتظار النتيجة ..

و لسه !!!!!!

نتايج كل الدفعات فى الكلية طلعت الا احنا :$

ادعولنا .. و ادعو للكنترول الكريم بتاع الكلية ربنا يفتح عليهم و يخلصونا بقى

تطور دراسات الاستشراق فى الاكاديميا الأمريكية

الاستشراق

تعبير سمعناه كتير

لكن

معلوماتنا عنه

محدودة

و ضئيلة

هو معناه ايه ؟؟

و بيدل على ايه ؟؟

و الغرب بيستهدف ايه من ورا دراسات الاستشراق دى ؟؟

محتاج تعرف ..


شاركنا فى ندوة عن


" تطور دراسات الاستشراق فى الاكاديميا الأمريكية "


لقاء مفتوح مع


د / تيموثى ميتشيل ............... أستاذ العلوم السياسية بجامعة نيويورك

د / خالد فهمي ............... أستاذ التاريخ _قسم دراسات الشرق الأوسط _بجامعة نيويورك


و يعقب اللقاء مناقشه مفتوحه مع الضيوف


تعقد الندوة فى تمام السادسة مساء يوم الاربعاء الموافق 26 مارس 2008 بكلية الاقتصاد و العلوم السياسية _ بقاعة 5

ننتظر تشريفكم لنا :)

العلاقات العربية الايرانية

العلاقات العربية الايرانية


مراحل وفترات من الهدوء و التوتر


التعاون و الصراع


لماذا هذا ؟؟


و


الي اين المسار ؟؟



محتاج تعرف ؟؟



وعاوز تفهم ؟؟



شاركنا في ندوة عن


" العلاقات العربية الايرانية "


حيتكلم عنها


د/ مصطفي اللباد ........ خبير في الشئون الايرانية و آسيا الوسطى

د/ نيفين مسعد ........ أستاذ العلوم السياسية بجامعة القاهرة

يعقب اللقاء مناقشه مفتوحة مع الضيوف

تعقد الندوة في تمام الخامسة مساء ، يوم الأثنين الموافق 17 مارس 2008 ، بكلية الاقتصاد و العلوم السياسية – قاعة (5)

حضوركم يعنى لنا الكثير :)

مغلق للامتحانات

سلام الله عليكم و رحمته و بركاته



ده اعلان ان المدونة واخدالها اجازة طويلة شوية لحاد 24 /1


ليه ؟؟


علشان بنمتحن




ادعولنا بقي كتير


و حتي اشعار آخر


فانى استودعكم الله الذى لا تضيع ودائعه

سأشتاق اليكم كثيرا

مفاتيح الشخصية المصرية

طول عمرهم بيقولوا المصرى

جدع

ابن بلد

عنده مرؤة

شهم

شجاع

كريم

بيحب اللمة

بس دلوقتى بنسمع:

أوامرك ياباشا

وأنا مالى ياعم

أنا عبد المأمور

أنا ماشى جنب الحيط

ياعم اللى نعرفه أحسن من اللى ما نعرفوش

جات عليا أنا

هى الدنيا جرى فيها إيه !!! هما الناس اتغيروا ولا إيه !!!!

عايز تعرف ؟؟

عايز تفهم ؟؟

تعالى نفهم مع بعض

" مفاتيح الشخصية المصرية "


ندوة هيشاركنا فيها و هيتكلم عنها:

د/ على ليلة ............... . أستاذ علم الاجتماع - جامعة عين شمس

د/ محمد المهدى ............ رئيس قسم الطب النفسى - جامعة الأزهر

يعقب اللقاء مناقشه مفتوحة مع الضيوف

تعقد الندوة في تمام الخامسة مساء ، يوم الأربعاء الموافق 28 نوفمبر 2007 ، بكلية الاقتصاد و العلوم السياسية – قاعة (5)

يسعدنا تشريفكم لنا :)

البؤسااااااااااااااء

.. حينما يدق الملل بابك .. تشعر و كان العالم يتوقف عن الحركة

.. تمر عقارب الساعه ببطء شديد كما لو كانت لا تتحرك تماما

.. تشعر و كأن الدنيا ضاقت بصدرها و كأنها تفتح الباب لتعطيك " شلوتا " كبيرا خارج نطاقها

.. لحظات الملل قد تكون لحظات ابداع عندما تحاول كسرها .. او حينما تحاول تسجيلها بالقلم

