عيد أضحي سعيد :)

كل سنة و أنتم بألف خير يا رب :)

بيبو فرقع جي جي

يا ترى فاكرين اعلان فودافون الى تحت ده ؟؟؟ سواء فاكرينه أو لأ .. شوفوه و بعدين نكمل :)








و انطلاقا مما انتهى به الاعلان .. فانا خلال هذه التدوينة بطولها و عرضها بارفع شعار " يمكنك الاعتماد علينا " :)


طيب نظرا لأن الانسان كائن اجتماعي بطبعه كما قال ابن خلدون " الله يرحمه " .. و بما ان هذا الكائن من سماته انه يعيش و يتعايش مع البيئة المحيطة من حوله بما فيها من انسانات تانيين .. و حيث ان هذه البيئة تعج بأخبار بتتحدف على ودان الواحد كل شوية و الى بيكون هدفها الأساسي العمل المباشر على المستقبلات الحسية لديه احيانا لاختبارها و أحيانا أخرى لتدميرها .. و حيث ان البنى آدم مننا معندوش غير مرارة واحدة .. فقررت انى حكتب بقى لأن كده الموضوع حقيقي زاد عن حده يا جدعاااااااااااان


واحد حيتكرم و يسألني و يقولي : و ايه هو الموضوع الى انت عامله عليه كل ده يا حاجة ؟؟


حقوله باختصار أحسد عليه و تحسد عليه شبكة فودافون فى آن واحد ان : بيبو فرقع جي جي !!!!!!!!


هو ده بالظبط نمط الاخبار التى تتناقلها أحاديث الأصدقاء و المعارف و الأقرباء بشدة و بكثافة مفزعة للغاية فى الأربع سنوات الأخيرة تحديدا .. و ان كان نمط " الفرقعة " يختلف ويتنوع من قصة لأخرى و بين سبب وآخر

كنت أتحدث مع احدى الصديقات من قريب عن فزعى من انتشار ظاهرة الانفصال بين " المتزوجين حديثا " تحديدا و " المخطوبين " عامة فى الفترة الأخيرة .. فأخذنا حديث مطول تفصيلي .. أكد لى " حبة معلومات بنت ناس كنت لسه بشك فيهم " مما دفعنى لأطلق لخيالي العنان فى التحليل .. و لـ " كبيوردي " العنان فى الكتابة .. و لكم الحق فى النقاش ، النقد ، أو الفضفضة





من أول السطر ...







تبدأ الحكاية بان بطل قصتنا المغوار المدعو : بيبو ، - فى الأغلب الأعم - كان يعرف بطلة قصتنا الامورة : جي جي بقاله فترة ، معرفة - قد تكون بريئة للغاية و قد لا تكون " ما انا اطلقت لخيالي العنان بقى "- المهم بقاله فترة من الزمن ليست بالقليلة متابع الآنسة من بعيد لبعيد - فى الكلية ، أو في الشغل ، أو من بلكونة الجيران - يمكن يكونوا اتكلمو مرة أو اتنين .. اتناقشوا فى حاجة ، المهم ان بيبو حس كده ان جي جي بدأت تشعشع في دماغه فقرر انه يلزقلها شوية على أمل من المسكين ان " المضروبة " تفهمه و تحس بيه ..

و بعد أن مرت مرحلة " اللزقة السودانى " دى على خير و فهم كل واحد فيها مقصد التانى كويس .. و تجاوب الطرفين تجاوبا ايجابيا مع بعضهما " سواء فى نطاق الشرع و العرف و اللائق أو بانحلال و بجاحه و ع البحري " - مش محتاجه أفكرك كل شوية بانى أطلقت لخيالي العنان .. مشيها توماتيكي فى كل التدوينة بقى بعد كده -


و خد عندك 3 سنين حب و غراميات .. و سنة و نص خطوبة .. و 6 أو 7 شهور عقد - و في بعض الأحيان قد يتطور الموقف لاننا نضيف سنة جواز وعيل -

و يأتى الخبر الكارثي على لسان احد المتطوعين : عرفتو الى حصل ؟؟ بيبو فرقع جي جي !!!

