و قد أثبتت النتيجة ان العلم بالفعل يكيل بالبتنجان :$

يا مهون كل أمر عسير يا رب

بقالنا 3 أسابيع فى انتظار النتيجة ..

و لسه !!!!!!

نتايج كل الدفعات فى الكلية طلعت الا احنا :$

ادعولنا .. و ادعو للكنترول الكريم بتاع الكلية ربنا يفتح عليهم و يخلصونا بقى

تطور دراسات الاستشراق فى الاكاديميا الأمريكية

الاستشراق

تعبير سمعناه كتير

لكن

معلوماتنا عنه

محدودة

و ضئيلة

هو معناه ايه ؟؟

و بيدل على ايه ؟؟

و الغرب بيستهدف ايه من ورا دراسات الاستشراق دى ؟؟

محتاج تعرف ..


شاركنا فى ندوة عن


" تطور دراسات الاستشراق فى الاكاديميا الأمريكية "


لقاء مفتوح مع


د / تيموثى ميتشيل ............... أستاذ العلوم السياسية بجامعة نيويورك

د / خالد فهمي ............... أستاذ التاريخ _قسم دراسات الشرق الأوسط _بجامعة نيويورك


و يعقب اللقاء مناقشه مفتوحه مع الضيوف


تعقد الندوة فى تمام السادسة مساء يوم الاربعاء الموافق 26 مارس 2008 بكلية الاقتصاد و العلوم السياسية _ بقاعة 5

ننتظر تشريفكم لنا :)

!! ضد الاساءة .. و لكن

من فترة ليست بالقليلة فوجىء الجميع بتسافل كاتب دنماركى و تطاوله برسم رسومات مسيئة لنبى الهدى " محمد صلى الله عليه و سلم " .. حينها انقلبت الدنيا رأسا على عقب .. و أتذكر كم المظاهرات التى خرجت فى مختلف البلاد الاسلامية للتنديد بهذه الفعلة .. أعمال العنف التى اندلعت فى شتى الانحاء ردا على ما تم .. اندهاش الغرب من قوة رد الفعل .. تصريحات شيخ الازهر .. آراء رجل الشارع البسيط ..

عاصفة شديدة جدا اجتاحت العالم الاسلامى عامة و العربى خاصة .. ثم هدأت فجأة .. و لا أعلم من الذى هدأها أو كيف انتهى الموقف الذى بدأت بصدده تلك العاصفة ..

بعدها توالى مسلسل الاساءة فى عدة دول و لكن على شكل مكرر من اعادة نشر الرسوم

ثم .. هدأ الموقف ثانية

و من عدة أسابيع .. " قاعدين لا بينا ولا علينا " فوجئنا باعادة نشر الرسوم مرة أخرى بحجة التأكيد على حرية الصحافة

الغريب ان هذه المرة لم تقم العاصفة كما قامت فى المرة الأولى .. لا أعلم هل هذا دليل على أن الجموع الغاضبة الغفيرة التى خرجت فى المرة الأولى بدأت تفكر بعقلها بعض الشىء فيما يجرى .. أم ان سخافة السيناريو المكرر أدى بالناس الى أن يتركوه جانبا ولا يعيروه اهتماما .. أم ان ما حدث فى المرة الأولى كان " و باستخدام منظور المؤامرة " وراءه من يذكى ناره حتى تتوهج لغرض ما فى نفس يعقوب .. أم ان التفسير ليس اى مما سبق .. و ان الحكاية و ما فيها شوية ناس حبت تتمنظر بلقبها كمسلمين قدام الغرب فقامو مرة واحده بعنف أول مرة .. بس للأسف الرصيد الدينى و الاسلامى كان لا يسمح بان يعيدوا الكرة مرة تانيه فى اعادة النشر الاخيرة فالمسرحية اسدل عليها الستار و كل واحد روح بيتهم و خلاص !!!!؟؟؟

طيب خلينا نشوف الموقف من منظور تانى مختلف شوية و خلينا نصغر مساحة بحثنا و ناخد بلدنا كحالة للدراسة

الوحشين الكفار الدنمارك ولا هولندا ولا فرنسا ولا المانيا ولا العفريت الازرق عملوا ايه ؟؟ نشروا رسومات مسيئة ؟؟

