Friday, April 17, 2009

أعز أصحاب :)







من فترة و الموضوع عمال .. يزن .. يزن .. يزن .. فى دماغي

العلاقات الاجتماعية الانسانية جديرة بالتأمل جدا الواحد حيكتشف حاجات عجيبة سبحان الله لما يقعد يفكر فيها كده شوية حيعرف يعنى ايه قدر .. يعنى ايه نصيب .. يعنى ايه ابتلاء .. ايه هى المحن .. و ازاى ممكن تبقى منح

من فترة كبيرة شوية بقعد من وقت للتانى افتكر انا اتعرفت على كل انسان اعرفه فى حياتى دلوقتى ازاى .. اول لحظة اتقابلنا فيها كانت ايه .. و علاقتنا اتطورت ازاى .. و بقينا ايه دلوقتى

أصحابى من ايام المدرسة هما أعز و أغلى و أصدق و أنقى اصحاب عرفتهم فى حياتى .. قعدت افتكر اتعرفنا على بعض ازاى " اه احنا كلنا كنا فى فصل واحد لمده 14 سنة " بس مش معنى كده اننا عرفنا بعض مرة واحده يعنى :) .. سبحان الله فى محطات فى حياة الانسان جديرة بالتأمل فعلا :)

برضه لما دخلت الكلية .. اصحابى منها .. كل انسان عرفته فيها .. كانت ايه اول لحظة جمعتنا ببعض

الى بيجذب فكرى اكتر .. ازاى تطورت العلاقات بيني و بين اصحابى لحاد ما بقينا اصحاب أوى دلوقتى كده :)

يعنى اصحابى دول .. قبل ما نبقى اصحاب .. كانو اشخاص عاديين جدا فى حياتى .. اكيد كل واحد صاحبه قبل ما يعرفه كان بالنسباله شخص عادى جدا زى باقى الاشخاص فى هذه الحياه ..ازاى بقى تطورت العلاقة دى من علاقة سطحية أو خلينا نقول عادية جدا الى علاقة و طيده و حميمة كده !!! .. من شخص اخر كلام ممكن يدور بينا القاء السلام و السؤال عن الاحوال .. الى شخص مؤتمن على اسرار حياة بأكملها .. الى ناصح أمين فى مواقف محورية جدا فى حياة الانسان !! .. نفسى امسك اللحظة الى فيها بتتحول العلاقة من علاقة عادية جدا و تبقى علاقة وطيدة أوى :)

لحاد دلوقتى ما عرفتش :) .. هنا بقى بفهم أحد معانى " القدر " :) .. الى بيعبر عنها كتير من الناس بكلمة بسيطة أوى ( مكتوب ) :) .. افتكرت رواية السيميائى لما كانت الكلمة دى ملازمة سطور الرواية من بدايتها لنهايتها تقريبا :)


كنت بكلم عمرو على المسنجر فى مرة و اتفتح الموضوع ده .. قال كلام اعتقد انه مهم


اليكم نص الحوار :)

ملحوظة على جنب : تم استئذانه فى نشر هذا الجزء :)


: says دهاء سياسي


انت عارف .. فى حاجه كانت شاغله تفكيرى بقالها كتير اوى من ايام المدرسه و كل ما افكر فى تحليل ليها مش قادره اوصل لتحليل

او شىء منطقى قاطع


عمرو طموح says:


ويا تري إيه هي؟


: says دهاء سياسي


اى حد من اصحابى حاليا لما بحاول ارجع بذاكرتى لاول مرة اتقابلنا فيها و امشى بالعكس مش بقدر اكتشف ازاى من معامله شبه سطحيه فى اول مرة الموقف تطور و بقينا اصحاب جدا دلوقتى .. فعلا مش قادره اوصل للحظة الى فيها تحولت العلاقه من سطحيه لعلاقه وطيده فى كل من اعرفهم حتى الان بيما فيهم انتو

فكرت فى الموضوع ده قبل كده ؟؟


: says عمرو طموح


همممم

لا

بس أنا بفتكر أول مرة دلوقتي قابلت فيها كل حد فيكو ، أو شوفتو، وأول مرة اتعاملت معاه