مما قد يدفع بعض المتطفلات بعد مصمصة الشفايف طبعا بسؤال الراوي " و في قول : الناريتور " : ليه كده بس ؟؟ زعلتني ؟؟

فيأتى الرد الأسطورى : بانه ما كانش فى بينهم تفاهم ، او انه ما حصلش نصيب !!


في هذه الحالة اعزائى القراء اسمحولى انى أضم صوتى لصوت فدوى و اقول بحس جهورى مجلجل : نعم يا اخويااااااااااااااااااااااااا !!





نقطة نظام ...







علشان نقدر نشوف ايه الى بيحصل ده حنلاقينا لازم نتكلم فى كام حاجه متهيألى ممكن نعددهم فى الاتى :


1. حاجات تتعلق بالسياق المحيط و دى حنلاقي فيها : التربية و الاعلام


2. حاجات تتعلق بالفكر عند الولد و الفكر عند البنت و دى حنلاقي فيها : معايير اختيار ، اتجاهات تحليل ، أساطير زواجية


3. حاجات تتعلق بسلوكيات خاطئة ، و صور ذهنية مسبقة غير صحيحة


خلينا ناخدهم واحده واحده كده بالهداوة و حاولوا تربطوا معايا الى بتقرأوه فى كل نقطة منهم لأن كله مشبك مع بعضه







سياقات محيطة ...






لما نيجي نتكلم على السياق المحيط بعملية اعداد الشاب أو الفتاة الفكرى و النفسي و الى بتكون مرحلة مهمة جدا و مؤثرة جدا على اى منهما فيما يخص موضوع الارتباط .. و الى بيأثر أكتر فى موضوع فركشة اى علاقة زوجية .. حنلاقينا لازم نجيب سيرة التربية و الاعلام ..

طيب خلينا ناخدهم حاجه حاجه كده و نشوف ايه المشكلة بالظبط .. بس قبل ما نبدأ الى يقرأ حاجه لازم يعرف ان الصورة مش واحده فى كل الأسر .. لكنى أعرض للاتجاه الغالب الموجود فى كثير من الأسر المصرية




التربية




لو جينا نبص للأسرة المصرية دلوقتى و انا باختص هنا فى الموضوع ده الاسر ذات المستوى الاقتصادي المعتدل فما فوق .. حنلاقي ان كل من البنت و الولد " و خاصة الولد " بيتربى تربية ناعمة أوى .. كل الطلبات مجابه .. و الحياة متقضية بالطول و العرض .. فلوس موجوده ، خروج براحتك يا حبيبي ، سهر برة ماشى ما يضرش مهو ولد و ما يهموش
عايش كل حياته من ساعه ما بدأ يعي ما حوله لحاد ما اتخرج من الجامعة و هو لا يتحمل أى مسئولية نهائيا الا فيما يخص بعض الرفايع و الى ساعات بيقوم بيها و هو متأفف قوى
فهو لاقى الى يأكله ، و يرتب مطرحه ، و يسال عليه ، و واخده على هواه ع الآخر يعنى

كذلك البنت ، و ان كان الموضوع بيكون معاهم أقل من الأولاد و ده بيرجع لطبيعتها كبنت و التى تستغل فى البيت فى كثير من الأحيان

