Sunday, October 7, 2007

بسم الله نبدأ




اسجل اولى خطواتى فى عالم التدوين الذى طالما تابعته من بعيد ..









يا مسهل ..












بما ان دى اول تدوينة بشكل رسمى يعنى على مدونة و حركات من دى .. تفتكروا المفروض اقولكم ايه ؟؟؟ و يا ترى انتو متوقعين
تقرأوا ايه فى اول تدوينة عندى ؟؟؟

مممممممم

طيب خلينا نفكر تفكير منعكش كده ..

ـــــــــــــــــــــــــــــــــــــــــــ


بصو بقى .. سموى حفظنى المولى عملت المدونة دى لعدة اسباب

اولا : بتجرب ..

ثانيا : عايزة تثبت لنفسها شوية حاجات كده على جنب ..

و ثالثا بقى : منظور جديد الناس تشوفنى من خلاله .. يعنى الواحد مننا جواه حاجات كتير مش كلها بالضرورة لازم تظهر فى الحياة بره

.. الشوية الى ممكن يكونو جوه لسه او ما نسميه نحن اهل السياسة " الكامن " فى الموضوع دوروا عليه حتلاقوه هنا ..

انا برضه " و اعوذ بالله من كلمة برضه " مقتنعه بحاجه كده .. انعكست فى اسم المدونة

ايون اسم المدونة الى شايفينه منور فوق ده " عيش اللحظه " مستغربين ليه ؟؟

هوه مش برضه يا جماعه مشوار ال1000 ميل عبارة عن خطوات !!

و الجبل ما هو الا ملايين من حبات الرمل !!!

و البحر بلايين من قطرات المطر !!!

و الجنيه المصرى المتعوم شلنات و برايز !!

حياتنا هيه كمان مش اقل من الجنيه المتـ..... احم .. قصدى هيه كمان عبارة عن لحظات ..

ايوة .. لحظات .. لحظات كتير مختلفة بتمر علينا .. كل لحظه منهم بتضيفلنا حاجه جديده بتخلينا مستعدين نستقبل اللحظة الى بعدها ..

كل لحظة هي جزء من حياتنا .. لو حاولنا نهرب من اى لحظه فيهم حتبقى الصورة النهائية مشوهه و غير مكتمله

لو حاولنا نعيش كل لحظة منهم حنلاقينا بنستمتع برسم طريق حياتنا

لو عيشنا كل لحظة بصدق حنلاقينا قادرين نفهم حاجات كتير بتحصل حوالينا و بنلعن فيها العيشة و الى عايشينها مرات كتيرة مع اننا احنا الى مسئولين عنها بالاساس

لو عيشنا كل لحظة باخلاص حنقدر نستوعب واقعنا و ندرس مشكلاتنا و نبتكر الحلول و نستفيد من النتايج

كل لحظة فى حياتنا ليها طعم مختلف و أثر مختلف ..

حتلاقوها ساعات بتضحك

و ساعات بتكشر

مرة بتتخانق

و مرة بتهيس

و احيانا بتتفلسف

و ممكن تستغبى

و مفيش مانع تتكلم لغات كمان

اختلافات كتــــــــــــــــــــــــير اوى بس أهم حاجه انك فى الاخر تـعيش اللحظة





at

11 comments:

  1. Sanaa bashaOctober 15, 2007 at 1:15 AM

    لأ لأ مش ممكن
    احنا عاوزين تشريفة لمولانا دهاء سياسى حفظها الله
    بجد ،بلوجر وأهل بلوجر ربنا معاهم

    هشششششش
    اوعى وشك انت وهو وهى
    المعلم دهاء بنفسها شرفت وتكرمت وتفضلت وتأنتكت وادتنا صفحة فى هذا السايت العظيم
    ربنا معاكى يا رفيق
    انطلقى
    واول ما يرجع البلوج بتاعى للحياة
    هتلاقى اسم سعادتك على اللينكات عندى
    ادعى بس للبلوج بتاعى يفوق بالسلامة
    وتشريفة تانية للمعلم الكبير اوى
    تربترتبترتبترتييييييت

    ReplyDelete
  2. hoda omranOctober 15, 2007 at 1:47 PM

    مبروووووووووووووك ياهوبة
    ومستنين تورينا لحظاتك وهتعيشهلنا ازاى
    بس والنبى بلاش سياسة صرف
    :)

    اه صحيح المدونة شكلها تحفة
    ماهو طبعا مدونة فنانة
    :)