.. لحظات الملل من الممكن ان تكون لحظات مراجعة لنفسك فى كل أمورها السابقة

!!لحظات الملل من الممكن ان تكون نهاية حياة انسان فى مكان ما على ظهر هذه البسيطة

ـــــــــــــــــــــــــــــــــــــــــــــــــ

قاعدة .. و ربنا يكفيكو شر القاعدة الى كنت قاعداها

مردج رخام .. تكييف درجة حرارته أسقع من القطب الشمالى .. أبلة فضيلة عماله تحكى " هيه المفروض بتشرح "

بس هيه فى الحقيقة كانت بتحكيلنا قصة قبل النوم !!

الوقت داخل على 4 العصر .. بقالنا نص ساعة كاملة على دى الهيئة ..

هيه أول ما دخلت شخطت شخطتين .. وطبعا نتيجة جينات " شعب تلمه زمارة و تفرقه عصاية " العالم كشت فى جلدها

و كله حط لسانه جوه حنكه و هووووووووووس خالص .. لو رميت دبوس يرن يا ربى !!!!

!!!!ده ايه الهدوء ده يا دفعة مهيسه ؟؟؟

.. شوية شوية الواحد بدأ يسمع ناس بتعطس .. و عالم بتكتك من السقيع الى بيلف المكان

.. أبله فضيلة عماله تحكى يا ولاد .. و العالم بدأت تناااااااااااااااااام

تتابع عيناى عقارب الساعة ..

3:30

3:31

3:32

3:33

3:34

3:35

هيييييييييييييييييييه و قفلنا خمسه على بعض

الله يمسيكى بالخير يا سالى يا خليفة .. فين ايام ما الواحد ما كانش بيبقى عايز يخلص المحاضرة .. و يستنى الى

بعدها بفارغ الصبر

فهمت كلمة

ابن خلدون لما همس قبل ما طنط فضيلة تبدأ و قالى : " دهاء شوفى بقى الشغل العالى " .. يا ريتنى كنت فهمتها بدرى شوية .. أو حتى كان قالها بدرى شوية

" آه يا دنيا تعبنا فيكى اتاريكى ماشية عكس "

عينى عليكو يا طلبة سياسة .. وأنتو اتحولتوا كتبه .. لأ و ايه .. صمٌ .. بكمٌ .. عمى .. و الا حتبقى سنتك بيضة منك ليها ليها له

ـــــــــــــــــــــــــــــــــــــ

ماذا تفعل لو كنت مكانى ؟؟؟؟؟؟؟؟؟؟

.. حالة تجمد شبه كلى فى النصف السفلى عندى .. و شبه روماتويد بدأ يغزو النصف العلوى

3:45

3:46

3:47

3:48

3:49

3:50

!!!! يا مهون كل أمر عسير يا رب

ياللهول !! أبله فضيلة تفضلت و قامت من كرسى العرش على السبورة تشرح الخريطة بالقلم الماركر ..

!! الله !! طنط طلعت كائن متحرك متفاعل اهى .. شوف الزمن يا برعى

الله يرحمك يا سيبويه .. لو كان عاش الراجل للمحاضرة لخر صريعا من السكته الدماغية

مهو لما نجر الفاعل و نرفع المضاف اليه و ننصب ع الطلبة .. احم .. قصدى و ننصب ظرف الزمان .. و خلى بالك معايا بقى .. احنا معانا فى نفس ذات اللحظة تجمد كلى دلوقتى فى السيقان و منطقه الحوض .. و روماتويد متأخر الحالة فى النص الفوقانى .. و الساعة الان 3:55 و معرفش كام ثانيه .. و طنط راسمه البلقان على يمين المضايق التركية

!!!! مساااااااااااء الافيــــــــــــــون

ــــــــــــــــــــــــــــــــــــــــــــــــــــــــــــــــــــــــــــــــــ

!! آآآآآآآه على التعليم فيك يا مصر

نوع من الدكاترة لازم يعدموه فى الجرد الجديد .. نظام اكتم العيال .. و افضل كر كر كر كل الى عندك .. المهم .. العيال نايمة .. و السكوت علامة الرضا يا حاج .. على بركة الله

!! الولد للبنت يا ام حسين

!!! ايه الى انا بقوله ده ؟؟؟ انا شكلى لسعت

!!! لا لا لا .. ده الفيوز الخامس على ايدك الشمال و انت داخل فى النخاع المستطيل بدأ يكون تلج

افتكرت منظر محمد هنيدى وهوه مدفون فى القطب الشمالى فى فيلم جاءنا البيان التالى

حموت و اعرف العالم دى بتكتب ليه ؟؟

التلاته الى ورا ... خرق صوت فضيلة ودنى .. العيال زهقت يا حبة عينى .. سيبيهم يفكو عن نفسهم شوية

ما علينا .. نرجع تانى للتعليم المصرى ..