فى نهاية الأمر البنت أو الولد بيتربوا تربية تخلو من قيمة " تحمل المسئولية " فترة كبيرة من حياتهم ، ما بيتربوش على ان كل واحد فيهم عليه انه ياخد قراره بنفسه ، انه يختار الى شايفه يناسبه ، و انه هو الوحيد الى عليه انه يتحمل نتائج قراره ده ما دام اختاره بكامل ارادته و كامل قواه العقلية ، ما بيتربوش على انهم مسئولين عن حل مشاكلهم بنفسهم ، على انهم ما يعتمدوش على ابويهم فى تسيير شئون حياتهم ، و تنظيمها ، و حل مشاكلها " و ان كان مطلوب المساعده فى حل المشاكل و ليس القيام بحلها " ، ما بيتربوش على اشراكهم فى اتخاذ قرارات محورية فى الاسرة ، على اشراكهم فى مشاكل العيلة ، انه يغرس فيهم ان آرائهم ليها قيمة و فايده و يمكن الاعتماد عليها فعلا
فالأهل ما بيسعوش لغرس هذه القيمة فى أولادهم منذ الصغر بحجة ان كل همهم انهم يريحوا أولادهم .. و بالتالى نلاقينا بنعانى اليومين دول من انعدام " المروءة و الرجولة " فى المجتمع .. و بالتالى برضه بتكون صدمة التحول فى حياة أى ولد أو بنت من هذه النوعية بعد الجواز .. لانه بيلاقى نفسه فجأة مسئول عن بيت كامل بكل ما يتطلبه من رعاية و اهتمام ، و مسئول على الأقل عن شريك حياة له عليه حقوق يجب مراعاتها جيدا ، و أحيانا مسئول عن أطفال عليه تجاههم التزامات متنوعة و متعددة . في حين انه كان متوهم و متخيل انه بعد الجواز حيعيش بمزاجه بدون قيود عليه أو أى التزامات تنظم شكل الهرجلة الحياتية الى عايش فيها .. و ما حطش فى باله انه عليه انه يلتزم بشكل الحياة الى حيتفق عليها مع شريكه علشان الحياة الزوجية لا مكان فيها للانانية بما انها قائمة على المشاركة و التشارك .

بالظبط كده زى لاعب كرة قدم نازل الماتش متحمس جدا بس ما كانش مسخن كويس و بعد أول 15 دقيقة جرى فى الملعب جاله شد عضلي فملاقاش حل قدامه غير انه يخرج من الملعب خالص و يسيب المباراة !!






الاعلام





اعلامنا الموجَّه " المتغرب " - ربنا يطولنا فى عمره - بيلعب على كذا محور فعالين جدا فى هدم صور ايجابية كتير عن الحياة الزوجية و تسطيح النظرة للزواج ، و اختزال الحياة الزوجية فى شوية حاجات مادية و شكلية ،

أولا : تلاحظ كده ان كل افلامنا البهيجة و مسلسلاتنا الوردية على طول مطلعة ان الحياة كلها بمبى و كله بيحب بعضه ، فالشباب... ولاد و بنات... شايفين العلاقة بين الجنسين بسم الله ما شاء الله رؤية هوليوودية رومانسية لولبية ...ده يحب علي نفسه و دي تحب علي نفسها...* و هى لا تجسد واقع الحياة العادي و الطبيعي للأسرة المصرية وبالتالى فببعدها عن الواقع و باثبات نفسها امام المشاهد فى اى لحظة يريد ان يشاهد اى من اعمالها العظيمة جدا ما عليه سوى ان يضغط على زر واحد و يجلس " متنحا " ، " منوما مغناطيسيا " ، مستقبلا بلا اى مقاومة لما يلقى اليه من أفكار ، تشكل فكرا و صورا ذهنية معينة مختزلة الحياة و العلاقة الزوجية فى ابعاد مادية محضة تتعلق بشكل البيت المصري ، و شكل البيه " الزوج " و الهانم " الزوجة " و تركز فى رأسه بأن الزواج ماهو الا صراع بين الاثنين ، و على الذكى فيهما ان يفترس غريمه سواء بالوسائل العنيفة أو بالوسائل الخفية المخملية ، و ان العلاقة الزوجية ما هي الا " صفقة " و عليك أن تدرس كيف تخرج منها مستفيدا أقصى استفادة ممكنة !!
و تلقى بكل هذا التشوه الفكرى المقدم فى الصورة السابقة فى اللاشعور الخاص بالشاب أو الفتاة و التى يستدعيها وقت الزواج ليفاجأ بأنه " اضحك عليه آخر حاجة "


ثانيا : شكل البشر الظاهرين على الشاشة الصغيرة .. شكلهم بمعنى مقاييس الجمال و الجاذبية الخاصة بكل من الولد و البنت المعروضين على الشاشة قدام الشباب و الفتيات طول الليل و النهار .. و الى بتكون غاية فى الزيف و الافتعال و محدش بيفكر فى ده خااااااااااااااااااالص