    ReplyDelete
  3. safa7_karmoozOctober 15, 2007 at 10:18 PM

    وقد تفضل سيادته بافتتاح المدونة

    انا اكتر كلمة عجبتنى دى "

    بصو بقى .. سموى حفظنى المولى عملت المدونة دى لعدة اسباب"

    اطال الله فى عمر اميرتنا...وزهزه الله شعبها فى عصرها

    هههههههههههههههههههههه

    على فكرة شوقتى الواحد انه يتابع تانى بوست ليكى

    فياريت مش تبخلى علينا..:)

    ReplyDelete
  4. دهاء سياسيOctober 16, 2007 at 10:07 PM

    سناااااااااء باشا.. يا الف اهلا و مرحبا .. ربنايا رب يقوم مدونتك بالسلامة ..
    ما تحرميناش منك يا باشا
    ـــــــــــ

    هدى .. الله يبارك فيك ..

    ـــــــــــ

    مشمش .. نورت المدونة والله .. و يا رب اشوفك هنا على طول

    ReplyDelete
  5. simplicityOctober 16, 2007 at 10:29 PM

    الف مبروك جدا جدا جدا
    عالمدونة الجديدة
    شرفتييييييييييييييينا
    بجد

    مدونة موفقة باذن الله وانا حساها هتبقى جميلة جدا

    واتحفينا بقى ......
    :)

    كفاية كده عليكي...الله
    :) :)

    ReplyDelete
  6. AnonymousOctober 16, 2007 at 11:26 PM

    الف مبروووووووك يا هبة على المدونة
    شكلها عجبني اوي....تحسي انا بناتي كده


    وجميل اول بوست مشوق ويشد الواحد انه يتابع

    مبروووك يا استاذة

    ReplyDelete
  7. دهاء سياسيOctober 20, 2007 at 11:15 PM

    aria منورانى و الله

    و باذن الله حتكون جميلة بوجود تعليقاتكم فيها
    ـــــــــــــــ
    to paradise

    الله يبارك فيك .. و يا رب اشوفك هنا دايما

    ReplyDelete
  8. AnonymousOctober 27, 2007 at 7:25 PM

    جامده موووووت يا دهاء
    طبعا استاذه ورئيسه قسم

    ReplyDelete
  9. دهاء سياسيOctober 30, 2007 at 4:32 AM

    snowy
    يا مرحبا يا مرحبا :)

    ReplyDelete
  10. Moustafa`December 5, 2007 at 4:51 PM

    انا بحب ثلاجات كريازى 2 فى واحد
    نا قعدت ادعبس على علامه الضرب مالقيتهشا
    لئيمه هى تلك الكيبورد الشقيه
    اهه..هو الكابتن ده جاى غلط ولا ايــه(يصرخ متسول يلعق قصبه ممتده تستقر فى فمه ومن الناحيه الأخره تمتد لتنتهى فى إناء زجاجى ذو سداده من فوق ومن تحت حاجه كده غريبه مش عارف اسمها)سامع واحد فكيك من خلف الستاره يصرخ..إنها الجوزه
    شاطر يا فالح نشنت..بس بس اسمها الشيشيه يا فكيك
    ده على آثار بوستك اللى فات بتاع المحاضره دى
    احنا بنبقى كده فى محاضرات الطب ربنا يكون ف عونا والله
    بجد البوست اللى فات حلو
    بس انا رزاله بقه حبيت ارد هنا علشان اشوف بدايتك وارحب بيكى من الاول
    واباركلنا بيكى
    وباركلك ع المدونه والبيت الرائع ده
    ربنا يعينك وتدينى بوستات (وجبات دسمه9م النوع الطوزيل ده
    بموت ف حاجه اسمها بوست طويل او قزعه
    مش بحب الوسط
    يا اما طويل اقعد انزل بالماوس ما تنزلشى
    يا اما قزعه شايف نهايته وبدايته
    ع العموم سعدت بالدرشده وطبعا مش هشيد ببراعتك تانى لتتغرى بنفسك
    ربنا يبارك فيكى بجد
    جزاكى الله عنا كل الخير
    السلام عليكم
    سلاموو

    ReplyDelete
  11. دهاء سياسيDecember 21, 2007 at 1:09 PM

    السلام عليكم و رحمة الله و بركاته

    sagittarus
    أول مرة أشوف التعقيب ده من كام يوم بس .. معذرة

    ربنا يعينا و يعينكم على التعليم اللطشيف ده :)

    و جزانا و اياكم يا فندم ..

    كل سنة و حضرتك طيب بمناسبةالعيد :)

    ReplyDelete