طيب

حد كده يقولى كام مرة سمع النهارده فى بلاد الحلوين المسلمين سواق ميكروباص ولا تباع ولا بواب ولا عيل فى الشارع طوله ما جابش شبر و نص بيسب الدين ؟؟؟؟ و كان كل الى ربنا قدره عليه يعمله ساعتها انه يغمض عينيه و يقول : تؤ تؤ تؤ استغفر الله العظيم

ولو قلت سيبكو من الشريحه دى حد يقولى كام مرة فى حياته حضر خناقة فى الشارع بين شباب ولاد ناس ولا بهوات ببدل بسبب واحد قفل على التانى فى اشارة و ما سمعش الدين بيتسب و بيتمسح بيه تراب السكك كمان ؟؟؟

بلاش

كام أمين شرطة فى الاقسام ما بيسبش 100 ملة للمقبوض عليهم فى التخشيبة ؟؟


طب راحت فين العالم الى كانت زعلانة أوى لما أحد حكامنا الأفاضل راح زار بيندكت بعد ما مسح بينا البلاط برضه و اداله معرفش ايه من الذهب مرصع بالفصوص و كأنه بيقوله و الله مش عارفين من غيرك كنا حنتشتم ازاى ؟؟


كل النماذج السابقة .. ليست فى بلاد الفرنجة لا سمح الله .. لكنها فى قلب و عمق البلاد المسلمة او المتمسلمة .. و بالمقارنة بين ما حدث فى بلاد " ولاد الذين البعدا " و فى بلادنا المبجلة فأعتقد مجرد اعتقاد قد يكون ساذجا ان الدين و رسوله متبهدلين اخر بهدلة معانا اكتر من الغرب .. و ده فى حالة ما اذا كنا سنأخذ العامل الخارجى أو الظاهر فى الموقف فقط للمقارنة او للحكم .. بمعنى .. اذا ما تم الاقتصار على الكلام و الشتائم و المقولات و فقط .. و تم استبعاد الافعال .. و الالتزام .. و السلوكيات .. و مدى التطبيق للدين " الى محروقين علشانه أوى كده " فى الحياة العملية للفرد المسلم فى البلاد العربية و الاسلامية

و اذا كان الحال كذلك فلم قامت الجموع الغفيرة اذا فى المرة الأولى : مع العلم ان الواقع الاسلامى " مش فارق فى الحالة الأولى عن الحالات الى بعدها .. يعنى ما كانوش اتقياء فى المرة الأولى و فجروا بعد كده "

طيب .. و اذا كنا بالفعل فى قمة الغضب لما حدث من اساءة للدين فى الخارج .. فأين نحن مما يحدث له فى الداخل ؟؟

كنت أتحدث عن هذا الموضوع مع أحد الأقرباء فكان الرد : احنا هنا بنعمل ده بيننا و بين بعض .. انما هما بره لأ ما يتكلموش على ديننا

صلاة النبي .. هي الحكاية و القضيه و المشكلة كلها : احنا و هما " فى مين الى يشتم يعنى" و لا المشكلة فى الشتيمة نفسها !!!!!!!!!!؟؟؟؟؟؟؟

نهايته

ابدأوا نفسكم الأول و احترموا دينكم و نبيكم فى بلادكم علشان الى بره يحترموهم و يحترموكم كمان معاهم ..

و على رأى عمرو لما كان بيرد على احدى الرسائل الى بتدعو لمقاطعة البضائع لما قال :

هل الأولي مقاطعة المنتجات...؟؟؟ أم مقاطعة السلوكيات الهدامة...؟؟؟ أم أن الأجدر بنا الالتفات إلي القيم المشوهة و التي تهدم إنساننا من الداخل؟؟؟

لست هنا ضد المقاطعة كما تعلمون عني جميعا...

و لكنه شيء ما في خطاب الدعاية للمقاطعة... يصيح بي دائما.. ما زال أمامنا الكثير... ففعلنا المقاوم لم ينضج بعد.. و لم نستطع بعد تجاوز مرحلة مقاومة الفعل القادم تجاهنا إلي تفعيل ذواتنا في فعل مقاوم...