فالولد و هو قاعد يتفرج على التليفزيون فهو شايف فتاة الاعلان ، بطلة الفيلم ، بطلة المسلسل ، بطلة الفيديو كليب .. جميلة ، و بيضاء ، و شعرها ناعم ، و جسمها متناسق ، و رفيعة ، و جلدها يتمتع بالصحة و اللمعان ، و يخلو جسمها اللولبي من البقع او التجاعيد او الترهلات أو اى حاجه ممكن كده تعكر مزاج سيادته و هو بيتفرج

البنت هى كمان و هى قاعدة تتفرج على بطل الفيلم ، المسلسل ، المذيع ، المغنى ، الاعلان ، العفريت الازرق .. شايفه واحد طويل ، و عريض ، صحته كويسة ، رياضى للغاية ، العضلات بتنط من كل حته ، و فاتح القميص لحاد وسطه ، و وسيم ، و رقيق ، و دمه خفيف ، ولا عنده كرش ، ولا السل واكله و بطنه لازقة فى ظهره من قلة الأكل

بس الى هما الاتنين مش واخدين بالهم منه خالص بقى و هما عمالين يستقبلو الشكل المعروض قدامهم على الشاشة بكل سذاجه ان هذا الشكل مصنوع صناعه محترفة .. و ان كل الى هما شايفينه ده سواء بنات او شباب هو نتاج الميكياج ، و تظبيط الكاميرا ، و تظبيط الضوء ، و تظبيط شكل الحركة و الوقفه ، و ساعات كتير تظبيط البنى أدم الى ظاهر/ ظاهرة على الشاشة بالكمبيوتر شخصيا !!!


و انه لو شاف نفس البنت الى بيتفرج عليها على الشاشة على الطبيعة حيلاقيها حاجه تانيه خااااااااااااااااااالص غير ما بتظهر على الشاشة و حيفاجأ انها سبحان الله زى باقى البنات الى بيشوفهم فى كل حته حواليه فى الدنيا !! لأن الشكل الى بيشوفه على الشاشة ده ملهوش أى وجود على أرض الواقع !! و ان كل الغرض من تقديم الاعلام لهذا الشكل ان و حضرتك قاعد تتفرج عليه " هو " - و الى ممكن يكون واحد مخه تعبان ، الغرب ، عالم موجهه بشكل معين - عمال بيقدملك و يرسملك و يقنعك ان هى دى مقاييس الجمال و مفيش غير كده ، و ان اى حاجه تانيه ما تبصلهاش ، و سيادتك بكل تلاقائية عمال تهز راسك دليلا على الموافقة و انت مش واخد بالك ان الى هو بقدمه ده بيعكس لب و أساس الفكر الغربي المتعفن الخالى من أى قيم و القائم بالأساس على المادية المفرطة فكل ما هو مرئى و ما هو ملموس فهو حقيقة .. و اى شىء خفى أيا كان هو ايه فهذا لا يعترف به .. و ده متسق جدا مع طبيعه الشكل الحاكم لجوانب حياتهم المختلفة

لأ .. مين قال ان هى دى مقاييس الجمال ؟؟ هل البشر كلهم اسطنبه واحدة علشان تبقى مقاييس الجمال الخاصه بيهم واحده بالشكل ده ؟؟
طيب و راح فين بقى الجوانب المتعلقه بالروح و الشخصية و الالتزام و الفكر و النشاط و ما الى ذلك من جوانب معنوية غير ملموسه على الشكل المقدم على الشاشه ؟؟

أصل المتلقى العزيز مش واخد باله ان لو دى هى مقاييس الجمال بالنسبة للشاب أو الفتاة فكده شباب مصر وبناتها بقى المفروض يرموا نفسهم فى النيل !!

و مش واخد باله برضه ان المجتمع الغربي عامة و الأمريكي خاصة - و الى هما السبب فى البلوة دى أصلا - بدأو من كام سنة فاتو يطلقو لعلماء النفس المساحة الكافية لانهم يعملو حملات توعيه للشباب و البنات فى المجتمعات هناك بان : يا جماعه الى انتو بتشوفوه على الشاشة ده مش حقيقي و ان الاعلام من كتر ما بيركز على انه يطلع الشكل البراق للبنت او للولد على الشاشة فده حيعمل كوارث فى المجتمع منها العقد النفسيه و منها انهم بيدفعوا الشباب و البنات للبحث عن القشور المادية فقط فى كل منهما و دفن الجوهر تماما فى تربة طولها 30 فى 25 متر !!