مهزلة !! سؤال بيخبط فى دماغى حالا .. هوه ليه ما بيتعملش للدكاترة انترفيو قبل ما يتعينوا ؟؟؟

!!! المفروض اننا فى كلية محترمه يعنى

حاجه مهمة يا ولاد الحلال الهى يا رب الى يبقى فيكو وزير تعليم عالى او واطى يحطها فى اللايحه و يتم التنفيذها فور تولى معاليه المنصب ..

( على كل استاذ او داكتور فى مهة " تعليم " الطلبة .. انه يقدم شهادة تبرىء جانبه من أى مرض نفسى سيكولوجى عويص و مكلكع .. على ان تكون الشهادة من اى داكتور برضه مشهور و خارج نطاق التأمين الصحى )

الساعه 4:05 يا مسهل يا رب !! فاضل 25 دقيقة على المحاضرة .. هييييييييييييييييييييه

الله أكبر .. العالم بدأت تتذمر و مش طايقه و عايزة تروح

كفاية .. حرام ..

كفاية .. حرام ..

لا طبعا ده مش صوت الطلبة .. ده بس صوت امنياتهم ..

فضيلة : الى عايز يخرج يخرج .. او تكملو الحتة الباقية من الكتاب و نلم و نمشى

صدح صوت من خلفى تقريبا كده اعرفه .. : يا دكتور الى عايز يخرج يخرج .. فى ايه ؟؟

آآآآآآآآآه .. شكلى كده فهمت ابن خلدون غلطت خاااااااااااااااااااااالص لما قالى الجملة اياها فى أول المحاضرة .. طب وليه يا ابن الحلال كده ؟؟ تخسر زمايلك و اصحابك ليه طيب ؟؟ .. معلش حنعمل احنا الكبار المية ..قصدى المرة دى

ـــــــــــــــــــــــــــــــــــــــــــــــ

الشعب المصرى ده شعب صبووووووور بشكل !! .. اعجاز علمى متحرك على الارض

التعليم فى مصر نااااااااااازل يشرب م الترعة .. ولا خط طفل عنده 4 سنين فى كى جى ون

نفسى و منى عينى انزل اقف جنب فضيلة هانم أشوف منظر العالم بشكل شامل كده عاملين ازاى ؟؟ .. و لو انى متوقعه

أفيون

كُلّة

حشيش

هروين

برشام

!! كله منه يا شقيق

ــــــــــــــــــــــــــــــــــــــــــــــــــــــــــــ

4:15

طنش تعش تنتعش

فينك يا اسماء دلوقتى تشوفى الى بيحصل فيا

طب اطنش المهزلة دى ازاى ؟؟؟؟

يا رب رحمتك الواسعة

الحالة الحرارية : حموووووووووووت م البرد

!!! حرام عليك يا فضيلة بقى .. حرام عليك .......ده مش انا .. ده الى جنبى يا عينى بدأت تكلم نفسها

ـــــــــــــــــــــــــــــــــــ

4:23

!!! اللهم ارزقنى ببطانية من السماء

ـــــــــــــــــــــــــــــــــــــــــــ

فضيلة : فرنسا رفضت انها تلتزم

سموى داخليا طبعا : و الله عالم ميه ميه .. عارفه تاخد حقها ازاى .. حسره علينا احنا .. ثابت على سياسة النفس الطويــــــــــــــــــــــــــل

!!! أول مرة اعرف ان بالى طويل كده

أمه دعياله و الله .. صاحب النصيب :)

مهو مش اى حد يستحمل الى انا مستحملاه دلوقتى ده ..

!!! يا رب بطانية لحسن انا حطلع مجففه من هنا

ـــــــــــــــــــــــــــــــــــــــ

4:26

هيييييييييييييييييه مروااااااااااااااااح