هممممم

غريبة طحن

في ناس في البداية لم أكن أتوقع أن أستسيغ التعامل معهم اصلا


: says دهاء سياسي


مش كده ؟ الموقف جدير بالتأمل فعلا


: says عمرو طموح


هممممم

أقدار

في واحد مرة قاللي حاجة عجيبة جدا علي تقدير الله

قاللي عاوز تتأمل في تقدير ربنا

انزل محطة الأتوبيس نصف ساعة فقط.. اعتبرها تجديد إيمان

وتأمل فيها

مين وصل امتي

ومين ركب أنهي أتوبيس

ومين كان رايح فين وركب الأتوبيس رقم كام اللي عدي عليه

ومين اتكعبل في مين

ومين وصل بعد ما الأتوبيس فات

ومين وصل بالضبط مع الأتوبيس

ومين ومين ومين.. تأمل كده

يااااااااااااااااه

شيء عجيب فعلا

ده بالضبط نفس الشيء علي فكرة

هممممم




****************


كان فى فيديو عايزة انزله مع التدوينة بس مش عارفه ليه مفيش موقع راضى يعمله ابلود :(

ما علينا

********************


يا ترى فكرتو فيها قبل كده ؟؟


:) طيب انتو ايه رأيكو ؟؟ يا ترى




at

13 comments:

  1. AnonymousApril 18, 2009 at 3:08 PM

    امور بالفعل جديرة بالملاحظة والاهتمام حين يتذكر المرء ايام خوالي واصدقاء عندما رائهم اول مرة كان من المستحيل ان يدرك ان هؤلاء من الممكن ان يكونوا من اقرب اصدقائه..

    فقط ملاحظة صغيرة اختنا الفاضلة: الكلام عبر المسنجر بين الاخوة والاخوات لا يجوز بل اصلاً الكلام عامة ليس من المفترض ان يتم الا لضرورة لان الدردشة تجلب عشرات المخالفات التى لا ترضي الله عزوجل.. فلا يوجد شئ اسمه اصحاب من المدرسة واصحاب من بره المدرسة وناس ليها معزة عندي واقلهم كده... هذا من الممكن لنفس الجنس.. اما الجنس الاخر فهم غرباء عني اعاملهم على قدر الحاجة والضرورة.. لان التوسع في هذا الامر يضيع القلب والله ويدخله في متاهات هو في غنى عنها..!

    ReplyDelete
  2. simplicityApril 19, 2009 at 12:59 PM

    معظمنا بيحاول يفتكر اللحظة أو الموقف اللي حول الشخص العادي ده إلى صديق عزيز مع أني عن نفسي مابفتكرش ايه اللي بيحصل لأني باعتبر كل اللي حواليا أصحابي ومابحطش انطباعات أولى لحد ما يثبت العكس ممكن ناس كتير تعتبر ده عبط بس اكتشفت فعلا إن ده اللي بعمله لما فكرت فيه
    و حسيت إن الموقف أو اللحظة اللي ابتدت فيها ممكن تكون لا تذكر بس الحوارات اللي بعدها هي اللي حددت هيكونوا أعز أصحاب ولا لأ
    افتكر لما سألتيني من كام سنة انتي ليكي أصحاب غيرنا؟ ورديت عليكي بثقة :آه
    اعتذرلك بشدة عنها مع أنها متأخرة أني اكتشفت أنه مهما حصل وقتها فعلا كان كلام عيال ولما كبرت (مش قوي يعني) اكتشفت معزتهم الحقيقية وازاي انا كنت غلطانة وقتها وزي ماقلتي" أصحابى من ايام المدرسة هما أعز و أغلى و أصدق و أنقى اصحاب عرفتهم فى حياتى .. قعدت افتكر اتعرفنا على بعض ازاى اه احنا كلنا كنا فى فصل واحد لمده 14 سنة بس مش معنى كده اننا عرفنا بعض مرة واحده يعنى" ومش هازود حاجة عليها انتي قلتي كفاية :)

    ReplyDelete
  3. mohamedApril 20, 2009 at 11:13 AM

    أنا فكرت في الحاجات دي كتير

    الصداقة بتبقي زي اي علاقة أنسانية تانية أو أي مشاعر مش بيخلقها قرار
    انما بتيجي كدا من غير أي ترتيب
    بنلاقيها بتطور مع نفسها وبراحتها

    وفي نفس الوقت مفيش علاقة إنسانية بتدوم للأبد
    لازم بيجي ليها وقت وتخلص سواء بموقف أو أن الحياة بتشغلنا عن بعض

    بس في حاجة
    في نوعين من الأصدقاء
    صديق بيبقى قريب منك في فترة معينة لانكم بتشتروا في شيء مع بعض
    وبمجرد ما بينتهي الشيء دا بيبقى خلاص كل واحد بينسى التاني
    او طرف منهم
    ودي مش صداقة أصلاً
    دي كانت مصلحة وتعود

    وفي صداقة تانية بتستمر بعد الشيء المشترك دا ما يخلص
    أو ميكنش في شيء مشترك من الأساس
    وهي دي اللي بتدوم وبتبقى صداقة حقيقية

    ReplyDelete
  4. دهاء سياسيApril 21, 2009 at 3:01 PM


    السلام عليكم و رحمة الله و بركاته

    السيد/ة المجهول/ه

    :)