و علشان كده لو تلاحظوا ان الاعلام الغربي بقاله فترة بيطلع فتيات اعلان عندهم نمش ، و شكلهم مش حلو أوى يعنى .. علشان بس يحاول يلم الى عكه قبل كده ..





دماغك أخبارها ايه ... ؟







الجانب الأساسي الثاني فيما يخص موضوع " بيبو و جي جي " هو له علاقة بأشياء تتعلق بالفكر عند بيبو " الولد " و الفكر عند جي جي " البنت " و دى حنلاقي فيها : معايير اختيار ، اتجاهات تحليل ، أساطير زواجية


طيب خلينا نشوف كده الكلام ده معناه ايه ؟؟




معايير الاختيار

خلينا نتكلم على القواعد الأساسية فى الاختيار بالنسبة لمعشر المسلمين علشان بس نحدد الاطر الحاكمة عندنا ايه ، و نحدد كمان احنا حنقيس الواقع على الأصول الحاكمة ازاى

طيب فيما يخص الشباب المفروض ايه : لما ندور حنلاقى الحديث الشريف :عَنِ أَبي هُريرة رضيَ اللَّهُ تَعَالَى عَنْهُ عَنِ النبيِّ صَلّى الله عَلَيْهِ وَسَلّم قال: " تُنْكحُ الْمَرْأَةُ لأرْبَعٍ: لمالها ولِحَسَبها ولِجَمَالها وَلدينها: فَاظْفَرْ بذاتِ الدِّينِ تَربَتْ يَدَاكَ "


و بالنسبة للبنات لما ندور حنلاقى الحديث الشريف : " إذا أتاكم من ترضون دينه وخلقه فزوجوه، وإلا تكن فتنة في الأرض وفساد كبير "

اتفقنا كده ؟؟

طيب نشوف ايه الأخبار بقى




الاستاذ بيبو

من الملاحظ اليومين دول ان بيبو بيه لما بيجي يختار عروسة بيدور فيها على حاجات معينه هو عايزها .. بس المثير فى الموقف ان بيبو بقاله فترة كده و انت حاسس ان " البارادايم " بتاعه اتضرب خالص ..

ليه ؟؟

أقولك انا .. بيبو اليومين دول لما بيجي يدور فهى بيدور على واحده يكون متوفر فيها المواصفات الآتيه بالترتيب التالي :

1. بنوته جميلة

2. بنوتة جميلة

3. بنوتة جميلة

4. يكون مستواها الاجتماعى متقارب معاه

5. يكون مستواها الاقتصادي أقل منه شوية أو أده " و ان كان فى حالة نوفي لسه عارفاها كان عايزها أعلى منه "

6. يكون سنها صغير أو قده فى السن .. و ان كان فى كل الأحوال ما تبقاش أكبر منه

7. تكون ملتزمة دينيا و تتمتع بقدر كاف من حسن الخلق

8. تكون على قدر ما من الثقافة و الوعي

9. اى حاجه تانيه نبقى نشوفها لما نقابل البنت نفسها بقى :)



طيب هى القائمة دى غير مفتعله .. يعنى دى قائمة فعلا لشباب ممن أعرف حولى و خاصة و دى الكارثة انهم من شباب الملتزمين أو ممكن نقول من داخل النموذج الملتزم فى الشرائح الاسلامية !!