يا جماعة الى ملوش خير فى أهله ما لهوش خير فى حد .. انا ضد الاساءة و لكن الاساءة كلها جوه و بره بالقول او بالفعل او باى شكل كان .. لو الغرب شافونا قد ايه بنحترم ديننا بجد و بنلتزم بيه و ان باطنا مثل ظاهرنا .. ساعتها بس محدش حيقدر يقول على ديننا ولا نبينا ربع كلمة من غير ما يفكر 1000000 مرة فى الى ناوى يعمله

تحضرنى كلمة استاذى الدكتور سيف الدين عبد الفتاح حينما قال :

ان الخارج لا يتمكن من الداخل الا بقدر ما يمكن الداخل له

و التمكين ده بياخد اشكال كتير اعتقد ان احدها استهانتنا بديننا و بعقيدتنا و عدم احترامنا ليهم بالقول او بالفعل

عدم تكرار المسلسل الغربى فى ايدينا مش فى ايديهم .. بدايه ايقافة عندنا مش عندهم .. فرجاء لنبدأ سويا بأنفسنا حتى نقطع عليهم كل السبل لاهانتنا

فضفضة جوانية 8/3

و كأن الحزن بيوحشنى ..

و كأنى بخاف أكون سعيدة ..

بحس انى ممكن انسى نفسى و أنسى الى حواليا

بخاف لقلبى يجمد و يقوى و ما يرجعش رقيق و حنين من تانى

ببقى نفسى أعيط أوى .. و فى نفس الوقت البسمة مرسومة على وشى

دايما فى صراع مع نفسى و مع أفكارى و أحلامى

أنا ولا أمتى ؟؟

الحاضر ولا المستقبل ؟؟

فرحتى ولا فرحة الناس ؟؟

الراحة ولا سعادة البذل ؟؟

حاسة بسكينة جميلة أوى .. لكن فيها مسحة حزن بتعطيها جمالا و بهاءا فوق جمالها و بهائها

حاسة بقلق بعيد أوى فى عمق هذه السكينة .. و كأنما يصارع ليصل الى قلبى

أعلم انه سيصل يوما

حلوة الحياة و هي هادية و الواحد عايش فيها مرتاح و فى حاله

راضى بحياته الصغيرة

و عايش لشريكه فيها و خواصه و بس

ولا داوش دماغه بحاجة

ولا محمل نفسه عناء التفكير فى حاجه

حاسس بسلام داخلى يكفيه من الدنيا أى شىء

لكن

الأحلى

لما تبقى حياتك مدووشة

شغل

و صراع

مناهدة

و تعب

علشان عايز تغير و تتغير للأحسن

عايز تعمل حاجة

عايز تفرق عن ملايين البشر الى جم و عاشوا و مشيوا من الدنيا من غير ما يسيبوا فيها بصمة واحدة تدل على انهم وطئوها يوما ما

لازم الطوفان فى يوم يهدى

الميه تتبخر

و الدوشة تسكت

و السفينة ترسى

بس يا ترى

حترسى على ايه ؟؟

العلاقات العربية الايرانية

العلاقات العربية الايرانية


مراحل وفترات من الهدوء و التوتر


التعاون و الصراع


لماذا هذا ؟؟


و


الي اين المسار ؟؟



محتاج تعرف ؟؟



وعاوز تفهم ؟؟



شاركنا في ندوة عن


" العلاقات العربية الايرانية "


حيتكلم عنها


د/ مصطفي اللباد ........ خبير في الشئون الايرانية و آسيا الوسطى

د/ نيفين مسعد ........ أستاذ العلوم السياسية بجامعة القاهرة

يعقب اللقاء مناقشه مفتوحة مع الضيوف

تعقد الندوة في تمام الخامسة مساء ، يوم الأثنين الموافق 17 مارس 2008 ، بكلية الاقتصاد و العلوم السياسية – قاعة (5)

حضوركم يعنى لنا الكثير :)

بارك الله لكما :)

كل الحكاية ان حضرتى مبسووووووووطة جدا و سعيــــــــــــــدة ع الآخر و فرحانة و مزأططة كمان :)

ليه ده كله ؟؟

علشان بكرة بمشيئة الرب .. حيكون عقد قرآن أعز و أغلى و أحب صديقاتى الى قلبى

عيشنا مع بعض أحلى أيام فى المدرسة .. و بعد حتى ما كل واحدة مننا سابت المدرسة برضه .. و بالرغم من فرق السن البسيط الى بيننا الا اننا كنا ولازلنا أصحاب جداااااااااااااااااا