    نورت المدونة بمرورك يا فندم :) .. و جزيت خيرا كثيرا على لفت انتباهي :)

    بانتظار زياراتك القادمة باذن الله :)



    _________________

    يمنى

    اعتذارك مقبول يا بنت .. ولا يهمك خالص .. انا واخده عليكو بقالى 14 سنة :P :P :P

    بس فعلا انتو اعز و اغلى و انقى اصحاب .. ربنا يبارك فيكو و يهديكو يااااااااااااا رب :)

    ______________

    محمد

    تفسير عميق اوى ما كنتش عبر عن حاجات ما كنتش لاقيالها كلام جوايا .. بس لا اعتقد ان كل الصداقة لابد و ان تفنى فى يوم من الايام ولا ايه ؟؟ :)

    يعنى ما يتهيأليش ان انت كمان 20 سنة حتلاقى نفسك مع اصدقاء مختلفين تماما عن اصدقاءك دلوقتى .. او بمعنى اوضح مش ممكن حتكون استبدلت بشكل كامل كل اصدقاءك الحاليين بناس تانيه خالص ولا ايه برضه ؟؟ :)

    ReplyDelete
  5. بنت أبيهاApril 22, 2009 at 12:35 PM

    العلاقات الانسانية على قدر ما هيا معقدة

    لكن منقدرش نستغنى عنها

    عشان كده تلاقيها بتتطور طبيعي

    ولما بفكر في الموضوع ده فعلا بستعجب

    يعني انتيمتي بافتكر اول مرة شوفتها

    معتقدش اني كنت حاسة ان فيه اي تشابه بينا

    ان اني في يوم من الايام هتكون الصداقةوالحب اللى ما بينا ده دلوقتي

    مع انها فضلت تقريبا بتاع سنة مجرد زمالة ولما اشوفها اسلم عليها بس

    سبحان الله فعلا

    ReplyDelete
  6. mohamedApril 24, 2009 at 3:56 PM

    السؤال الصح بعد 20 سنة هيكون معاك أصدقاء أصلاً

    ReplyDelete
  7. دهاء سياسيApril 25, 2009 at 2:13 AM

    السلام عليكم و رحمة الله و بركاته

    بنت أبيها

    :) سبحان الله

    ربنا يخليكو لبعض أصدق و أفضل رفيقتين يا رب :)

    نورت :)

    _________________

    محمد

    ممممممم

    تفاءلوا بالخير تجدوه :)

    باذن الله يكون معاك أحسن صحاب فى حياتك

    بلاش تشاؤم :)

    ReplyDelete
  8. hoda omranApril 25, 2009 at 10:22 PM

    على فكرة الصورة اللى فى البوست الجديد رائعة
    شايفة حاجات جديدة بتتكون
    يريت ياهبة تفتحى الكومنتات
    :)

    ReplyDelete
  9. دهاء سياسيApril 26, 2009 at 1:58 AM

    اتفتحت يا هدى .. انت تؤمرى :)

    مع انى كل ما ابص للرسمة اكتئب من كتر ما هى كئيبة !! :(

    ReplyDelete
  10. AnonymousMay 18, 2009 at 5:24 PM

    بما أني هذه الساعة تحديدا أقوم بجولة في مدونتك لأتصفح ما فاتني منها ، بعد امتحان شاق

    أقول

    شخصيا ، يمكنني أن أتذكر أحيانا ، كيف تطورت علاقتي ببعض الناس

    خدي مثل بعلاقة الود بيننا

    لا زلت أذكر ذلك الدش البارد الذي سمعته منكِ ، وبعدها فيما أظن سارت الأمور على ما يرام بحمد الله

    بس خلاص

    دمتِ نقية

    محمود

    ReplyDelete
  11. دهاء سياسيMay 20, 2009 at 5:21 PM

    محمود من بني عاطف

    يا رب تكون أديت كويس فى الامتحان :)

    بس تعالي هنا .. يا نهاااااااااااااار ابيض .. ده فى ناس شايله فى نفسها يا عيني و ساكته بقالها سنة كامله تقريبا !!!!

    لا كده لينا كلام باذن الله اول ما اشوفك ..

    دمت بخير يا بشموهندس :)

    ReplyDelete
  12. AnonymousMay 22, 2009 at 2:54 PM

    والله مش شايل في نفسي ولا حاجه

    أنا فقط حاولت أن أفكر في سؤالك حول تطور علاقات الود بين الناس

    دمتِ بنقاء

    ReplyDelete
  13. دهاء سياسيMay 22, 2009 at 4:22 PM

    أنت متأكد ؟؟

    طويب :)

    ReplyDelete