الملاحظ فى الفترة الأخيرة و ده المفزع نظرا لما يجب ان تكون عليه طبيعة فكر أصحابه ان فى أوساط الشباب عامة و الشباب الملتزم خاصة بقى قائمة الأولويات تتصدرها مطالب مادية " يعنى ملموسة " بحته .. و يتصدر تلك المطالب ان العروس المبتغاة تكون جميلة مش بس حلوة أو مقبولة شكلا .. لأ .. لازم تكون جميلة .. و فى أحيان أخرى تكون رائعة الجمال مش بس جميلة !! و يبدأ الشاب يحط مواصفات خاصة بالجمال الجسدي المطلوب أقل ما توصف به انها مواصفات " تعجيزية " لكل أولئك الأشاوس الذين يقوم بتكليفهم بمهمة البحث عن ست الحسن و الجمال المطلوبة

يجي بعد كده فى قائمة المطالب المستوى الاقتصادي لأسرة العروس و ده كمان بعد مادى صرف

و الالتزام بقى و الاخلاق و الكلام الى بالكو فيه ده ييجي بعدين .. بس المهم ندور على الاتنين الى فوق دول !!


فتلاقى الاستاذ بيبو بجلالة قدره كده خطب يجي 6 أو 7 مرات و فسخ الخطوبة علشان البنت لم تتوافق و قائمة متطلبات سيادته !!

و ما تسألنيش بقى عن فين احترام مشاعر البني ادمة الى كان مرتبط بيها أو فالنقل الى هى نفسيا و عاطفيا ارتبطت بيه ، أو فين احترام البيت اللي دخله ، أو فين احترام الناس اللي ائتمنوه على بنتهم ، أو فين اعتبار الرجولة والشهامة ، ** و بالتالى كنتيجة طبيعية لازم البنت تتعقد فى عيشتها و تكره الجواز و سنينه الى خلاها ترتبط بواحد ما عملش أى حساب لمشاعرها من الأساس لأنه كان بيدور على " كاتيجورى " معينة تعتمد على الشكل الخارجى و هى ما حققتش طموحاته !!

يعنى كده الحمد لله واخدين نص الحديث و النص التانى نبقى نشوفه بعدين بقى لو توفر النص الى احنا عايزينه .. المهم جمالها و مالها .. و بعدين نبقى نشوف حسبها و دينها بعدين !!








جي جي هانم

المعروف دايما ان جي جي بتكون بتدور على واحد ابن ناس متربي يتقى الله فيها و يحبها و يحسن معاملتها و يكون يتمتع بقدر لا باس به من الأخلاق و الالتزام و من أسرة كويسة و اهله ناس كويسين معاها فى المعامله

الترند الجديد نوفى بقى فى البنات ان عدوى المظهر و الفلوس اتنقلتلهم هما كمان من فترة .. فتلاقى البنت بتدور على واحد وسيم .. و لو جالها واحد يعنى مقبول تلاقيها مش مرتاحه نفسيا كده و تقولك اصله مش وسيم اوى يعنى !!
body building و الجديد ان بند الـ
بقى عند البنت من ضروريات الحياة زى الميه و الهوا كده ..


و بكده الحمد لله نبقى احنا خلينا " من ترضون دينه و خلقه فزوجوه " على جنب وفقا لسمة العصر الغالبة !!




اتجاهات تحليل




الاتجاه الأول فيما يخص الاستاذ بيبو بيقول :


ان بيبو دلوقتى كل فهمه للزواج يرتكز على الجانب الخاص بالمتع الجسدية و فقط .. و بالتالى فهو بيركز فى بحثه على من يتوافر فيها أفضل الامكانيات المناسبة للقيام بهذه المهمة على أكمل وجه .. فالموضوع من أوله لآخره بالنسباله مجرد نزوه و حتتقضى و خلاص !!


الاتجاه التانى بيقول :


لأ يا جماعة الراجل برضه معذور .. يعنى هو فى مجتمع عمال يشوف فيه فى كل حته عالم تحل من على حبل المشنقة و هو بنى آدم من لحم و دم برضه ، من حقه انه يتبسط يعنى ولا هو ملهوش نفس !!


اما الاتجاه المفسرة لحالة جي جي هانم فهو بيقول : ان جي جي عندها حق شايفه بيبو عمال يؤمر و يتأمر و مبهدل بنات النس معاه علشان بيدور على مواصفات شكلية معينه يا يلاقيها يا بلاش خالص و مش عامل اعتبار لأى حاجه تانيه زى جمال العروسة .. اشمعنا بقى يبقى بيبو آه وهى لأ ؟؟ يعنى جت لحاد عندها هي و وقفت ؟؟!!