مبرووووووووووووووووك


سارة سالم و شادي

مش بس سارة و شادى .. لا ده مبروك لعائلة سالم كلها نفر نفر .. و عقبال كل الشباب و البنات الى اعرفهم و الى حتى ما أعرفهمش بأزواج و زوجات صالحات


سارة و شادى : بجد مش عارفة أقول ايه .. بس ربنا يا رب يكرمكم و يحفظكم و يرزقكم حياة هادئة هانئة مستقرة .. و يرزقكم الذرية الصالحة التى تنفع الاسلام و المسلمين

قولوا معايا


آآآآآآآآآآآآآآآآآآآآآآآآآآآآآآآآآآآآمين :)

The sWitCh

This shows tHe resUlts Of hUman curiosity sOmeTimEs :)

الرأى و الرأى الآخر

عمرك دخلت مناقشة مع حد و اختلفتوا فى وجهات النظر و حسيت بعد ما المناقشة انتهت انك خارج من اجواء الحرب العالمية الاولى ؟؟

لو ما حصلتش قبل كده فاسمحلى عزيزى القارىء اكلمك عن تجربتى الخاصة و الى كنت محتاجة بعدها لجرادل ميه متلجه علشان اخرج من جو المعركة الى كنت فيه .

حقيقى و بعد ما انتهت المعركة الحمد لله بدون اى جرحى او اسرى حرب قعدت مع نفسى شوية و انتهيت الى ما يأتى طبعا بعد خبرتى الطويلة بالصولات و الجولات بالليل او بالنهار ..

احم المهم ..

بعد التمعن فى تفاصيل مجريات الامور و تعقد الموقف و تسلسل الاحداث و كلام انشا كتير اوى تانى اكتشفت الاتى :

لما يبدأ الحوار بخصوص اى موضوع ولا سيما المواضيع السياسية بلاقى الحوار بيتطور بسرعة و بيسخن اوى و كل طرف من اطراف الحوار يبدأ يقتنع برأيه الشخصى اكتر و اكتر و الصوت يبدأ يعلا ولو الطرف التانى اخوك او اختك فالامر مش حيسلم من شوية اوصاف بمعنى الجهل و الغباء و التخلف و الرجعية و منعا لسقوط اى جرحى او قتلى فلازم حد فيكم يسيب للتانى المكان فورا علشان يهدى الجو ..

الحكاية و ما فيها ان مع تطور المناقشة كل طرف من اطراف الحوار بيسمع الطرف التانى بودانه بس لكن مش بعقله .. يعنى كل واحد بيكون سامع صوت التانى لكن مش سامع معنى كلامه ..

توماتيكى كده تلاقى الواحد بيحاول يسد عقله عن استيعاب الطرف التانى بالتدريج و تتمحور مهمتة و يتركز اهتمامه على كيفيه اثبات صحة كلامه و انشالله الدنيا تخرب بعد كده مش مهم ( انا و من بعدى الطوفان ) .. و تبدأ تحس الدم بيغلى فى نافوخك و يبدأ مسلسل الاسقاط بعدها على طول كل واحد بيتهم التانى انه ما بيسمعش غير نفسه و مش عايز يسمع كلام مخالف لكلامه ..

و كأن كل واحد بيحاول يمنع نفسه من مجرد التفكير فى تقبل الرأى المخالف و مع تطور المناقشه بتتعقد الامور اكتر و بيصعب اوى تكمله الحوار و ده لان كل طرف ماشى بعقله فى اتجاه بعيد تماما عن هدف المناقشه و موضوعها نفسه و بالتالى بيصعب ايجاد نقطة اتفاق يبدأ يدور بيها حوارهم حول موضوع النقاش من تانى و علشان كده بيتطلب الموقف انهاء سريع للمعركة القائمة علشان ما حدش يخسر التانى او حتى يبدأوا يفقدو اعصابهم اكتر من كده ..

و طبعا الحوار بينتهى بدون الوصول الى نتيجة يعنى بيكون الحوار بلا جدوى ( زيه زى قلته بل بالعكس فى بعض الاحيان بيكون قلته احسن ) ..

مع ان لو كل واحد مننا حاول فى مرة اثناء اندماجه فى الحوار يسمع الرأى الاخر بعقله مش بس بودانه الموقف حيختلف تماما .. حتى لو كانت وجهة النظر المقابلة مخالفة تماما لرأيه ..