و ان كان كل الاتجاهات المفسرة دى اجتمعت على ان فى اى حالة من الثلاث حالات الخاصين بيبو او جي جي احنا بنتكلم على تفضيل للرغبات الانسانية و تغليبها على جوانب التفضيل الاسلامي المتضمن قدر من كل جانب من جوانب المادة و الحس






أساطير زواجية





احدى أكثر الاساطير الخاصة بالزواج انتشارا فى عقول البنات خاصة و الشباب كمان أسطورة تغيير شريك الحياة بما يتوافق مع الرؤية الوردية الى فى دماغ كل واحد ..

و يمكن بتجرى محاولات كتير جدا من أجل هذا الهدف الجليل .. و تبذل جهود مضنية فى ده .. و تتبع وسائل التفافية طويلة عريضه .. منها الشرس و منها السلمي .. و فى الاخر يصدم كل طرف ان الطرف التانى ما بيتغيرش بالقدر الكافى .. او انه ما بيتغيرش أصلا .ز او انه بيتغير بشكل مختلف عن الى هو عايزه .. و بالتالى تبدأ الحياة تسود فى وشه و المشاكل تتفاقم .. مما قد يؤدى فى الاخر لسماع الخبر الثقيل بان : بيبو فرقع جي جي

يمكن المصارحه و المناقشه فى فترة الخطوبة علشان كده بتكون مهمة جدا لاكتشاف جوانب الاختلاف و الاتفاق على كيفية التكيف معها بعد الزواج .. و لو فى حاجه فادحة فى اى طرف من الاطراف حتكون الفرصه ألطف و أكثر هدوءا لان الطرف الاخر يتناقش حولها معاه علشان يوصلوا لحل





متفرقات هامة ...






آخر حاجه معانا فى التدوينة الدسمة دى .. حاجات أنا ما عرفتش بصراحه أسميهم ايه أو أحطهم فين .. ففضلت انى احطهم تحت عنوان " متفرقات " لانى مش عارفه اسميهم أو اصنفهم .. و فى نفس الوقت " هامة " لانها فعلا أساسية و ما ينفعش نغفلها و احنا بنتكلم فى موضوع زى ده


الحاجات دى حنلاقيها بالأساس حاجات تتعلق اما : بسلوكيات خاطئة ، أو صور ذهنية مسبقة غير صحيحة


طيب خلينا نشوف كل واحدة منهم نقصد بيها ايه بالظبط



سلوكيات خاطئة






السلوك الخاطىء رقم 1


ان بيبو لما يحس ان جي جي شعشعت فى دماغه زى ما قلنا فى الأول .. بياخد وقت طويل جدا عمال يلمح من بعيد لبعيد و يستنى ردود أفعال بأشكال معينه علشان يتأكد ان جي جي تبادله نفس الشعور ..
بس حقيقة فى أحيان كتير مرحلة التلميح دى بتطول أوى بما يجعل الأمر يلتبس على كل من بيبو و جي جي ..
طيب فيها ايه لما بيبو ياخد بعضه كده زى الشاطر و يروح لجي جي يقولها كل الى فى نفسه و يطلب انه يتقدملها ؟؟

واحد حيقولى مهو خايف يكسف نفسه ما يمكن جي جي ما توافقش مثلا ولا حاجه ..

حقوله فى كل الأحوال بيبو سواء كان حيتجوز عن سابق معرفة بجي جي أو انه حيتجوز جي جي جواز " صالونات " زى ما بيقولو هو
فى الاخر عليه انه يعيش المجازفة دى .. يعنى


: he has to take the risk !!


واحد تانى حيقولى طب مهو ممكن مش مستعد " ماديا " انه يتقدملها دلوقتى

حقوله م الاخر بقى قدامك حل من اتنين

1. ما انتاش قد الجواز يبقى ما تحبش م الأول

2. حتحب علشان انت انسان من لحم و دم يعنى .. يبقى ما تدخلش فى فترة التلميحات و ألغاز الأذكياء دى خالص .. علشان لا تقرف نفسك .. ولا تقرف بنات الناس معاك !!




السلوك الخاطىء رقم 2


ان بيبو بيفضل حاطط وش الأدب و الوداعة و الحنية طول فترة الخطوبة .. و بمجرد انه يعقد الوش ده بيتشال تماما على أساس انه ضمن البنت بقى كزوجة ليه و عليها ليه حق الطاعة و بالتالى فكل الى كان اتفق عليه هو و جي جي و ما كانش جاى على هواه حيمشيه بمزاجه و على البنت بقى انها تقول آمين !!


الصراحه من البداية بين الطرفين هي أهم قاعدة و أساس لحياة زوجية سلمية بعد كده .. اياك و الأقنعة


ملحوظة : هذه القاعده تنطبق بشده على اى من الطرفين " بيبو " أو " جي جي "





صور ذهنية مسبقة خاطئة





تنتشر أقاويل مغرضة بقالها فترة ليست بالقليلة فى أوساط البنات ان " بيبو " لما بيدور فهو بيدور على البنت المستكينة الهادية الى يقولها يمين يمين ، شمال شمال .. بصرف النظر عن اى حاجه تانيه بقى .. و ان " بيبو " قد يعجب كثيرا بزميلته فى العمل تلك التى تتسم بالنشاط و الحيوية و اللباقة و الى آخره من صفات براقه جدا .. و يحبذ ان يتشارك معها فى انهاء المسؤليات الخاصه بالعمل المتراكم فوق المكاتب .. و لكن حينما يتعلق الأمر باختيار الزوجة فانه يعزف تماما عن النظر الى هذا النوع من الفتيات خوفا منه على " بريستيجه " بعد الزواج لو جي جي مثلا طلعت شخصيتها " كوية " ولا حاجه .. و ذلك تطبيقا منه للمبدأ الشهير الذى رفع به صوته هانى رمزى في فيلم محامي خلع حينما قال محادثا مها زميلته المحامية :

احنا ننفع ديوك تكاكى قصاد بعض فى المحاكم .. لكن انا ما احبش ديك غيرى يدن فى بيتي !!

لكن ما تؤكده البنات بشدة مع كثير من التزمر و الغضب في بعض الأحيان : " الى هو ما يعرفهوش ان البنت مننا عارفه كويس يعني ايه زوج و يعني ايه حياة زوجية .. و ازاى تكون زوجه كويسة .. و انها فى الشغل حاجه و فى البيت حاجه تانيه خالص .. هى فى الشغل لازم تبقى شديدة و جد لان فى حدود لازم تتراعى و لان البنى آدميين مش محترمين بشكل كافى .. فلازم توقف كل واحد عند حده .. انما و هى زوجه فى البيت حاجه تانيه .. بس محدش بيفهم ده أو حتى بيقدر يتخيله "




كلمة أخيرة ...


التدوينة دى كلها بكل ما جاء فيها .. جه علشان يذكر بعظم آيتين كريمتين اختصروا كل الكلام ده فى كلام مباشر يسهل على المتأمل فهمه و استيعابه و هما

" ... و أخذن منكم ميثاقا غليظا " سورة النساء .. الآية 21

" و من آياته أن خلق لكم من أنفسكم أزواجا لتسكنوا اليها و جعل بينكم مودة و رحمة ان فى ذلك لآيات لقوم يتفكرون " سورة الروم .. آية 21



*******


اعتذر عن استخدام أسلوب خطابي فج بعض الشىء فى طرح الموضوع

و ألفت النظر الى ان ما ورد فى هذه التدوينة ليس على سبيل التعميم .. و انما كان مناقشه لاتجاه واضح هذه الفترة بين الشباب و الفتيات

أسأل الله أن يرزقنا و اياكم أزواجا صالحين يأخذون بايدينا الى طريق الحق .. و نكون لهم عونا على طاعة الله .. و اعمار أرضه :)


دمتم بكل خير :)

_________________________________


* نقلت بنص كلام عمرو طموح فى تعقيبة على تدوينة ضحكت

** نقلت بنص كلام فدوى من تدوينتها هنا

ملحوظة قبل الشروع فى كتابة أى تعليق من فضلك اضغط هنا