درب نفسك على انك تفهم مقصد الى امامك لان ده حيفيك و حينعكس على رتم الحوار بشكل كبير جدا ..

اولا : حتعرف ازاى الى قدامك بيفكر و بالتالى حتقدر تحدد افضل اسلوب و وسيلة ممكنة لمحاورته و لاقناعه بوجهة نظرك ..

ثانيا : ستتجنب سيل اللعنات الذى سينهال على رأسكم من المقيمين معكم او حتى الجيران و ده لان رتم الحوار سيكون اكثر هدوءا.

ثالثا : الحوار نفسه مش حيبعد عن مساره .. و حيظل الحوار يدور حول موضوع المناقشه و بس .

رابعا : حينتهى الحوار بسلام و من غير زعل و لا ضيق اى طرف من الاخر.

خامسا : و ده الاهم انك حتتعلم ازاى يكون فيه رأى و راى اخر و ان الراى الاخر يحترم حتى ولو كان مخالفا تماما لرأيك مادام يسير وفق منطق و منهجيه معينه و ليس رأيا عشوائيا و مش مهم مين فيكو صح و مين غلط بعد كده المهم ان كل واحد قدر يعبر و يوصل رأيه للتانى بسلام ..

من الاخر دى دعوة متواضعه منى لكل فرد للتدريب العملى على تقبل الراى الاخر و مرونة ادارة الحوار ..

بعد عدة حروب كلامية خضتها بدأت اراعى فى مناقشاتى بعد كده انى احاول احتفظ بهدوء اعصابى لاقصى درجه ممكنة .. و انى احاول اركز على فهم الطرف المقابل و اراعى وقع كلماتى عليه قبل ما انطق بيها ..

اعترف بانى للان فشلت فى كثير من المرات فى توصيل وجهة نظرى للاخر و اعترف ايضا بان حوارى ليس حوارا مثاليا على الاطلاق .. و لكنى بدأت اخطو ولو خطوات قليلة نحو مزيد من الحوار الحضارى ..

من الاخر يا ريت نشجع بعض فى الموضوع ده يا جماعة

فهل يا ترى ستمنحوننى شرف قبول دعوتى المتواضعة ؟؟

ــــــــــــــــــــــــــــــــــــــــــــــــــــــــــــــــــ

ملحوظة : التدوينة دى كنت نزلتها قبل كده على الصفحة الخاصه بكليتنا الحبيبة على موقع كل الطلبة .. أعيد نشرها مرة تانيه الان نظرا لان الفترة القادمة ستحوى تدوينات أعتقد انها حتكون من النوع الى بيسموه عند " المتأزمين هويتيا " على رأى طموح و ابن خلدون


كونتريفيرزال ايشوز

أيون حضرتك ده انجليزى .. مستغرب ليه ؟؟

الى هو يعنى

controversial issues

فكل واحد يركز فى التدوينة دى كويس .. و يخليه فاكرها علشان يوم ما يخبط فى تدوينة من النوع الى قلت عليه ده يبقى عندنا مشترك نتكلم على اساسه

و دمتم سالمين :)

توضيح

السلام عليكم و رحمة الله وبركاته

بصوا بقى يا جماعة .. بما ان الاعتراف بالحق فضيلة يعنى

و من باب الامانة العلمية فصل الاخلاق الحميدة ( على طريقة الكشف فى المعجم الوجيز )

فحضرتى كنت نزلت التدوينة الى فاتت دى على طول تحذير اقرأوه كده و بعدين كملوا هنا تانى


ها قرأتو ؟؟

طويب :)

الموضوع انى كنت فاكره فعلا ان اللينك متفيرس لانى كنت كل ما اضغط عليه الجهاز عندى يكفهر و يكشر عن انيابه و حاجات كتير تطلعلى كده كنت بالقط فيها من بين القراءة السريعة جدا كلمة
virus

المهم ان بعد التحريات المبدئية فى الموقف و سؤالى لبعض من يهمهم الأمر قيل لى ان اللينك لنوع جديد من برامج
anti-virus

معمولها لينك على طول علشان الواحد ينزلها على الجهاز

و لا حاجةvirus يعنى الموضوع مش

فى الحياة اليومية جداAnti و ده يدل على أهمية الـ


لكم منى كل تحية

و بس خلاص :)